Ukuba cibusa wa kwa Lesa e cintu cawamisha kuli imwe. Lesa akamusambilisha ifya kuba ne nsansa no kwikala ku matwi tondolo; kabili akamufumya ku fisumino fya bufi ifingi ne misango iingamuletelela. Ilyo mulepepa, akulakutika. Akamwafwa ukuti muleenda ku mutima ukwabuuta no kuba abashipa. (Amalumbo 71:5; 73:28) Lintu mwaba na mafya, Lesa akulamwafwilisha. (Amalumbo 18:18) Kabili Lesa alimutambika ica bupe cakwe ica mweo wa muyayaya.—Abena Roma 6:23.

Ilintu mwapalamina kuli Lesa, mukapalamina na ku fibusa fya kwa Lesa. Na bo bakabe fibusa fyenu. Na kuba, bakaba nga bamunyinenwe ne nkashi. Bakatemwa ukumusambilisha pa lwa kwa Lesa kabili bakamwafwilisha no kumukoselesha.

Tatwalingana na Lesa. Mufwile ukwishiba icishinka icacindama ilyo mulefwaya ukuba cibusa wa kwa Lesa. Ukuba cibusa wa kwa Lesa tacipilibula ukuti twalingana nankwe. Alitucila sana ubukulu, amano na maka. E wakwate nsambu sha kuba Kateka wesu. E co tufwile ukukutika kuli Lesa no kucita ifyo atweba nga tulefwaya ukuba cibusa wakwe. Ni fwebo twakulamwenamo lyonse.—Esaya 48:18.