Bonse fye kwaliba ifyo tufwaya ukulafwala e lyo ne fyo tufwaya ukulaiyemfya. Nga twakonka amashinte ya mafunde ya mu Baibolo, tatwakulafwala ifya kufwala pa mulandu fye wa kuti twalifitemwa. Lelo twakulafwala ifya kulalenga Yehova alesekelela. Natulandeko pa mashinte ya mu Baibolo yamo.

1. Mashinte nshi aya mafunde ya mu Baibolo ayengatwafwa ukulasala bwino ifya kufwala ne fyo tufwile ukuiyemfya?

Tufwile ukulasala ifya kufwala “ifyalinga kabili ifya mucinshi,” kabili tufwile ukutwalilila ukuba aba busaka pa kulangilila ukuti ‘tulatiina Lesa.’ (1 Timote 2:9, 10) Tontonkanyeni pali aya mashinte ya mafunde 4: (1) ‘Ukulafwala bwino.’ Nalimo mwalimona ukuti abantu ba kwa Lesa nga bali pa kulongana balafwala ifya kufwala ifyalekanalekana, lelo ifyo bafwala, ifyo babeya umushishi, ifyo basaakula e lyo ne fyo baluka umushishi filanga ukuti balicindika Lesa bapepa. (2) Ukufwala “ifyalinga,” e kutila ukufwala ifya kufwala ifishingalenga abantu balatontonkanya pa kucita ubulalelale, nelyo babika sana amano kuli ifwe. (3) Ukufwala “ifya mucinshi.” Kuti tulefwala ifya mucinshi nga ca kuti tatulefwala fashoni yonse fye iya fya kufwala iyafuma, nangu ca kuti ifyo ifya kufwala te fya mucinshi. (4) Imimonekele yesu ifwile ukulanga ukuti twaliba na katiina kuli Lesa, kabili ifwile ukulenga abantu baishiba ukuti tupepa Lesa wa cine.—1 Abena Korinti 10:31.

2. Cinshi tufwile ukutontonkanishisha pali bamunyinefwe na bankashi ilyo tulesala ifyo tufwile ukufwala?

Nangu ca kuti twalikwata insambu sha kusala ifyo tulefwaya ukufwala, tufwile ukutontonkanya pa fyo imimonekele yesu yalakuma bamunyinefwe na bankashi. Tulesha na maka ukukanapunwisha umuntu nangu umo, pantu “tufwile ukucitila abanensu ifingabakuula.”—Belengeni Abena Roma 15:1, 2.

3. Bushe ifyo tufwala ne fyo tuiyemfya kuti fyalenga shani abantu balafwaya ukusambilila pali Yehova?

Nangu ca kuti lyonse tulafwaya ukufwala bwino, tulabikako sana amano ku fyo twalafwala ilyo tuleya mu kulongana na lintu tuleya mu kubila imbila nsuma. Tatufwaya abantu bakaana ukukutika imbila nsuma pa mulandu ne fyo tufwele. Lelo tufwaya ukuti imimonekele yesu ilelenga abantu balafwaya ukusambilila icine, no ‘kuyemfya isambilisho lya kwa Lesa, Umupusushi wesu.’—Tito 2:10.

 SAMBILILENI NA FIMBI

4. Nga ca kuti imimonekele yesu ili iisuma, tukalanga ukuti twalicindika Yehova

Cinshi icacindama sana icifwile ukulenga tulebika amano ku fyo tumoneka? Belengeni Amalumbo 47:2, lyena lanshanyeni aya mepusho:

• Bushe ukulaibukisha ukuti twimininako Yehova kufwile ukulenga twalafwala shani?

• Bushe mulemona ukuti caliba fye bwino ukubika amano ku fyo twalafwala ilyo tuleya mu kulongana na lintu tuleya mu kubila imbila nsuma? Cinshi mwalandila ifyo?

 5. Ifingatwafwa ukusala bwino ifyo tulingile ukufwala ne fyo tulingile ukuiyemfya

Tambeni VIDIO.

Nampo nga ifya kufwala fyesu fya mutengo nelyo iyo, fifwile ukuba ifya busaka kabili ifyalinga ukulingana ne fyo tulecita. Belengeni 1 Abena Korinti 10:24 na 1 Timote 2:9, 10. Lyena lanshanyeni ico tushilingile ukufwalila ifya kufwala . . .

• ifingalenga twamoneka abasanku nelyo abailekelesha.

• ifyapapatila, ifyabengela, nelyo ifingalenga umuntu atendeka ukutontonkanya pa kucita ubulalelale.

Nangu ca kuti fwe Bena Kristu tatukonka amafunde ya kwa Mose, yalatwafwa ukwishiba ifyo Yehova atontonkanya. Belengeni Amalango 22:5, lyena lanshanyeni ici cipusho:

• Cinshi tushilingile ukufwalila ifya kufwala ifilenga abaume balamoneka kwati banakashi nelyo abanakashi balamoneka kwati baume, nelyo ukuiyemfya ica kuti nga tuli baume twalamoneka kwati tuli banakashi nelyo nga tuli banakashi twalamoneka kwati tuli baume?

Belengeni 1 Abena Korinti 10:32, 33 na 1 Yohane 2:15, 16, lyena lanshanyeni aya mepusho:

• Mulandu nshi tushifwile ukusuulilako fye nga twaishiba ukuti, ifyo tufwala filapunwisha abantu ku ncende twikala nelyo mu cilonganino?

• Fya kufwala fya musango nshi ifyo abantu abengi batemwa ukufwala ku ncende mwikala, kabili finshi bacita pa kuiyemfya?

• Bushe kuli fimo ifyo bafwala nelyo ifyo baiyemfya ifyo mulemona ukuti Umwina Kristu talingile ukucita? Cinshi mwa-asukila ifyo?

 IFYO MUSAMBILILE

Nga tulesala bwino ifya kufwala ne fyo tuiyemfya, ninshi tulelanga ukuti twalicindika Yehova na bantu.

Ukupitulukamo

• Mulandu nshi Yehova abikila amano ku fyo tufwala na ku fyo tuiyemfya?

• Mashinte nshi yamo ayengatwafwa ukusala bwino ifyo tulingile ukufwala ne fyo tufwile ukuiyemfya?

• Bushe imimonekele yesu kuti yalenga abantu balamona shani ukupepa kwa cine?