Lesa afwaya ukuti mube cibusa wakwe. Bushe mwalitala amutontonkanyapo ukuti kuti mwaba cibusa wa Muntu wa maka yonse mu muulu na pano isonde? Abrahamu, umuntu wa pa kale, aitilwe cibusa wa kwa Lesa. (Yakobo 2:23) Na bambi abalumbulwa mu Baibolo bali ifibusa fya kwa Lesa kabili alibapaalile nga nshi. Ilelo, abantu konse konse mwi sonde baliba ifibusa fya kwa Lesa. Na imwe bene kuti mwaba cibusa wa kwa Lesa.

Ukuba cibusa wa kwa Lesa kwaliwama ukucila ukuba cibusa wa muntunse. Lesa talekelesha fibusa fyakwe ifya cishinka. (Amalumbo 18:25) Ukuba cibusa wa kwa Lesa kwacila pa kukwata ifyuma. Lintu umukankaala afwa, indalama shakwe shiya ku bantu bambi. Lelo ifibusa fya kwa Lesa fyalikwate cuma ico umuntu nangu umo ashingapokolola.—Mateo 6:19.

Abantu bamo kuti baesha ukumukaanya ukusambilila pa lwa kwa Lesa. Ifibusa fyenu na balupwa kuti bamukaanya. (Mateo 10:36, 37) Nga bambi balemuseka nelyo balemutiinya, iipusheni amuti, ‘Ni bani ndefwaya ukusekesha? Bushe bantunse nelyo ni Lesa?’ Tontonkanyeni pali ci: Nga umuntu amweba ukuleka ukulya, bushe kuti mwamumfwila? Te kuti mucite co! Pa kuba abomi, mukabila ifya kulya. Lesa ena kuti amulenga ukwikala abomi ku ciyayaya! E co mwileka umuntu nangu umo amukaanye ukusambilila fintu mwingaba cibusa wa kwa Lesa.—Yohane 17:3.