MONA uyu malaika uwikete iciibi ca ku cifungo iciswike. Aba abaume abo alefumya mu cifungo batumwa ba kwa Yesu. Leka tumone icalengele ukuti bababike mu cifungo.

Apa ninshi papitile fye inshita inono ukutula apo abasambi ba kwa Yesu bapokelele umupashi wa mushilo. Ici e cacitike: Bushiku bumo akasuba, Petro na Yohane baleya kwi tempele ku Yerusalemu. Mupepi na pa mwinshi, paali umwaume uwafyelwe uwalemana. Abantu balemutwala kwi tempele cila bushiku pa kuti alelomba indalama ku baleisa kwi tempele. Ilyo amwene Petro na Yohane, alibalombele ukuti bamupeleko fimo. Cinshi abatumwa bacitile?

Baliminine no kulolesha uyu umwaume umupiina. Petro amwebele ati: ‘Nshikwete indalama, lelo nalakupeela ico nkwete. Mwi shina lya kwa Yesu, ndekweba nati ima no kwenda!’ Lyena Petro aikete uyu umwaume pa kuboko, kabili apo pene fye alitolweke no kutendeka ukwenda. Ilyo abantu bamwene ifi, balipapile kabili balitemenwe sana pali ici icipesha amano.

Petro abebele ukuti: ‘Tucitile ici icipesha amano ku maka ya kwa Lesa, uwabuushishe Yesu ku bafwa.’ Ilyo Petro na Yohane balelanda ifi, bashimapepo balishile. Balifulilwe pantu Petro na Yohane bale-eba abantu abati Yesu alibuuka ku bafwa. E ico balibekete no kubakaka mu cifungo.

Ubushiku bwakonkelepo bashimapepo balilongene. Baitile Petro na Yohane e lyo na ulya umwaume uo baposeshe. Bashimapepo baipwishe abati: ‘Ni ku maka ya kwa nani mucitiile ici icipesha amano?’

Petro abebele ati ni ku maka ya kwa Lesa, uwabuushishe Yesu ku bafwa. Bashimapepo tabaishibe ifya kucita pantu balimwene icipesha amano ico abatumwa bacitile. E ico basokele abatumwa ukukanalanda pali Yesu na kabili. Lyena balilekele baya.

Inshiku shakonkelepo, abatumwa balitwalilile ukushimikila pali Yesu e lyo no kuposha abalwele. Abantu abengi balyumfwile pa lwa ifi ifipesha amano. Kanshi abantu abengi abalefuma mu misumba yali mupepi na ku Yerusalemu baletwala abalwele babo ku batumwa pa kuti babaposhe. Bashimapepo balyumfwile ububi sana. E ico baikete abatumwa no kubakaka mu cifungo. Lelo abatumwa tabakokwelemo mu cifungo.

Ubushiku, malaika wa kwa Lesa aiswile ifiibi fya mu cifungo nga fintu ulemona pa cikope. Malaika atile: ‘Kabiyeni mwi tempele no kutwalilila ukulanda na bantu.’ Ilyo bashimapepo batumine abaume aba kuyasenda abatumwa ulucelo, basangile tabalimo mu cifungo. Abaume babasangile mwi tempele balesambilisha. Balibasendele no kubatwala mu cikuulwa ca Sanhedrini.

Bashimapepo babebele abati: ‘Twalimwebele ukuti, te kwesha ukusambilisha pali Yesu na kabili. Lelo namusambilisha abantu bonse mu Yerusalemu pali Yesu.’ Lyena abatumwa bayaswike abati: ‘Tufwile ukumfwila Lesa ukucila ukumfwila abantu.’ E ico balitwalilile ukubila “imbila nsuma.” Kuti cawama sana nga tulekonka ifyo bacitile.