TUTILE muli mu musebo muleya kumo. Awe mukwai kwaisa ne cipuupu icikalamba sana. Ku muulu na ko kwafiita na fititi, ne nkuba yatendeka ukupanta, awe ne mfula iikalamba yatendeka no kuloka. Mwaendesha ukuti musange ukwa kuube mfula, na ko te kwa kumoneka. Awe mwasuka mwamona icikuulwa icakosa mupepi no musebo. Cilemoneka bwino ne mfula taingilamo. Mwandini kuti mwaumfwa bwino ukusanga icikuulwa ca musango yo!

² Tuleikala mu nshita shayafya. Ifintu mwi sonde filebipilako fye. Lelo, Twalikwata umwa kuuba, umo twingacingililwa ku konaulwa. Ni mwi umo mwine? Moneni ifyo Baibolo isambilisha. Itila: “Nkasosa kuli Yehova nati: “Ni mwe cubo candi kabili ica kufisamamo candi, Ni mwe Lesa wandi, uo natetekela.”—Amalumbo 91:2.

³ Lesa ukuba icubo ca muntu! Cine cine Yehova, Kabumba kabili Mulopwe, kuti aba icubo cesu. Kuti atucingilila, pantu wa maka ukucila fyonse ifingatutiinya. Nangu ca kuti twaponenwa ubwafya, Yehova kuti afumyapo ubo bwafya. Finshi tufwile ukucita pa kuti Yehova abe cubo cesu? Tufwile ukumucetekela. Na kabili, Icebo ca kwa Lesa citukoselesha ukuti: “Ibakileni [ikalilileni] mu kutemwa kwa kwa Lesa.” (Yuda 21) Ca cine, tufwile ukwikalilila mu kutemwa kwa kwa Lesa, ukube fibusa fya kwa Shifwe wa mu muulu. Nga twacite co, tukatila Lesa e cubo cesu. Lelo kuti twaba shani icibusa ca kwa Lesa?

ILUKENI UKUTEMWA KWA KWA LESA NO KUCITAPO CIMO

⁴ Pa kwikalilila mu kutemwa kwa kwa Lesa, tufwile ukwishiba ifyo Yehova aalanga ukuti alitutemwa. Tontonkanyeni pali fimo ifyo Baibolo ilanda ifyo musambilile muli cino citabo. Yehova Kabumba alitupeela isonde lyawamisha umo twikala. Alibikamo ifya kulya ifingi na menshi ayengi, mwaba no bukumu bwe sonde, inama shisuma, e lyo ne fimenwa ifisuma. Lesa, Umwine wa Baibolo, alisokolola ishina lyakwe ne mibele yakwe. Kabili Icebo cakwe cisokolola ukuti atumine Umwana wakwe uo atemwa sana ukwisa pano isonde, ukuleka Yesu acula no kufwa pa mulandu wa ifwe. (Yohane 3:16) Lelo, cinshi ubu bwine bupe bwacindamina? Bulatupeela isubilo lya kuti tukekala bwino ku ntanshi.

⁵ Pali na cimbi ico Lesa aacita icalenga tukakwate isubilo lya kwikala bwino ku ntanshi. Yehova alibikako ubuteko bwa ku muulu, e kutila Ubufumu bwa kwa Mesia. Nomba line bwalaswa bupwishe ukucula konse no kulenga isonde ukuba paradaise. Taleni tontonkanyeni pali ici! Kuti twaikala mulya mu mutende ne nsansa umuyayaya. (Amalumbo 37:29) Pali ino nshita, Lesa alitulanga ifya kucita nga tulefwaya ukwikala bwino. Alitupeela ne shuko lya kupepa kuli wene. Kanshi, kuti twalanshanya na wena inshita fye iili yonse. Ishi ni nshila ishinono fye isho Yehova alangilamo ukutemwa ku bantunse fye bonse, na imwe bene kumo.

⁶ Ilipusho lyacindama ilyo mufwile ukutontonkanyapo ni li: Cinshi mfwile ukucita pali uku kutemwa kwa kwa Yehova? Abengi basosa ukuti, “Ifi Yehova alintemwa, na ine mfwile ukumutemwa.” Bushe na imwe e fyo mumfwa? Yesu asosele ukuti ili e funde lyakulisha pali yonse. Ili funde litila: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mateo 22:37) Ukwabula no kutwishika fingi ifyo mufwile ukutemenwa Yehova Lesa. Lelo, bushe ukumfwa fye ukuti mwalimutemwa e kutemwa Yehova no mutima wenu onse, no mweo onse, no kutontonkanya konse?

