Kuli bamunyinefwe:

Nga fintu mwaishiba, Baibolo yalilanda sana pa bantu. Abantu abengi abo yalandapo bali baume na banakashi abali ne citetekelo kabili abalekwata amafya ayo na ifwe tukwatako. Aba abantu bali fye “nga ifwe bene.” (Yakobo 5:17) Bamo balekwata sana amafya kabili balesakamikwa. Bambi balebakalifya sana kuli balupwa wabo na bakapepa banabo, kabili abengi baleumfwa sana ububi pa filubo ifyo balecita.

Bushe aba bantu balilekele ukupepa Yehova? Iyo. Abengi bali kwati ni kemba wa malumbo uwapepele ati: “Naendauka nge mpaanga iilubile. Fwayeni umubomfi wenu, pantu nshalaba amafunde yenu.” (Amalumbo 119:176) Bushe ifyo alandile e fyo na imwe mumfwa?

Yehova talaba bakapepa bakwe abafuma mwi cinka lyakwe, lelo alabomfya bakapepa banabo pa kubabwesesha mwi cinka lyakwe. Natulande pa fyo Yehova ayafwile umubomfi wakwe Yobo, uwakwete amafya ayengi sana pamo nga ukulufya ifyuma, ukufwilwa abana na babomfi bakwe, e lyo no kulwala ubulwele bwabipisha. Yobo na kabili alishipikishe ilyo abantu bamo balemweba amashiwi yabipa, mu nshita ya kulamukoselesha. Na lyo line, Yobo talekele ukupepa Yehova nangu ca kuti aletontonkanya kwati Lesa e walelenga alecula. (Yobo 1:22; 2:10) Cinshi Lesa acitile pa kwafwa Yobo?

Yehova abomfeshe Elihu, ukwafwa Yobo. Ilyo Yobo alandile amafya ayo akwete, Elihu kapepa munankwe alikutike kabili alimwafwile. Finshi alandile pa kumwafwa? Bushe alikalipiile Yobo nelyo bushe amwebele ukuti pali ifyabipa ifyo acitile ifyalengele ukuti alecula? Bushe Elihu alemona ukuti ali umulungami ukucila Yobo? Awe te fyo aletontonkanya! Umupashi wa mushilo walengele Elihu alande ati: “Ine ndi nga iwe kuli Lesa wa cine; kwi loba e ko na ine nabumbilwe.” Lyena amukoseleshe no kuti: “Umwenso wandi tawakutiinye, kabili ukutitikisha kwandi takwafinine pali iwe.” (Yobo 33:6, 7) Mu nshita ya kulenga Yobo ukumfwilako ububi pa fyamucitikiile, Elihu alimulungike kabili alimukoseleshe.

Ici e calengele na ifwe tulembe ino broshuwa. Twabalile twakutika sana no kutontonkanya pa fyalandile bamo abafumine mu cilonganino ca kwa Lesa e lyo ne fya bacitikiile. (Amapinda 18:13). Lyena twalibelengele Amalembo no kutontonkanyapo sana pa malyashi ayalanda pa fyo Yehova ayafwile ababomfi bakwe aba ku kale abali na mafya ayo bamo bakwatako muno nshiku. E ico muli ino broshuwa muli amalyashi ya mu Baibolo ayalanda pa mafya ayo abantu ba ku kale balekwata e lyo na pa mafya abantu ba muno nshiku bakwata. Tulemukoselesha ukubelenga ino broshuwa. Twalimutemwa sana.

Ibumba Litungulula Ilya Nte sha kwa Yehova