NGA kulinganya icalo ne myulu, icalo cinono sana. Na kuba kuli Yehova, “uwacitile umuulu na pano isonde,” inko shaba fye nge toni ilipona ku ca kutapilamo amenshi. (Amalumbo 115:15; Esaya 40:15) Lelo, Baibolo isosa ukuti: “Yehova ali mupepi kuli bonse abalilila kuli wene, kuli bonse abalilila kuli wene mu cishinka; ukufwaya kwa bamutiina, wene alakucita, ne nkuuta yabo ayumfwa.” (Amalumbo 145:18, 19) Tontonkanyeni pali ico! Kalenga wa maka yonse aba mupepi na ifwe kabili alakutika nga ‘twalilila kuli wene mu cishinka.’ Ukupepa kuli Lesa lipaalo icine cine!

² Lelo, nga tulefwaya Yehova ukukutika ku mapepo yesu, tufwile ukupepa kuli wena ukulingana ne fyo afwaya. Nomba pa kuti twishibe ifya kupepa kano twaishiba ifyo Baibolo isambilisha pe pepo. Tufwile ukwishiba ifyo Amalembo yasosa pali uyu mulandu, pantu ipepo lilatwafwa ukupalama kuli Yehova.

CINSHI TUFWILE UKUPEPELA KULI YEHOVA?

³ Cimo ico tufwile ukupepela kuli Yehova ni co alatweba ukuti tulepepa kuli wena. Icebo Cakwe citukoselesha ukuti: “Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Cine cine, tatufwile ukusuula ili shuko lya kupepa ilyo Kateka Wapulamo uwa bubumbo atupeela!

⁴ Kabili tufwile ukupepa pantu ukupepa lyonse kuli Yehova kulakosha bucibusa bwesu na wena. Bacibusa ba cine cine tabalanshanya fye ilyo balekabila fimo. Lelo, ifibusa fya cine filatemwana, kabili bucibusa bwabo bulakosa ilyo balelanshanya ifyo batontonkanya, ifibasakamika ne fya ku mutima. Na bucibusa bwesu na Yehova Lesa e fyo bwaba. Muli cino citabo, namusambilila ifingi ifyo Baibolo isambilisha pali Yehova, ifyo aaba, ne fyo afwaya ukucita. Namusambilila no kuti Lesa wa cine cine. Ukupepa kulenga mwaeba Shinwe wa mu muulu ifyo mutontonkanya ne fya ku mutima wenu. Ukucite fyo kulamupalamika kuli Yehova.—Yakobo 4:8.

FINSHI FIFWAIKWA PA KUTI AMAPEPO YESU YOMFWIKE?

⁵ Bushe Yehova alomfwa amapepo yonse? Moneni ifyo aebele abena Israele bapondweke mu nshiku sha kwa Esaya. Atile: “Apo mufusho kupepa ine nshumfwa. Iminwe yenu yaisulamo imilopa.” (Esaya 1:15) E ico kanshi, fimo ifyo tucita kuti fyalenga Lesa akaana ukuumfwa amapepo yesu. Pa kuti Lesa omfwe amapepo yesu, kwaliba fimo ifyo tufwile ukucita.

⁶ Icikalamba cimo icifwaikwa, citetekelo. (Marko 11:24) Umutumwa Paulo alembele ukuti: “Ukwabula icitetekelo [Lesa] te kuti ateemunwe, pantu uupalamina kuli Lesa afwile ukusumina ukuti e ko aba no kuti aba kalambula wa bamufwaisha.” (AbaHebere 11:6) Ukuba ne citetekelo te kwishiba fye ukuti Lesa e ko aba no kuti alomfwa no kwasuka amapepo. Icitetekelo cimonekela ku micitile yesu. Imikalile yesu iya cila bushiku ifwile ukulanga bwino bwino ukuti twalikwata icitetekelo.—Yakobo 2:26.

