1. Mipepele nshi imo iyaba mu Afrika?

ABANTU abengi mu Afrika balasumina ukuti calicindama ukupepa Lesa. Lelo, balapusana mu fyo basumina ukuti e nshila ya kumupepelamo. Bamo bapepela mu fikuulwa fya mipepele ifya bashilamu, kabili bambi nabo baya ku fifulo fya cishilano. Bambi nabo baya ku macalici. Lelo kuti cabipa ukutontonkanya ukuti kwaba fye imipepele itatu mu Afrika. Abashilamu baba na mafunde ne fisumino ifyalekanalekana. Imipepele ya cishilano yalipusana nga nshi ukulingana ne cifulo muliko. Pa macalici yaitunga ukuba aya Bwina Kristu, paba ubupusano ubukalamba nga nshi. Ukulunda pa macalici yakalamba, kwaba na macalici yambi ayengi mu Afrika monse.

2. (a) Cinshi ilingi cilenga umuntu ukupepa uko apepa? (b) Finshi fishilanga ukuti imipepele yesu ilatemuna Lesa?

² Mulandu nshi abantu bapepela mu musango bapepelamo? Abantu abengi bakonka imipepele ya bafyashi babo. Ifintu fyacitika kale na fyo filakuma imipepele ya lelo. Icitabo ca The Africans—A Triple Heritage citila: “Ubushilamu bwalyanene ku kapinda ka ku kuso aka Sahara pa mulandu wa kucimfya kwa fyalo fya bashilamu, . . . UbuKristu bwasalanganine ku kapinda ka ku kulyo aka Sahara mu nshila imo ine. Ilyo ubushilamu bwasalanganine ku kapinda ka ku kuso aka Sahara pa mulandu wa kutiinya  abantu ukubepaya na bapanga nga bakaana ubushilamu, e fyo na ku kapinda ka ku kulyo aka Sahara ubuKristu bwayanene pa kutiinya abantu ukubepaya ne mfuti nga bakaana ubuKristu.” Lelo, fwe bengi twasumina ukuti imipepele yesu ilatemuna Lesa. Lelo imipepele taiba iya cine pantu fye abafyashi besu e ko balepepa nelyo uluko lumo ulwa maka lwapatikishe ifikolwe fyesu ukupepako.

3-5. Cilangililo nshi ciletwaafwa ukumona ukutila te mipepele yonse isambilisha icine?

³ Nangu imipepele yonse itunga ukuti ilatungulula bwino mu kubombela Lesa, ifyo basambilisha fyalipusana. Basambilisha ifintu fyalekanalekana ifingi pali Lesa ne fyo afwaya ifwe ukucita. Tontonkanyeni pali ici: Tutile mwaingile ncito ku kampani kakalamba. Pa bushiku bwa kubalilapo, mwaishiba ukuti umukalamba wa ncito ali pa cuti. E ico mwaipusha ababomfi batatu ico mufwile ukucita. Umubomfi wa kubalilapo atila umukalamba wa ncito alefwaya ukuti mupyange. Uwa bubili atila mufwile ukupenta icikuulwa. Uwa butatu atila muletwala amakalata.

⁴ Lyene, mwaipusha abo babomfi ukumweba ifyo umukalamba wa ncito aba. Uwa kubalilapo atila umukalamba wa ncito mutali, mulumendo, kabili wa culukusu. Uwa cibili atila umukalamba wa ncito mwipi, mukote kabili wa cikuuku. Uwa butatu amweba ukutila awe, umukalamba wa ncito te mwaume—mwanakashi. Kwena, nalimo kuti mwatila bonse ababomfi batatu tabalelanda icine. Nga mulefwaya ukutwalilila ukubomba incito ipya musangile, kuti mwafwailisha pa kuti mwishibe untu umukalamba wa ncito cine cine aba kabili ne fyo alefwaya imwe ukucita.

⁵ E fyo caba na ku mipepele. Apo kwaba amasabilisho ayengi pa fyo Lesa aba ne fyo afwaya ifwe ukucita, tufwile ukushininkisha ukuti imipepele yesu ileumfwana ne cine. Lelo kuti twasambilila shani icine pali Lesa?