ISAMBILILO 02

Baibo Ilalenga Abantu Baba ne Subilo

TINIKENI

Abantu abengi mwi sonde lyonse balaba na mafya ayalenga baba no bulanda, basakamikwa, nelyo fye ukukalipwa. Bushe na imwe mwalikwatapo amafya ayalengele mumfwe nge fi twalandapo? Nalimo mulacula pa mulandu wa kuti mwalilwala nelyo pa mulandu wa kuti umuntu uo mwatemenwe alifwa. Nalimo kuti mwayipusha amuti, ‘Bushe ifintu fikabala afiwama?’ Ifyo Baibo yasuka ici cipusho kuti fyamusansamusha.

1. Bushe Baibo ilenga shani twaba ne subilo?

Baibo tailondolola fye ico amafya yafulila mwi sonde, lelo mwaliba ne mbila nsuma ya kuti aya amafya ya pa kashita fye akanono kabili yali no kupwa nomba line. Amalayo yaba mu Baibo kuti ‘yamupeela inshita ya ku ntanshi iisuma ne subilo.’ (Belengeni Yeremia 29:11, 12.) Aya amalayo yalalenga tuleshipikisha amafya no kulaba ne nsansa pali ino nshita, kabili yalalenga twaishiba no kuti tukaba ne nsansa umuyayaya.

2. Bushe Baibo itila ifintu fikaba shani ku ntanshi?

Baibo ilondolola ukuti ku nshita ya ku ntanshi “imfwa tayakabeko na kabili, takwakabe no kuloosha nangu ukuteta nangu ukukalipwa na kabili.” (Belengeni Ukusokolola 21:4.) Amafya ayalenga abantu baleka ukuba ne subilo pamo nga ukubulisha ifya kulya, ulufyengo, ukulwala ne mfwa, tayakabeko na kabili. Baibo yalilaya ukuti abantunse bakaba no bumi ubusuma nga nshi ilyo bakalaikala umuyayaya mu Paradaise pano pene pe sonde.

3. Kuti mwashininkisha shani ukuti ifyo Baibo yalaya fikacitika?

Abantu abengi balasubila ukuti ifintu ifisuma fikacitika, nomba balatwishika nga ca kuti ifyo basubila fikacitika. Ifyo Baibo yalaya fyena fyalipusanako. Kuti twacetekela ifyo Baibo yalaya nga ‘tulefwailisha mu Malembo.’ (Imilimo 17:11) Ifi mulesambilila Baibo, mukamona mwe bene nga kuti mwacetekela ifyo Baibo yalanda ukuti fikacitika ku ntanshi.

SAMBILILENI NA FIMBI

Moneni ifintu fimo ifyo Baibo yalaya ukuti fikacitika ku ntanshi. Kabili moneni ne fyo amalayo yaba mu Baibo yafwa abantu muno nshiku.

4. Baibo yatulaya ukuti tukalaikala umuyayaya ukwabula amafya

Moneni amalayo yakonkapo ayaba mu Baibo. Ni yesa mwatemwapo? Kabili mulandu nshi mwayatemenwa?

Belengeni amalembo ayali pali aya malayo, kabili lanshanyeni aya mepusho:

Bushe mulemona ukutila aya amalembo kuti yalenga mwaba ne subilo? Bushe mulemona ukutila kuti yalenga balupwa lwenu ne fibusa baba ne subilo?

Elenganyeni ifyo cikaba ukwikala mu calo

UMO UMUNTU NANGU UMO . . .	UMO ABANTU BONSE . . .
ashakalekalipwa, ukukota, nelyo ukufwa.—Esaya 25:8.	bakamona balupwa lwabo ne fibusa babuuka no kuba no mweo pano calo.—Yohane 5:28, 29.
ashakalelwala nelyo ukulemana.—Esaya 33:24; 35:5, 6.	bakaba no bumi ubusuma na maka.—Yobo 33:25.
ashakalefyengwa.—Esaya 32:16, 1.	bakakwata ifya kulya ifingi, bakalaikala mu mayanda ayasuma, kabili bakalabomba incito iikalalenga bakaleba ne nsansa.—Amalumbo 72:16; Esaya 65:21, 22.
ashakalecula pa mulandu ne nkondo.—Amalumbo 46:9.	bakalaipakisha umutende wine wine.—Amalumbo 37:11.
ashakaleumfwa ububi pa mulandu wa kutontonkanya pa fyabipa ifyacitike.—Esaya 65:17.	bakalaikala umuyayaya ukwabula amafya nangu yamo.—Amalumbo 37:29.

5. Amalayo yaba mu Baibo kuti yalenga imikalile yenu yawaminako

Abantu abengi balomfwa ububi nelyo fye ukukalipa pa mulandu wa mafya ayaba mu calo. Bamo balesha na maka ukufwaya ukwalula ifintu pa kuti fibe bwino. Moneni fintu ifyo Baibo yalaya ukuti ifintu fikawama ku ntanshi fya-afwa abantu muno nshiku. Tambeni VIDIO, lyena lanshanyeni amepusho yakonkapo.

VIDIO: Nalefwaya Ukupwisha Ulufyengo (4:07)

Muli vidio twatamba, lufyengo nshi ba Rafika balemona ulwalengele ukuti bakalipe?
Bushe Baibo ya-afwile shani ba Rafika nangu ca kuti ulufyengo balemona talwapwile?

Nga twacetekela ifyo Baibo yalaya ukuti ifintu fikawama ku ntanshi, kuti twaleka ukumfwa ububi kabili kuti twaba ne nsansa na lintu tuli na mafya. Belengeni Amapinda 17:22 na Abena Roma 12:12, lyena lanshanyeni aya mepusho:

Bushe mulemona ukutila ifyo Baibo yalaya ukuti ifintu fikawama ku ntanshi kuti fyalenga imikalile yenu yawaminako? Mulandu nshi mulemwena ifyo?

ABANTU BAMO BATILA: “Ifyo Baibo yalaya ukuti e fyo ifintu fikaba ku ntanshi, fyaliwamisha te kuti ficitike.”

Cinshi mulemwena ukuti nacicindama ukwishiba ifishinka mwe bene?

IFYO MUSAMBILILE

Mu Baibo mwaliba amalayo ayengi pa fikacitika ku ntanshi ifikalenga tukabe ne nsansa. Aya malayo yalalenga twaba ne subilo kabili yalalenga imikalile yesu ukuwaminako pali ino nshita.