MULINGILE ukwishiba ukuti Yehova akulamwafwa nga ca kuti mwabwelela kuli ena. Akamwafwa pa kuti mwaleka ukusakamikwa no kumfwa ububi nga kuli abamukalifye, kabili akalenga mwaba no mutende wine wine uo umuntu akwata nga alebombela Lesa na kampingu iisuma. Yehova nga amwafwa, mukafwaya ukulamubombela capamo na bakapepa bakwe. Nga mwacita ifi, mukaba nga filya Abena Kristu bacitile aba mu nshita sha batumwa abo umutumwa Petro aebele ati: “Mwali kwati ni mpaanga ishaluba; lelo nomba mwalibwelela ku mucemi kabili kangalila wa myeo yenu.”—1 Petro 2:25.

Icacindama sana ico mufwile ukucita, kubwelela kuli Yehova. Cinshi mufwile ukucitila ifi? Nga mwabwelela kuli Yehova, mukalenga umutima wakwe ukasekelele. (Amapinda 27:11) Nga fintu mwaishiba, ifyo tucita kuti fyalenga Yehova atemwa nelyo kuti fyalenga aumfwa ububi. Na lyo line, Yehova tatupatikisha ukuti tumutemwe no kuti tulemubombela. (Amalango 30:19, 20) Uwasambilila sana ifya mu Baibolo atile: “Takuli uwingamona mu mutima wenu. Ni mwe fye mwaishiba ifyaba mu mutima wenu.” Kanshi nga tulepepa Yehova no mutima wesu onse, ninshi tuleisula umutima wesu. Nga tulepepa Yehova no mutima onse ninshi tulemupeela ica bupe icisuma, e kutila bucishinka, ne ci cilalenga Yehova alesekelela. Takwaba iciletela umuntu insansa ukucila pa kupepa Yehova mu nshila afwailamo.—Imilimo 20:35; Ukusokolola 4:11.

Ne cawamisha ca kuti, nga mwatendeka ukupepa Yehova na kabili, mukaba ne nsansa pantu mukalasambilila ifingi pali ena. (Mateo 5:3) Finshi mukalasambilila? Abantu abengi balepusha abati, ‘Cinshi twabela pano calo?’ Abantu balafwaisha ukwishiba amasuko ku mepusho pa fyo twabela pano calo pantu e fyo Yehova atubumbile. Afwaya tuleba ne nsansa ilyo tulemubombela. Icilenga tuleba sana ne nsansa kwishiba ukuti tulabombela Yehova pantu twalimutemwa.—Amalumbo 63:1-5.

Mufwile ukwishiba ukuti Yehova afwaya mwabwelela kuli ena. Mwaishiba shani ukuti e fyo afwaya? Tontonkanyeni pali ici: Pa kulemba ino broshuwa, abalembele balipepele sana. Nalimo eluda nelyo Umwina Kristu munenu e wamuleteele ino broshuwa pa kuti mulebelengamo. Lyena mwalibelengele kabili mwalikonkele ifyo mwabelengele. Ifi fyonse, filelangilila fye ukuti Yehova tamulaba, lelo alafwaya mwatendeka ukumubombela na kabili.—Yohane 6:44.

Kanshi kuti mwaba ne nsansa ukwishiba ukuti Yehova talaba ababomfi bakwe abaleka ukumubombela. Nkashi Donna alitemenwe ilyo aishibe ukuti Yehova talaba ababomfi bakwe. Alandile ati: “Natendeke ukufuma mu cilonganino ca kwa Lesa panono panono, lelo ilingi line naletontonkanya pa mashiwi ayaba pa Amalumbo 139:23, 24, apatila: ‘Fwayeni muli ine, mwe Lesa, no kwishiba umutima wandi. Nceeceeteni, no kwishiba amalangulushi yandi, mumone nga muli ine mwaba amapange ya kuntwala mu nshila iibi, kabili muntungulule mu nshila ya muyayaya.’ Nalishibe ukuti nshalingile ukulacita ifya muli ici calo, lelo nalingile ukuba mu cilonganino ca kwa Yehova. Lyena nalemona ukuti Yehova tandekeleshe, nalingile fye ukubwelela kuli ena. Naliba ne nsansa pantu nalibwelela kuli Yehova!”

Tulemupepelako ne mitima yesu yonse ukuti ‘mukalesekelela muli Yehova’ na kabili. (Nehemia 8:10) Mukatwalilila ukuba ne nsansa nga ca kuti mwabwelela kuli Yehova.