ISAMBILILO 7
Bushe Mwalibwishiba Ubufumu bwa kwa Lesa?
1. Bushe mwalibwishiba Ubufumu bwa kwa Lesa?
Finshi fyalenga Yesu ukuba Imfumu yafikapo?—MARKO 1:40-42.
Ubufumu bwa kwa Lesa buteko ubwaba ku muulu. E bukatendeka ukuteka icalo conse kabili bukalenga ifyo Lesa afwaya fikacitike mu muulu na pano calo. Iyi ni mbila nsuma! Nomba line Ubufumu bwa kwa Lesa buli no kucitila abantu ifyo bakabila. Bukalenga abantu bonse ukwikatana.—Belengeni Daniele 2:44; Mateo 6:9, 10; 24:14.
Mu bufumu bonse mulaba imfumu. Yehova asala Umwana wakwe, Yesu Kristu, ukuba Imfumu ya Bufumu bwakwe.—Belengeni Ukusokolola 11:15.
Tambeni vidio ileti: Bushe Ubufumu bwa kwa Lesa ni Cinshi?
2. Mulandu nshi Yesu alingila ukuba Imfumu?
Umwana wa kwa Lesa alilinga ukuba Imfumu pantu wa cikuuku, kabili alitemwa ifyalungama. (Mateo 11:28-30) E lyo alikwata na maka aya kwafwa abantu pantu akaba kulya kwine ku muulu ilyo akalateka icalo. Ilyo bamubuushishe, aile ku muulu no kwikala ku kwa kulyo kwa kwa Yehova alelolela ukuti bakamupeele amaka. (AbaHebere 10:12, 13) Awe Lesa asukile amupeela amaka aya kutendeka ukuteka.—Belengeni Daniele 7:13, 14.
3. Ni bani abakalateka pamo na Yesu?
Ibumba lya bantu abetwa ati “abantu ba mushilo” bakalateka pamo na Yesu kabili nabo bakalaikala ku muulu. (Daniele 7:27) Abo babalilepo ukusala pa bantu ba mushilo, batumwa ba kwa Yesu abali ne cishinka kuli ena. Ukufika na ino nshita Yehova alitwalilila ukusala abaume na banakashi aba cishinka aba kuba mwi bumba lya bantu aba mushilo. Nga filya cali kuli Yesu, nabo bababuusha no mubili uwa ku muulu.—Belengeni Yohane 14:1-3; 1 Abena Korinti 15:42-44.
Bantu banga abakaya ku muulu? Yesu abetile ukuti “umukuni unono.” (Luka 12:32) Bonse pamo bakaba 144,000. Bakalateka icalo pamo na Yesu.—Belengeni Ukusokolola 14:1.
4. Cinshi cacitike ilyo Yesu atendeke ukuteka?
Ubufumu bwa kwa Lesa bwatampile ukuteka mu 1914. * Ilyo Yesu atendeke ukuteka, ico abalilepo ukucita kupoosa Satana ne fibanda pano calo. Satana alikalipe no kuleta icimfulunganya pa calo. (Ukusokolola 12:7-10, 12) Ukutula lilya, ifyabipa ificitikila abantu fyalifula. Inkondo, ifipowe, ifikuko, ne finkukuma fyonse fyaba mu “cishibilo” icilanga ukuti Ubufumu bwa kwa Lesa buli mupepi kabili bukapwisha ifyabipa pa calo.—Belengeni Luka 21:7, 10, 11, 31.
5. Finshi Ubufumu bwa kwa Lesa bulecita pali ino nshita?
Ukupitila mu mulimo wa kushimikila, Ubufumu bwa kwa Lesa bulelenga ibumba likalamba ilya bantu abafuma mu fyalo fyalekanalekana ukuba abaikatana. Abantu abafuuka abengi nga nshi balesanguka abatekwa ba kwa Yesu. Ubufumu bwa kwa Lesa bukabacingilila ilyo bukonaula abantu babipa pano calo. Kanshi bonse abafwaya ifisuma ifyo Ubufumu bwa kwa Lesa bukacita bafwile ukulanakila Yesu.—Belengeni Ukusokolola 7:9, 14, 16, 17.
Mu myaka 1,000, ubu Ubufumu bukalenga filya Lesa alefwaya abantu baleikala fikacitike. Icalo conse cikaba paradaise. Kabili ifi nga fyacitika, Yesu akalubwila Ubufumu kuli Wishi. (1 Abena Korinti 15:24-26) Bushe kuliko abo mwingafwaya ukushimikilako pa Bufumu bwa kwa Lesa?—Belengeni Amalumbo 37:10, 11, 29.
^ para. 6 Nga mulefwaya ukwishibilapo na fimbi pa fyo Baibolo yasobele pa mwaka wa 1914, belengeni amabula 215-218 mu citabo citila Bushe Cinshi Baibolo Isambilisha?
