Lesa alyeba abantu balekanalekana ukulalanda nankwe mwi pepo pa kuti bapalame kuli ena. (Amalumbo 65:2) Lelo, takutika ku mapepo yonse. Ku ca kumwenako, umuntu uucusha umukashi wakwe nangu apepe shani Lesa takutika. (1 Petro 3:7) Na kabili, ilyo abena Israele batwalilile ukucita ifyabipa, Lesa talekutika ku mapepo yabo. Kanshi ipepo lyalicindama sana. Na lyo line, abantu abacita imembu ishabipisha nga balapila, Lesa alakutika ku mapepo yabo.—Belengeni Esaya 1:15; 55:7.

Tambeni vidio ileti: Bushe Lesa Alakutika ku Mapepo Yonse?

Tulingile ukupepa fye kuli Yehova, pantu e watubumbile kabili e Lesa wa cine. (Mateo 4:10; 6:9) Na kabili, apo tuli babembu, tufwile ukupepela mwi shina lya kwa Yesu pantu alitufwilile pa kuti atulubule ku membu. (Yohane 14:6) Yehova tafwaya ukuti tulepepa amapepo ya kuswatila nelyo ayo balembela limo. Afwaya tulepepa ukufuma pa nshi ya mutima.—Belengeni Mateo 6:7; Abena Filipi 4:6, 7.

Kabumba wesu alakutika na ku mapepo ya mu mutima. (1 Samwele 1:12, 13) Afwaya tulepepa kuli ena pa nshita iili yonse, pamo nga ilyo twashibuka, ilyo tuleya mu kulaala, pa kulya, na lintu twaba na mafya.—Belengeni Amalumbo 55:22; Mateo 15:36.

Ukupalama kuli Lesa takwa-anguka pantu twikala na bantu abashatetekela Lesa kabili abatila filya Lesa alaya ukuti pa calo pakaba umutende tafyakacitike. (2 Timote 3:1, 4; 2 Petro 3:3, 13) Kanshi tulakabila Abena Kristu banensu pa kuti tulekoseleshanya.—Belengeni AbaHebere 10:24, 25.

 Ukulasangwa na bantu abatemwa Lesa kulalenga twapalama kuli ena. Nga tulesangwa ku kulongana kwa Nte sha kwa Yehova, icitetekelo cesu cikakosa ilyo tulemona ifyo icitetekelo ca bambi cakosa.—Belengeni Abena Roma 1:11, 12.

Kuti mwapalama kuli Yehova nga muletontonkanya sana pa fyo musambilila mu Cebo cakwe. Muletontonkanya pa fyo aacita, pa fyo atusambilisha, na pa fyo atulaya. Nga tulepapa kuli Lesa no kulatontonkanya pa milimo yakwe e lyo tukeshiba bwino bwino ifyo Lesa atutemwa na mano akwata.—Belengeni Yoshua 1:8; Amalumbo 1:1-3.

Kuti mwapalama fye kuli Lesa nga mwamutetekela. Icitetekelo caba kwati cimenwa ico tulingile ukubikako amano. Kanshi nga muletontonkanya pa fyo mwasuminamo na pa mulandu mwasuminina muli ifyo fintu, ninshi mulebika amano ku citetekelo cenu.—Belengeni Mateo 4:4; AbaHebere 11:1, 6.

Yehova alibika sana amano ku bantu abamutemwa. Kuti abacingilila kuli fyonse ifingonaula icitetekelo cabo ne subilo lya kwikala umuyayaya. (Amalumbo 91:1, 2, 7-10) Alatusoka ukutaluka ku fingonaula ubumi bwesu ne fingalenga twiba ne nsansa. Yehova e utusambilisha imikalile iisuma.—Belengeni Amalumbo 73:27, 28; Yakobo 4:4, 8.