⁷ Yehova na kabili afwaya abantu ukuicefya pa kupepa kabili afwaya balepepa ukufuma pa nshi ya mutima. Bushe kwena tatufwile ukuicefya ilyo tulelanda na Yehova? Abantu nga bakwata ishuko lya kulanda ne mfumu nelyo kateka, balanda mucinshi mucinshi, apo baleshiba ukuti balelanda no muntu uwacindama sana. Bushe ifwe tatufwile no kucilapo ukuba no mucinshi ilyo tulelanda na Yehova? (Amalumbo 138:6) Na kabushe, ni “Lesa Uwa maka yonse.” (Ukutendeka 17:1) Nga tulepepa kuli Lesa, imilandile yesu ifwile ukulanga ukuti natuicefya kuli wena pantu natwishiba ukuti tulepepa kuli mulopwe. Ukuicefya kwa musango yo kukalenga twalapepa ukufuma pa nshi ya mutima, te kupepa amapepo yamo yene lyonse fye.—Mateo 6:7, 8.

⁸ Cimbi icifwaikwa pa kuti Lesa omfwe amapepo kucita ifilingene na mapepo yesu. Yehova afwaya tulebombesha ukucita ifilingene ne co tulepepela. Ku ca kumwenako, nga twapepa ukuti, “Tupeeleni leelo ica kulya cesu ica buno bushiku,” tufwile ukubombesha incito yonse iyo tulebomba. (Mateo 6:11; 2 Abena Tesalonika 3:10) Nga twapepa ukuti atwafwe ukucimfya imisango yabipa, tufwile ukucenjela pa kuti twataluka ku fingalenga twaeshiwa. (Abena Kolose 3:5) Twalanda pa fifwaikwa pa kuti amapepo yesu yomfwike, lekeni nomba twasuke na mepusho abantu bepusha pe pepo.

UKWASUKA IFYO ABANTU BEPUSHA PE PEPO

⁹Ni kuli ani tufwile ukupepa? Yesu asambilishe abakonshi bakwe ukupepa kuli “Shifwe wa mu muulu.” (Mateo 6:9) Kanshi tufwile ukupepa kuli Yehova Lesa eka. Lelo, Yehova alafwaya ukuti tucindike icifulo ca Mwana wakwe, Yesu Kristu. Nga filya twasambilile mu Cipandwa 5, Yesu atuminwe pano isonde ku kuba icilubula ca kutupususha ku lubembu ne mfwa. (Yohane 3:16; Abena Roma 5:12) E wasalwa ukuba Shimapepo Mukalamba kabili Kapingula. (Yohane 5:22; AbaHebere 6:20) E ico, Amalembo yatweba ukupepa ukupitila muli Yesu. Umwine asosele ukuti: “Nine nshila ne cine no bumi. Takuli uwisa kuli Tata kano aishila muli ine.” (Yohane 14:6) Pa kuti amapepo yesu yomfwike, tufwile ukupepa kuli Yehova ukupitila mu Mwana wakwe.

¹⁰Bushe tufwile ukucita fimo ifyaibela pa kupepa? Iyo. Yehova talanda ifyo tufwile ukucita amaboko, nelyo nga tufwile ukwikala atemwa ukwiminina pa kupepa. Baibolo isambilisha ukutila kuti mwapepa namwikala, namukontama, namufukama nelyo namwiminina. (1 Imilandu 17:16; Nehemia 8:6; Daniele 6:10; Marko 11:25) Tacacindama ukucita fimo ifyaibela pa kuti abantu bamone, lelo icacindama mutima. Na kuba, mu mikalile yesu iya cila bushiku, na lintu kwaima ubwafya, kuti twapepela mu mutima konse uko tuli. Yehova alomfwa amapepo ya musango yo nangu ca kutila abo tuli na bo tabomfwileko.—Nehemia 2:1-6.

