ISAMBILILO 44
Bushe Lesa Amona Ukusefya Konse Ukuti Kwaliba Fye Bwino?
Yehova afwaya tuleba ne nsansa e lyo no kwangalilako pamo na banensu inshita shimo. Lelo bushe amona ukuti ukusefya konse na maholide fyaliba fye bwino? Kuti twalanga shani ukuti twalitemwa Yehova ilyo tulesefya nelyo ilyo tulesala amaholide ayo twingasefyako?
1. Cinshi Yehova apatila ukusefya ukwingi?
Nalimo kuti mwapapa nga mwaishiba ukuti ukusefya ukwingi takumfwana ne fyo Baibolo isambilisha nelyo nga mwaishiba ukuti kwafuma ku mipepele ya bufi. Muli uku kusefya nalimo kuti mwaba ukumfwana ne fibanda, nelyo ukucita ifingalanga ukuti icisambilisho ca kuti umweo taufwa ca cine. Ukusefya kumo kwafuma ku kupupa imipashi nelyo ku kusumina ukuti kwaliba lesa we shuko. (Esaya 65:11) E mulandu wine Yehova asokela abamupepa ukuti: “Fumenimo muli bena . . . kabili mwi-ikatako ku cishasanguluka.”—2 Abena Korinti 6:17. a
2. Bushe Yehova omfwa shani pa kusefya umo abantu bapeela abantu banabo umucinshi bashilingile ukubapeela?
Yehova alatusoka ukuti tatulingile ‘ukutetekela abantunse.’ (Belengeni Yeremia 17:5.) Mu kusefya kumo abantu balacindikisha sana bakateka nelyo abashilika. E lyo mu kusefya kumbi balacindikisha ifishibilo fya calo nelyo ukusefya ubushiku icalo capokele ubuntungwa. (1 Yohane 5:21) Pa kusefya kumbi nako, abantu balacindikisha utubungwe twa fikansa fya calo nelyo utubungwe utwafwilisha abantu mu mikalile. Bushe Yehova kuti aumfwa shani nga tulecindikisha umuntu nelyo akabungwe, maka maka umuntu nelyo akabungwe akacita ifyapusana no bufwayo bwa kwa Lesa?
3. Mibele nshi iilenga Yehova apate ukusefya kumo?
Baibolo yalikaanya “ukunwensha umwangashi, . . . ukuwowota, [no] kukolwakolwa.” (1 Petro 4:3) Pa kusefya kumo abantu tabailama kabili balacita ifintu ifyabipa. Pa kuti tutwalilile ukuba ifibusa fya kwa Yehova, tatulingile ukulasangwa ku kusefya uko abantu bacita ifyabipa.
SAMBILILENI NA FIMBI
Sambilileni ifyo mwingacita pa kuti mulesala bwino amaholide ayo mwingasefyako nelyo ukusefya uko mwingasangwako, pa kuti mulelenga Yehova ukusekelela.
4. Mwilasangwa ku kusefya ukushilenga Yehova acindikwa
Belengeni Abena Efese 5:10, lyena lanshanyeni aya mepusho:
-
Finshi tulingile ukutontonkanyapo nga tulefwaya ukwishiba nampo nga kuti twasefyako holide nelyo iyo?
-
Maholide nshi ayaseeka uko mwikala?
-
Bushe mulemona ukuti Yehova alitemwa aya amaholide?
Ku ca kumwenako, bushe mwalitontonkanyapo ifyo Yehova amona ukusefya inshiku sha kufyalwa? Baibolo tayalandapo ukuti ababomfi ba kwa Yehova balesefya inshiku sha kufyalwa, lelo yalanda fye pa bantu babili abashalebombela Yehova abasefeshe inshiku sha kufyalwa. Belengeni Ukutendeka 40:20-22 na Mateo 14:6-10. Lyena lanshanyeni aya mepusho:
-
Finshi ifyacitike ifyapalana, ilyo aba babili abo Baibolo yalandapo basefeshe inshiku sha kufyalwa?
-
Ukulingana na ya malembo twabelenga, bushe mulemona ukutila Yehova amona shani ukusefya inshiku sha kufyalwa?
Nalimo kuti mwayipusha amuti, ‘Bushe Yehova alabikako amano nga nasefyako ubushiku bwa kufyalwa nelyo ukusefya kumbi ukwapusana ne fyo Baibolo ilanda?’ Belengeni Ukufuma 32:1-8. Lyena tambeni VIDIO no kulanshanya amepusho yakonkapo.
-
Mulandu nshi tulingile ukubikilako sana amano ku kumona nga ca kuti ifyo tulefwaya ukucita kuti fyalenga Yehova alesekelela?
-
Kuti twacita shani pa kuti tatucitile ifingafulwisha Yehova?