⁷ Nga filya kwalondololwa mu Baibolo, ukutemwa Lesa te kumfwa fye ukuti nalimutemwa. Na kuba, nangu ca kutila calicindama ukumfwa ukuti twalitemwa Yehova, iyo ni ntendekelo fye ya kumutemwa icine cine. Uluseke lwa cisabo e lubyalwa pa kuti kube umuti utwale ifisabo. Tutile mulefwaya icisabo, bushe kuti mwaumfwa bwino nga ca kutila umo amupeela fye uluseke lwa ico cisabo? Awe! No kumfwa fye ukuti mwalitemwa Yehova Lesa, ni ntendekelo fye. Baibolo isambilisha ukuti: “Uku e kutemwa Lesa, ukuti tubake amafunde yakwe; kabili amafunde yakwe tayaba cisendo.” (1 Yohane 5:3) Ukutemwa kwa cine cine kulatwala ifisabo fisuma. Kufwile ukumonekela ku micitile.—Mateo 7:16-20.

⁸ Tulanga ukuti twalitemwa Lesa nga ca kutila tuleumfwila amafunde no kucita ifilingene ne fishinte fya mafunde. Tacayafya ukucite co. Amafunde ya kwa Yehova tayayafya, lelo ico ayabikilako kutwafwa ukwikala bwino no kuba ne nsansa. (Esaya 48:17, 18) Nga tulecita ifyo Yehova atweba, tulanga Shifwe wa mu muulu ukuti tulatasha pali fyonse ifyo atucitila. Ku ca bulanda, banono sana muno calo abatasha. Tatulefwaya ukuba abashitasha, nge fyali abantu bamo abaliko ilyo Yesu ali pano isonde. Yesu aposeshe aba fibashi ikumi (10), lelo umo fye abwelele kuli Yesu ku kumutasha. (Luka 17:12-17) Shi natube nga ulya uwatashishe, te balya pabula (9) abashatashishe!

⁹ Mafunde nshi aya kwa Yehova ayo tufwile ukukonka? Natulanda pa mafunde ayengi sana muli cino citabo, lelo lekeni tupituluke fye mu yanono. Ukukonka amafunde ya kwa Lesa kukatwafwa ukwikalilila mu kutemwa kwa kwa Lesa.

TWALILILENI UKUPALAMA KULI YEHOVA

¹⁰ Ukusambilila pali Yehova kulafwaikwa pa kuti mupalame kuli ena. Tatufwile kuleka ukusambilila. Nga ca kutila mwali pa nse ubushiku muleonta umulilo wa nkuni ninshi nakutalala sana, bushe batini kuti mwaleka fye umulilo waya ulecepa mpaka washima? Awe. Kuti mulesonkeleshako inkuni pa kuti umulilo utwalilile ukwaka. Napamo umulilo nga washima kuti mwafwa. Filya fine inkuni shilenga icimbilimbili ukwaka, e fyo no “kwishiba Lesa” kukosha ukutemwa twatemwa Yehova.—Amapinda 2:1-5

¹¹ Yesu alefwaya abalekonka wena ukutwalilila ukutemwa sana Yehova ne Cebo Cakwe ica cine kabili icacindama. Ilyo Yesu abuukile ku bafwa, aebele abasambi bakwe babili pa masesemo yamo aya mu Malembo ya ciHebere ayafikilishiwe muli ena. Ifyebo asosele fyalengele balya basambi ukusosa pa numa abati: “Bushe imitima yesu tayacilabilima ilyo acilalanda na ifwe mu nshila, ilyo acilatukupukwila Amalembo?”—Luka 24:32.

¹² Ilyo mwaishibe fye ifyo Baibolo isambilisha, bushe umutima wenu walitendeke ukusekelela, ukubilima, no kutemwa Lesa? Ukwabula no kutwishika e fyo cali. E fyo ciba ku bengi. Lelo icafya kwikalilila muli uko kutemwa e lyo no kulenga kwena ukukula. Tatulefwaya ukucita ifyaseeka muli cino calo. Yesu asobele ukuti: “Ukutemwa kwa bengi kukafuubalila.” (Mateo 24:12) Finshi mufwile ukucita pa kuti mutwalilile ukutemwa Yehova ne cine ca mu Baibolo?