¹¹Finshi twingapepela? Baibolo ilondolola ukuti: “Te mulandu ne co twalomba icilingene no kufwaya kwakwe, [Yehova] alatuumfwa.” (1 Yohane 5:14) Kanshi kuti twalanda pali conse ico tulefwaya kulila fye cilingene no kufwaya kwa kwa Lesa. Bushe alafwaya ukuti mu mapepo yesu tulelanda pa filetusakamika? Ee! Ukupepa kuli Yehova kuti kwaba kwati kulanda na cibusa mwatemwa sana. Kuti twaeba Lesa conse ukwabula umwenso, ‘ukumupongolwela ifya mu mitima yesu.’ (Amalumbo 62:8) Cisuma ukulomba umupashi wa mushilo, pantu ukatwafwa ukucita icalungama. (Luka 11:13) Na kabili kuti twalomba ukuti twafwiwe ukusala bwino ifya kucita no kuti tube na maka ya kushipikisha ubwafya. (Yakobo 1:5) Nga twabembuka, tufwile ukulomba ukuti atwelele ukupitila mwi lambo lya kwa Kristu. (Abena Efese 1:3, 7) Lelo, kwena mu mapepo yesu, tatufwile ukulanda fye pa fyesu. Tufwile ukupepelako na bantu bambi, aba mu lupwa lwesu e lyo na bakapepa banensu.—Imilimo 12:5; Abena Kolose 4:12.

¹² Ifya kwa Yehova Lesa e fifwile ukube fya ntanshi mu mapepo yesu. Ukwabula no kutwishika tufwile ukumutasha no kumulumbanya ukufuma pa nshi ya mutima pa busuma bwakwe. (1 Imilandu 29:10-13) Mwi pepo lya kwa Yesu ilya cilangililo, ilyalembwa pali Mateo 6:9-13, atufundile ukupepa ukuti ishina lya kwa Lesa lishishiwe, e kuti, libe ilyashila, nelyo ilya mushilo. Akonkeshepo ukuti tufwile ukupepa ukuti Ubufumu bwa kwa Lesa bwise, no kufwaya kwakwe kucitwe pano nse nga mu muulu. Pa numa ya kulanda pali iyi milandu yacindama iyakuma Yehova, e lyo Yesu alandile pa fyo umuntu akabila. Na ifwe nga twabika ifya kwa Lesa pa ntanshi mu mapepo yesu, tulanga ukuti tatusakamana fye ifyesu.

¹³Bushe amapepo yesu yafwile ukulepa shani? Baibolo tayalanda ifyo amapepo yesu nelyo aya pa cintubwingi yafwile ukulepa. Ipepo kuti lyaba ilipi, nga umuntu alepepa pa kulya, nelyo ilitali nga umuntu alepongolwela Yehova ifya mu mutima. (1 Samwele 1:12, 15) Lelo Yesu alikalipile abaleimona ukuti balilungama sana ica kuti balepepa amapepo ayatali aya kuilanga ku bantu. (Luka 20:46, 47) Amapepo ya musango yo tayatemuna Yehova. Icacindama kupepa ukufuma pa nshi ya mutima. E ico, ipepo kuti lyaba ilipi nelyo ilitali ukulingana ne fyo tulekabila nelyo ifilecitika.

¹⁴Miku inga tufwile ukupepa? Baibolo itukoselesha ‘ukuba no mute mu kupepa’ no ‘kukanaleka ukupepa.’ (Mateo 26:41; Abena Roma 12:12; 1 Abena Tesalonika 5:17) Kwena, aya mashiwi tayalolele mu kuti tufwile ukwikalila fye ukupepa kuli Yehova. Lelo, Baibolo iletukoselesha ukupepa lyonse, ukutwalilila ukutasha Yehova pa fisuma atucitila no kucetekela wena ukututungulula, ukutukoselesha no kutukosha. Bushe tatusekelela ukwishiba ukuti Yehova tatupimina ifyo amapepo yesu yafwile ukulepa nelyo imiku tufwile ukulanda nankwe? Nga tulatasha icine cine pe shuko lya kupepa, tukalapepa kuli Shifwe wa mu muulu lyonse.