Ifyo twingeshiba nga ca kuti ukusefya kuti kwafulwisha Lesa
-
Bushe uku ukusefya kulomfwana ne fyo Baibolo isambilisha? Pa kuti mwishibe nga kulomfwana ne fyo Baibolo isambilisha, mufwile ukwishiba ifyo uko ukusefya kwatendeke.
-
Bushe uku ukusefya kuti kwalenga twalacindikisha abantunse, utubungwe nelyo ifishibilo fya calo? Tucindikisha Yehova ukucila icintu nelyo umuntu uuli onse, kabili twacetekela ukuti Yehova e ukapwisha fye amafya yonse ayo fwe bantunse tukwata.
-
Bushe ifyo abantu bacita pali uku kusefya fyalipusana ne fyo Baibolo ilanda? Tatulingile ukulacita ifyo Yehova apata.
5. Muleba no mucinshi ilyo mulelondolwela abantu ico mushilesefeshako holide
Kuti camukosela ukukaana nga ca kuti abantu balemupatikisha ukusangwa ku kusefya ukushilenga Yehova acindikwa. Mufwile ukuba abatekanya ilyo mulebalondolwela kabili tamufwile ukubakalifya. Pa kuti mwishibe fimo ifyo mwingacita, tambeni VIDIO.
Belengeni Mateo 7:12, lyena lanshanyeni aya mepusho:
-
Ukulingana ne li lembo, bushe mufwile ukupatikisha balupwa lwenu abashili ba Nte ukukanasefyako holide?
-
Finshi nalimo mwingacita pa kuti mulange balupwa lwenu ukuti mwalibatemwa kabili mwalibabikako amano, nangu ca kuti tamusefyako amaholide ayo basefya?
6. Yehova afwaya tuleba ne nsansa
Yehova afwaya tulesansamukila capamo na balupwa ne fibusa. Belengeni Lukala Milandu 8:15, lyena lanshanyeni ici cipusho:
-
Bushe ili lembo lilanga shani ukuti Yehova afwaya tuleba ne nsansa?
Yehova afwaya abantu bakwe balesansamukila capamo. Tambeni VIDIO pa kuti mumone ifyo ababomfi bakwe basansamukila capamo pa kulongana kwa citungu ukwa bafuma mu fyalo ifingi.
Belengeni Abena Galatia 6:10, lyena lanshanyeni aya mepusho:
-
Bushe pa kuti “tucite ifisuma kuli bonse” kano fye tulesefyako amaholide ayo abengi basefya?
-
Ni cisa mwingatemwapo, ukupeela umuntu ubupe pa mulandu fye wa kuti e fyo abantu bacita pa kusefya holide nelyo ukupeela umuntu ubupe ukufuma panshi ya mutima wenu?
-
Ba Nte abengi inshita shimo balapekanya fimo pa kuti basansamukile capamo na bana babo, kabili limo balabapeelako fye ne fya bupe. Nga ca kuti mwalikwata abana, finshi fimo ifyo mwingacita pa kuti musansamukile capamo nabo?
ABANTU BAMO BATILA: “Ukwishiba ifyo holide yatendeke takwacindama. Icacindama kusansamukila pamo na balupwa ne fibusa.”
-
Inga imwe muletipo shani?
IFYO MUSAMBILILE
Yehova afwaya tulesansamukila capamo na balupwa ne fibusa. Lelo tafwaya tulesangwa ku kusefya ukushilenga acindikwa.
Ukupitulukamo
-
Mepusho nshi twingaipusha pa kuti twishibe nga ca kuti ukusefya ukuliko kuti kwafulwisha Yehova nelyo iyo?
-
Kuti twacita shani pa kuti tulenge balupwa ne fibusa beshibe ico tushilesefeshako holide?
-
Mwaishiba shani ukuti Yehova alafwaya tuleba ne nsansa?
ISHIBILENIPO NA FIMBI
Moneni amaholide yamo ayo Abena Kristu bashisefyako.
“Mulandu Nshi Inte sha kwa Yehova Bashisefeshako Amaholide Yamo?” (Icipande ca pa jw.org)
Belengeni ifintu 4 ifyalenga tusumine ukuti ukusefya inshiku sha kufyalwa kulafulwisha Lesa.
“Mulandu Nshi Inte sha kwa Yehova Bashisefeshako Inshiku sha Kufyalwa?” (Icipande ca pa jw.org)
Moneni ifyo uwacaice umo acitile ifishakalifye abanankwe ku sukulu abalemupumya pa mulandu wa kuti tasefyako Krisimasi.
Abena Kristu abengi nga nshi balisalapo ukukanalasefyako Krisimasi. Bushe bomfwa shani pa fyo basalapo?
“Balisanga Icacila Pali Krisimasi” (Ulupungu lwa kwa Kalinda, December 1, 2012)
a Moneni Ifyebo na Fimbi pa 5 ifingamwafwa ukwishiba nga mulingile ukusefyako amaholide nelyo iyo.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