¹³ Twalilileni ukusambilila pali Yehova Lesa na Yesu Kristu. (Yohane 17:3) Muleetetula nelyo ukutontonkanya sana pa fyo mulesambilila mu Cebo ca kwa Lesa no kulaipusha amuti: ‘Bushe ifi nabelenga filensambilisha cinshi pali Yehova Lesa? Cinshi cimbi nasambilila icingalenga natemwa Lesa no mutima onse, no mutontonkanya onse no mweo onse?’ (1 Timote 4:15) Nga muletontonkanya pali ifyo mukatemwa sana Yehova.

¹⁴ Cimbi ico mufwile ukucita pa kuti mutwalilile ukutemwa Yehova, kulapepa lyonse. (1 Abena Tesalonika 5:17) Mu Cipandwa 17 muli cino citabo, twasambilile ukuti ipepo bupe bwawamisha ubo Lesa atupeela. Nga filya fine abantu batemwana nga balelanshanya lyonse, na ifwe tulatwalilila ukube fibusa fya kwa Yehova kabili bucibusa bwesu bulakosa nga tulepepa kuli wena lyonse. Tatufwile ukulapepela fye ico cine, ukulalanda ifyebo fimo fine cila nshita ukwabula no kubika umutima ku fyo tulelanda. Tufwile ukulanda na Yehova nga filya umwana alanda na bawishi abo atemwa sana. Tufwaya ukulanda mucinshi mucinshi, lelo ukwabula umwenso no kupita mu mbali, kabili ukulanda ifili ku mutima. (Amalumbo 62:8) Ca cine, ukusambilila Baibolo no kupepa ukufuma pa nshi ya mutima fyalicindama mu kupepa kwesu kabili filatwafwa ukwikalilila mu kutemwa kwa kwa Lesa.

BENI NE NSANSA ILYO MULEPEPA LESA

¹⁵ Ukusambilila Baibolo no kupepa fintu twingacita ilyo tuli fweka. Lelo, natulande pa mulimo umo uwaba mu kupepa kwesu uo tubomba ku cintubwingi. Uyu, mulimo wa kwebako bambi ifyo twasumina. Bushe mwalitendeka ukwebako bambi icine ca mu Baibolo? Nga mwalitendeka ninshi mulaipakisha umulimo wacindamisha. (Luka 1:74) Nga tuleebako abantu bambi icine ico tusambilile pali Yehova Lesa, ninshi tulebomba umulimo wacindamisha uwapeelwa ku Bena Kristu ba cine bonse, umulimo wa kushimikila imbila nsuma iya Bufumu bwa kwa Lesa.—Mateo 24:14; 28:19, 20.

¹⁶ Umutumwa Paulo alemona umulimo wakwe ukuti mulimo wacindama sana ica kuti awitile ukuti icuma. (2 Abena Korinti 4:7) Ukulanda na bantu pali Yehova Lesa ne fyo afwaya, e mulimo wawamisha uo mwingabomba. Pantu tubombela Shikulu umusuma sana, kabili ne fifumamo fisuma sana. Ilyo mulebomba uyu mulimo, mulafwilisha abantu ba mitima isuma ukupalama kuli Shifwe wa mu muulu no kuba pa musebo wa ku bumi bwa muyayaya! Mulimo nshi wingawama ukucila uyu? Na kabili, ukulanda pali Yehova ne Cebo cakwe kulakosha icitetekelo cenu kabili kulenga mwamutemwa sana. Kabili Yehova alatasha pa kubombesha kwenu. (AbaHebere 6:10) Ukucincila pa kubomba uyu mulimo kulamwafwa ukwikalilila mu kutemwa kwa kwa Lesa.—1 Abena Korinti 15:58.

¹⁷ Calicindama ukwibukisha ukuti umulimo wa kushimikila ufwile ukubombwa bwangu. Baibolo isosa ukuti: “Shimikile cebo, cincila.” (2 Timote 4:2) Cinshi tufwile ukubela abacincila? Icebo ca kwa Lesa citweba ukuti: “Nabupalamo bushiku bukulu bwa kwa Yehova, nabupalama no kwangufyanisha.” (Sefania 1:14) Ca cine inshita ya kuti Yehova onaule buno bwikashi bonse ilepalama lubilo lubilo. Abantu bafwile ukusokwa! Bafwile ukwishiba ukuti ino ni nshita ya kusala Yehova ukuba Mulopwe wabo. Impela ‘tayakashimbe iyo.’—Habakuki 2:3.

