ILYASHI 86
Abaume Abatungulwilwe No Lutanda
BUSHE naulumona ulutanda ulo umwaume alesonta? Ulu ulutanda lwamoneke ilyo bafumine ku Yerusalemu. Aba abaume bafumine ku Kabanga, kabili balisambilile pa ntanda. Baishibe ukuti ulutanda ulwamoneke lwalebatungulula ku muntu uwacindama.
Ilyo aba abaume bafikile ku Yerusalemu, baipwishe ati: ‘Ali kwisa umwana uukaba imfumu ya baYuda?’ Abena Israele balebeta no kuti “abaYuda.” Abaume balandile no kuti ‘twacimona ulutanda lwa mwana ilyo twaciba ku Kabanga, kabili e o twishile mu kupepa.’
Ilyo Herode, imfumu ya ku Yerusalemu yaumfwile ifi yalifulilwe sana. Talefwaya uuli onse ukumupoka ubufumu. E ico aitile intungulushi sha bashimapepo no kubepusha ati: ‘Ni kwi kukafyalilwa imfumu iyo Lesa alaile abantu ukuti ikesa?’ Bamwaswike ati: ‘Baibolo itila ni ku Betelehemu.’
E ico Herode aitile abaume abafumine ku Kabanga no kubeba ati: ‘Kabiyeni kafwayeni umwana uufyelwe. Nga mwamusanga, mwisemunjebe. Na ine ndefwaya ukuyamupepa.’ Ubu bwali bufi pantu ico Herode alefwaya, kwipaya umwana!
Ulutanda lwatangilile abaume ilyo baleya ku Betelehemu kabili lwaileiminina apali umwana. Ilyo abaume baingile mu ng’anda, basangilemo Maria no mwana wakwe, Yesu. Bafumishe ifya bupe no kupeela Yesu. Lelo Yehova alisokele aba abaume mu ciloto no kubeba ukuti bebwelela kuli Herode. E ico babwelele ku calo ku mwabo ukubomfya inshila imbi.
Ilyo Herode aumfwile ukuti abaume aba ku Kabanga balibwelemo ku mwabo, alifulilwe sana. E ico abikileko ifunde lya kuti abana bonse abaume abali ne myaka ibili no kucepako mu Betelehemu, bepaiwe. Lelo Yehova alyebele Yosefe mu ciloto ifyo Herode alefwaya ukucita. E ico Yosefe no lupwa lwakwe balibwelelemo ku Egupti. Ilyo Yosefe aufwile ukuti Herode nafwa, alibwelelemo ku Nazarete na Maria e lyo na Yesu. Uku e ko Yesu akuliile.
Bushe nani walengele lulya ulutanda ukumoneka? Ibukisha ukuti aba baume baile ku Yerusalemu pa numa ya kumona ulutanda. Satana Kaseebanya alefwaya ukwipaya Umwana wa kwa Lesa, kabili alishibe ukuti Imfumu Herode iya ku Yerusalemu kuti yatemwa ukumwipaya. Kanshi Satana e walengele ukuti ulutanda lumoneke.
Nalimo Kuti Mwatemwako ne fi
YESU E NSHILA, ICINE NO MWEO
Ababukila ku Ntanda Baya mu Kumona Yesu
Mulandu nshi ulutanda ulo bamwene ku Kabanga lushabalilepo ukubatungulula kuli Yesu ilyo lushilabatungulula ku Mfumu Herode, uwalefwaya ukwipaya Yesu?
