ISAMBILILO 21
Ni Bani Babila Imbila Nsuma?
Nomba line Yehova ali no kubomfya Ubufumu bwakwe ukupwisha amafya yonse ayo abantunse bakwata. Iyi ni mbila iisuma iyo abantu bonse balingile ukumfwa. Yesu alefwaya abasambi bakwe ukulaebako abantu iyi imbila nsuma! (Mateo 28:19, 20) Bushe Inte sha kwa Yehova bakonka shani ifyo Yesu alandile?
1. Bushe ilembo lya kwa Mateo 24:14 lilefikilishiwa shani muno nshiku?
Yesu alandile ukuti: “Imbila nsuma iyi iya bufumu ikabilwa ku bantu bonse aba pe sonde.” (Mateo 24:14) Fwe Nte sha kwa Yehova tulatemwa ukubombako uyu mulimo uwacindama. Tulabila imbila nsuma mwi sonde lyonse mu ndimi ukucila pali 1,000! Pa kubomba uyu mulimo uukalamba nga nshi, tulakabila ukubombesha no kuba abateyanishiwa bwino. Nomba te kuti tubombe uyu mulimo ku maka yesu. Tulakabila Yehova ukutwafwa.
2. Finshi tucita pa kuti tulebila imbila nsuma ku bantu?
Tulabila imbila nsuma konse uko twasanga abantu. Nga filya Abena Kristu mu nshiku sha batumwa balecita, na ifwe tulabila imbila nsuma “ku ng’anda ne ng’anda.” (Imilimo 5:42) Ukubila imbila nsuma ku ng’anda ne ng’anda kulalenga tulelanshanya na bantu abengi nga nshi cila mwaka. Apo inshita shimo abantu tabasangwa pa mayanda, tulabila imbila nsuma na ku cintubwingi. Lyonse nga twakwata ishuko lya kuba pamo na bantu, tulafwaya ukubebako pali Yehova na pa fyo afwaya ukucitila abantu.
3. Ni bani balingile ukulabila imbila nsuma?
Abena Kristu ba cine bonse balingile ukulaebako abantu imbila nsuma. Twalicindika sana uyu mulimo tubomba. Tulabila imbila nsuma apapela amaka yesu, pantu twalishiba ukuti ikalenga abantu bakesepusuka. (Belengeni 1 Timote 4:16.) Tabatulipila pa kubomba uyu mulimo, pantu Baibolo itila: “Mwapeelwe fye ubupe, na imwe mulepeela fye.” (Mateo 10:7, 8) Na lintu abantu bashilefwaya ukukutika kuli ifwe, tatuleka ukubila imbila nsuma. Pantu nga tatulekele ninshi tuleumfwila Yehova kabili tulalenga alasekelela.
SAMBILILENI NA FIMBI
Sambilileni na fimbi pa fyo Inte sha kwa Yehova babomba umulimo wa kubila imbila nsuma mwi sonde lyonse, e lyo ne fyo Yehova abafwa.
Balebila imbila nsuma mwi sonde lyonse: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Tulabombesha pa kuti tubile imbila nsuma ku bantu bonse
Inte sha kwa Yehova balesha na maka ukubila imbila nsuma konse uko bengasanga abantu. Tambeni VIDIO, lyena lanshanyeni icipusho cakonkapo.
-
Finshi mwatemwa pa fyo Inte sha kwa Yehova babombesha ukubila imbila nsuma?
Belengeni Mateo 22:39 na Abena Roma 10:13-15, lyena lanshanyeni aya mepusho:
-
Bushe umulimo wa kubila imbila nsuma ulanga shani ukuti twalitemwa abantu?
-
Bushe Yehova amona shani ababila imbila nsuma?—Moneni icikomo 15.
5. Tubombela pamo na Lesa
Ificitika filanga ukuti Yehova e utungulula umulimo wesu uwa kubila imbila nsuma. Ku ca kumwenako, ilyo munyinefwe Paul uwa ku New Zealand alebila imbila nsuma ku ng’anda ne ng’anda mu nshita ya kasuba, alisangile umwanakashi umo. Pali bulya bwine ubushiku ulucelo, ulya umwanakashi alipepele kuli Lesa ukubomfya ishina lyakwe ilya kuti Yehova, ukuti atume uwa kuyamusambilishako Baibolo. Ba Paul balandile ukuti: “Ilyo papitile fye ama-awala yatatu, nalifikile pa ng’anda ya ulya mwanakashi.”
Belengeni 1 Abena Korinti 3:9, lyena lanshanyeni ici cipusho:
-
Bushe ificitika, pamo nge fyacitike kuli munyinefwe wa ku New Zealand, filanga shani ukuti Yehova e utungulula umulimo wa kubila imbila nsuma?
Belengeni Imilimo 1:8, lyena lanshanyeni ici cipusho:
-
Mulandu nshi tukabila ukuti Yehova aletwafwa ilyo tulebila imbila nsuma?
Bushe mwalishiba ici cishinka?
Cila mulungu pa kulongana kwa Mikalile, tulasambilila ifingatwafwa ukulabila bwino imbila nsuma. Nga mwalisangwako kuli uku kulongana, finshi mwatemenwe pa fyo balesambilisha pa fya kubila imbila nsuma?
6. Tulakonka ifunde lya kwa Lesa ilya kubila imbila nsuma
Mu nshiku sha batumwa, kwali abalelesha abasambi ba kwa Yesu ukubila imbila nsuma. Abena Kristu abaliko mu nshiku sha batumwa, balicingilile insambu bakwete isha kushimikila abantu ilyo ‘bakoseshe imbila nsuma ukulingana ne funde.’ (Abena Filipi 1:7) Ifi fine e fyo ne Nte sha kwa Yehova bacita muno nshiku. a
Belengeni Imilimo 5:27-42, lyena lanshanyeni ici cipusho:
-
Mulandu nshi tushakalekele ukubila imbila nsuma?—Moneni ifikomo 29, 38, na 39.
BAMO KUTI BAIPUSHA ABATI: “Cinshi Inte sha kwa Yehova babilila imbila nsuma ku ng’anda ne ng’anda?”
-
Kuti mwabasuka shani?
IFYO MUSAMBILILE
Yesu aebele abasambi bakwe ukubila imbila nsuma ku bantu bonse aba pe sonde. Kabili Yehova alafwa ababomfi bakwe ukubomba uyu mulimo.
Ukupitulukamo
-
Ni bani babila imbila nsuma mwi sonde lyonse?
-
Bushe umulimo wa kubila imbila nsuma ulanga shani ukuti twalitemwa abantu?
-
Bushe mulemona ukuti ukubila imbila nsuma kuti kwalenga twaba ne nsansa? Cinshi mwalandile ifyo?
ISHIBILENIPO NA FIMBI
Moneni ifyo Inte sha kwa Yehova babila imbila nsuma mu misumba iikalamba.
Bushe Inte sha kwa Yehova babila shani imbila nsuma ku mbutushi?
Umfweni ifyo umo alondolwele ifyo ukubila imbila nsuma lyonse kwalenga aba ne nsansa.
Moneni ifyo imilandu twacimfishe mu cilye yalenga umulimo wa kubila imbila nsuma wailako pa ntanshi.
a Lesa e watweba ukuti tulebila imbila nsuma. E ico Inte sha kwa Yehova tabakabila ukupoka ulusa ku balashi ba buteko ukuti balebila imbila nsuma.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
