BUSHIKU bumo kwali icintu icabipa icacitike. Yonane Kabatisha balimwipeye. Herodia, umukashi wa mfumu tamutememwe. Kabili alengele imfumu yaeba abantu bamo ukuputula umutwe wa kwa Yohane.

Ilyo Yesu aumfwile icacitike, ali no bulanda sana. E ico afumine apali abantu no kuyaikala eka ukushali congo. Lelo abantu balimukonkele. Ilyo Yesu abamwene, alibomfwilile uluse. E ico atendeke ukubeba pa bufumu bwa kwa Lesa, no kundapa abalwele.

Icungulo abasambi bakwe baile kuli Yesu no kumweba abati: ‘Akasuba kawa, e lyo pano ni pa mpanga. Lekeni abantu baleya mu mishi ya mupepi pa kuti bayeshita ifya kulya fya kuti balye.’

Lelo Yesu abaswike ati: ‘Awe tabafwile ukuya, imwe bene bapeeleni ifya kulya.’ Lyena aloleshe Filipi no kumwipusha ati: ‘Bushe ni kwi twalashita ifya kulya fya kuti aba abantu bonse balye?’

Filipi ayaswike ati: ‘Pa kuti fye tushite ifya kulya ifya kuti abantu bonse balye, nangu fye utunoono tunoono, twalapoosa indalama ishingi sana.’ Andrea atile: ‘Aka kalumendo akasendele ifya kulya fyesu, nakakwata imikate 5 ne sabi libili. Lelo abantu bafulisha, ifya kulya tafyakumane.’

Yesu atile: ‘Ebeni abantu bekale pa fyani.’ Lyena atashishe Lesa pa fya kulya e lyo ayakanya abasambi bakwe. Abasambi nabo bapeele abantu bonse isabi no mukate. Paali abaume 5,000, e lyo na banakashi abengi pamo na bana. Bonse baliliile mpaka baikuta. Kabili ilyo abasambi balonganike ifya kulya ifyashelepo, imiseke 12 yaliswile!

Lyena Yesu aebele abasambi bakwe ukunina mu bwato no kwabuka Bemba wa Galili. Ilyo bali pa menshi ubushiku, kwaishile icipuupu ca mwela kabili amabimbi yalesunka ubwato ica kuti bwalaya uku no ku. Abasambi balitiinine sana. Lyena pa kati ka bushiku bamwene fye umuntu ale-enda pa menshi ukuya uko baali. Balipundile pantu tabaishibe uo balemona.

Yesu abebele ati, ‘Ninebo, mwitiina!’ Na lyo line tabacetekele. E ico Petro atile: ‘Nga ca cine ni mwe, mwe Shikulu, lekeni nyende pa menshi ukwisa uko muli.’ Yesu amwaswike ati: ‘Isa!’ Petro afumine mu bwato no kutendeka ukwenda pa menshi! Lyena alyumfwile umwenso no kutendeka ukwibila, lelo Yesu alimupuswishe.

Pa numa, Yesu aliliishishe abantu abengi na kabili. Uyu muku wena abomfeshe imikate 7 no tusabi utunono fye. Na pali iyi ine nshita, ifya kulya fyalifulile kabili bonse baliliile. Bushe Yesu tacitile bwino filya aliishishe abantu? Ilyo akalateka mu bufumu bwa kwa Lesa, tatwakalesakamana icili conse!