ISAMBILILO 10
Ifya Kusanga Imipepele ya Cine
Nga mulefwaya ukuba cibusa wa kwa Lesa, mufwile ukuba mu mipepele intu Lesa asuminisha. Yesu atile “bakapepa bene bene” bali no kupepela Lesa mu “cine.” (Yohane 4:23, 24) Kwaba fye inshila imo iya cine iya kupepelamo Lesa. (Abena Efese 4:4-6) Imipepele ya cine itwala ku mweo wa muyayaya, lelo imipepele ya bufi itwala ku boni.—Mateo 7:13, 14.
Kuti mwaishiba imipepele ya cine pa kumona fye ifyaba abantu abapepamo. Apo Yehova musuma, na bamupepa bafwile ukuba abantu abasuma. Filya fine umuti wa macungwa uusuma utwala amacungwa yasuma, e fintu ne mipepele ya cine ilenga abapepako ukuba abantu basuma.—Mateo 7:15-20.
Ifibusa fya kwa Yehova fyalicindika sana Baibolo. Fyalishiba ukuti Baibolo yafuma kuli Lesa. Bafwaya ukuti ilebatungulula mu mikalile, mu kupwisha amafya, no kubafwilisha ukusambilila pali Lesa. (2 Timote 3:16) Balatukuta ukucita fintu bashimikila.
Ifibusa fya kwa Yehova fyalitemwana. Yesu alangishe ukuti alitemwa abantu pa kubasambilisha pa lwa kwa Lesa, no kuposha abalwele. Na baba mu mipepele ya cine balitemwa abantu bambi. Tabasuula abapiina nelyo imishobo imbi filya fine Yesu ashasuulile abantu ba musango yo. Yesu asosele ukuti abantu baali no kwishibila abasambi bakwe ukupitila mu kutemwana uko batemwanene.—Yohane 13:35.
Ifibusa fya kwa Lesa filacindika ishina lya kwa Lesa, Yehova. Nga umuntu akaana ukulamwita ishina lyenu, bushe kuti aba cibusa wenu uwa pa mutima? Awe iyo! Nga twalikwata cibusa, tulamwita ishina lyakwe no kushimikilako bambi ukuti aliba bwino. E co abalefwaya ukuba ifibusa fya kwa Lesa bafwile ukulabomfya ishina lyakwe no kushimikilako bambi pa lwa wena. Ifyo e fintu Yehova afwaya tulecita.—Mateo 6:9; Abena Roma 10:13, 14.
Ifibusa fya kwa Lesa filasambilisha abantu pa Bufumu bwa kwa Lesa nge fyalecita Yesu. Ubufumu bwa kwa Lesa buteko bwa ku muulu ubukawamya isonde ukuba paradise. Ifibusa fya kwa Lesa filebako bambi pa lwa iyi mbila nsuma ya Bufumu bwa kwa Lesa.—Mateo 24:14.
Inte sha kwa Yehova shileesha ukuba ifibusa fya kwa Lesa. Shalicindika Baibolo kabili shalitemwana. Shilabomfya ne shina lya kwa Lesa kabili shalilicindika. Shilasambilisha na bantu pa Bufumu bwa kwa Lesa. Inte sha kwa Yehova e baba mu mipepele ya cine mwi sonde lelo.
Nalimo Kuti Mwatemwako ne fi
AMASAMBILISHO YA MU BAIBO AYACINDAMA
Bushe Lesa Alikwata Ishina?
Lesa alikwata amalumbo ayengi pamo nga Uwa Maka Yonse, Kabumba, na Shikulu. Lelo Lesa alikwata ishina ilyo balemba imiku 7,000 mu Baibolo.
AMASAMBILISHO YA MU BAIBO AYACINDAMA
Nani Umwine wa Fyebo Fyaba mu Baibolo?
Bushe ifi abantu e balembele Baibolo, kuti twatila Baibolo “Cebo ca kwa Lesa”? Bushe ifyalembwa mu Baibolo fya kwa ani?
AMASAMBILISHO YA MU BAIBO AYACINDAMA
Bushe Baibolo Cebo ca kwa Lesa?
Nga ca kuti Lesa e walengele Baibolo ilembwe, ninshi ifwile ukucila ifitabo fimbi ifyabako.