¹⁵Cinshi tufwile ukusosela ukuti “Ameni” pa mpela ye pepo? Ishiwi lya kuti “ameni” lyalola mu kuti “ca cine,” nelyo “nacibe ifyo fine.” Ifyaba mu Amalembo filanga ukuti calicindama ukusosa ukuti “Ameni” pa mpela ye pepo lyenu nelyo ilyo umuntu umbi apwa ukupepa. (1 Imilandu 16:36; Amalumbo 41:13) Nga twasosa ati “Ameni” ilyo twapwa ukupepa, tulosha mu kuti ifyo twalanda fyafuma pa nshi ya mutima. Nga muntu umbi apepa, nga twatila “Ameni,” mu mutalalila nelyo mwi shiwi lyumfwika, ninshi twasuminisha ifyo alanda.—1 Abena Korinti 14:16.

IFYO LESA AASUKA AMAPEPO YESU

¹⁶ Bushe Yehova cine cine alasuka amapepo? Ee alasuka! Twalicetekela sana ukuti ‘uumfwo kupepa’ alasuka amapepo ayo abantu abengi nga nshi bapepa ukufuma pa nshi ya mutima. (Amalumbo 65:2) Yehova kuti ayasuka amapepo yesu mu nshila shalekanalekana.

¹⁷ Yehova alaasukila amapepo muli bamalaika bakwe na babomfi bakwe pano isonde. (AbaHebere 1:13, 14) Kwaba abantu abengi abapepele kuli Lesa ukuti abafwe ukumfwikisha Baibolo kabili pa numa ya kupepa, no mubomfi wa kwa Yehova abatandalila. Ifya musango yo filanga fye ukuti bamalaika e batungulula umulimo wa kushimikila abantu pa Bufumu. (Ukusokolola 14:6) Pa kwasuka amapepo tupepa ilyo tulekabila fimo, Yehova kuti alenga Umwina Kristu munensu atwafwa.—Amapinda 12:25; Yakobo 2:16.

¹⁸ Yehova Lesa na kabili alasukila amapepo mu mupashi wakwe uwa mushilo e lyo na mu Cebo cakwe, Baibolo. Nga twapepa ukuti atwafwe ukukananenuka ilyo twaeshiwa, kuti atulanga ifya kucita no kutupeela amaka ukupitila mu mupashi wakwe uwa mushilo. (2 Abena Korinti 4:7) Ilingi line nga twapepa ukuti Lesa atutungulule mu mulandu umo, tusanga icasuko mu Baibolo, umo Yehova atweba ifya kucita. Tulasanga amalembo yatwafwa ukwiluka ifya kucita, ilyo tulesoma Baibolo na lintu tulebelenga impapulo sha Bwina Kristu, pamo nga cino citabo. Amalembo yamo ayengatwafwa kuti yalandwapo pa kulongana kwa Bwina Kristu nelyo mu fyebo fya baeluda batusakamana mu cilonganino.—Abena Galatia 6:1.

¹⁹ Nga camoneka kwati Yehova akokola ukwasuka amapepo yesu, te kutila nafilwa ukwasuka. Lelo, tufwile ukwibukisha ukuti Yehova aasuka amapepo ukulingana no kufwaya kwakwe kabili pa nshita yakwe iyalinga. Alishiba ifyo tukabila ne fya kucita pali uko kukabila ukucila ne fyo fwe bene twaishiba. Ilingi line alatuleka ‘twatwalilila ukulomba, ukufwaya no kukonkonsha.’ (Luka 11:5-10) Nga twatwalilila ukucite fyo tulanga Lesa ukuti tulefwaisha ico cintu no kuti icitetekelo cesu calikosa. Kabili Yehova kuti ayasuka amapepo yesu ukwabula no kuti twishibe. Ku ca kumwenako, pa kwasuka amapepo tupepa ilyo twayeshiwa, napamo te kuti afumyepo ubo bwafya, lelo kuti atupeela fye amaka pa kuti tushipikishe ubo bwafya.—Abena Filipi 4:13.

²⁰ Mwandini tulatasha ukuti Kabumba wa myulu aba mupepi na bonse abapepa kuli wena ukulingana ne fyo afwaya! (Amalumbo 145:18) Shi natulepepa lyonse kuli Yehova apo ipepo lipaalo ilyo atupeela. Nga twacite co, tukatwalilila ukupalama kuli Yehova, Uumfwa amapepo, ne co cikatuletela insansa.