¹⁸ Yehova afwaya tulemupepa bonse capamo na Bena Kristu ba cine. E mulandu wine Icebo cakwe cisosela ukuti: “Tutontonkanye ifya kucincishanya ku kutemwa kabili ku kubombe milimo isuma, twiba abalekelesha ukulongana kwesu, filya waba umusango wa bamo, lelo tukoseleshanye, pali bufi apo mulemona ubushiku bulya bulepalama.” (AbaHebere 10:24, 25) Nga twalongana na basumina banesu pa kulongana kwa Bwina Kristu, iba ni nshita isuma iya kupepa Lesa wesu uo twatemwa. Na kabili tulakoshanya no kukoseleshanya.

¹⁹ Ilyo tuli na bakapepa ba kwa Yehova, tulakosha ukutemwa na bucibusa mu cilonganino. Calicindama ukumona ubusuma mu banensu, nga filya Yehova amona ubusuma muli ifwe. Mwienekela abasumina banenu ukuba abapwililika. Ibukisheni ukuti tatukulila pamo mu fya kwa Lesa no kuti bonse tulalufyanya. (Abena Kolose 3:13) Pangeni bucibusa na batemwa sana Yehova, e lyo mukakula bwangu mu fya kwa Lesa. Ca cine, nga mulepepa Yehova capamo na babwananyina mukekalilila mu kutemwa kwa kwa Lesa. Bushe Yehova alambula shani abatwalilila ukupepa wena no kwikalilila mu kutemwa?

KONKELELENI “UBUMI BWINE BWINE”

²⁰ Yehova alapeela ababomfi bakwe aba cishinka ubumi, lelo bumi bwa musango shani? Bushe muli abomi pali nomba? Fwe bengi kuti twasosa atuti ico te ca kutwishika. Na kabushe tulapeema, tulalya, no kunwa. Cine cine twalikwata ubumi. Kabili ilyo tuli ne nsansa kuti twasosa no kuti, “Nomba tuleipakisha ubumi bwine bwine!” Lelo Baibolo isosa ukuti tapaba uwakwata ubumi bwine bwine.

²¹ Icebo ca kwa Lesa citukoselesha ‘ukwikatisha ku bumi ubwine bwine.’ (1 Timote 6:19) Aya mashiwi yalangilila ukuti “ubumi bwine bwine” e bo tufwaya ukukwata ku ntanshi. Ca cine ilyo tukapwililika, tukaba abomi icine cine, pantu tukalaikala filya fine Lesa afwaile tuleikala pa kubala. Nga twatendeka ukwikala mwi sonde lya paradaise umushakabe ukulwala nangu panono, umo tukekala mu mutende ne nsansa, e lyo tukaipakisha “ubumi bwine bwine,” ubwa muyayaya. (1 Timote 6:12) Bushe ilyo te subilo lisuma sana?

²² Kuti ‘twaikatisha shani ku bumi bwine bwine’? Mu lyashi limo line, Paulo akoseleshe Abena Kristu “ukucite cisuma” no “kuba abakankaala mu milimo isuma.” (1 Timote 6:18) Kanshi pa kukwata ubu bumi, kano tulecita ifilingene ne cine ico twasambilila mu Baibolo. Lelo, bushe Paulo aloseshe mu kuti “ubumi bwine bwine e malipilo ya kucite cisuma? Iyo, pantu Lesa atupeele ubu bupe busuma nga nshi ku “cikuuku ca bupe fye.” (Abena Roma 5:15) Lelo, Yehova alafwaisha ukulambula bonse abamubombela ne cishinka. Afwaya mukabe no “bumi bwine bwine.” Abekalilila mu kutemwa kwa kwa Lesa e bakekala umuyayaya, mu mutende ne nsansa.

²³ Cila muntu afwile ukuipusha ati, ‘Bushe ndepepa Lesa ukulingana ne fyo alanda mu Baibolo?’ Nga tuleibebeta cila bushiku no kushininkisha ukuti tulepepa Lesa ukulingana ne fyo alanda, ninshi tulecita icalungama. Kuti twacetekela ukuti Yehova e cubo cesu. Akacingilila abantu bakwe aba cishinka muli shino nshiku shayafya isha ku mpela ya buno bwikashi. Yehova kabili akatupususha no kutwingisha mu calo cisuma icili mupepi. Ifyo tukacankwa ukuba muli ico calo! Kabili mwandini tukaba ne nsansa ukwishiba ukuti muli shino nshiku sha kulekelesha, ifi twasala ukubombela Lesa, twalisala fye bwino! Nga mwasala ukucite co muno nshiku, mukaipakisha “ubumi bwine bwine,” ubumi bwa muyayaya, filya fine Yehova Lesa afwaile cibe!