ISAMBILILO 4
Ifyo Mwingasambilila pa lwa kwa Lesa
Kuti mwasambilila pa lwa kwa Yehova ukupitila mu kubelenga Baibolo. Kale sana Lesa asalile abantu bamo ukuti balembe amatontonkanyo yakwe. Ifyo balembele fyaba muli Baibolo. Tusambilila pa lwa kwa Lesa ilelo ukupitila mu kubelenga Baibolo. Pantu mu Baibolo musangwa icebo ca kwa Yehova, nelyo ubukombe, itwa na kabili ukuti Icebo ca kwa Lesa. Kuti twacetekela ifilanda Baibolo pantu Yehova tabepa. Ni ‘Lesa uushingabepa.’ (AbaHebere 6:18) Mu Cebo ca kwa Lesa mwabe cine.—Yohane 17:17.
Baibolo yaba pa fya bupe fyawamisha ifyo Lesa atupeela. Yaba kwati ni kalata intu umufyashi wa kutemwa aalembela abana bakwe. Itweba ifyo Lesa alaya ukuti akalula isonde ukuba incende yawamisha iya paradise. Itweba fintu acitile kale, ne fyo alecita pali nomba, na fintu akacitila abana bakwe aba busumino ku ntanshi. Ilatwafwa no kupwisha amafya no kusanga insansa.—2 Timote 3:16, 17.
Inte sha kwa Yehova fibusa fya kwa Lesa; bakamwafwa ukumfwikisha fintu Baibolo isambilisha. Mukabebe fye ukuti mulefwaya ukusambilila Baibolo. Tabalipilisha ukusambilisha. (Mateo 10:8) Kuti mwayasangwa na ku kulongana kwa Bwina Kristu ukubela uko Inte shipepela ukwitwa ati Ing’anda ya Bufumu. Mukeshiba Lesa bwangu bwangu nga mulesangwa ku kulongana.
Kuti mwasambilila pa lwa kwa Lesa ku fyo aapanga. Ku ca kumwenako, Baibolo itila: “Lesa alengele umuulu na pano isonde.” (Ukutendeka 1:1) Ilyo Yehova alengele “umuulu,” apangile na kasuba. Nomba cinshi ici citusambilisha pa lwa kwa Lesa? Citusambilisha ukuti Yehova alikwatisha amaka. E wingapanga fye icintu icakwatisha amaka nga kasuba. Kabili citusambilisha ukuti Yehova wa mano, pantu amano yalefwaikwa pa kupanga akasuba akafumya icikabilila no lubuuto lelo ukwabula ukuti akene kasunguluke.
Ifyo Yehova aabumba fitulanga ukuti alitutemwa. Tontonkanyeni pa fisabo fyalekanalekana ifyaba mwi sonde. Yehova afwaya nga atupeele fye umusango umo uwa fisabo nelyo nga tatupeele no kutupeela. Lelo Yehova atupeele imisango iingi iya fisabo ifyapusanapusana mu mipangilwe, ubukulu, ukumoneka no kumfwika. Ici cilangilila ukuti Yehova ni Lesa wa kutemwa, mupe, alasakamana kabili wa cikuuku.—Amalumbo 104:24.
Nalimo Kuti Mwatemwako ne fi
AMASAMBILISHO YA MU BAIBO AYACINDAMA
Nani Umwine wa Fyebo Fyaba mu Baibolo?
Bushe ifi abantu e balembele Baibolo, kuti twatila Baibolo “Cebo ca kwa Lesa”? Bushe ifyalembwa mu Baibolo fya kwa ani?
PA NTE SHA KWA YEHOVA
Mulandu Nshi Mulingiile Ukusambilila Baibolo?
Mu Baibolo mwaliba ifyasuko ku mepusho yacindama ayo abantu abengi pano calo bakwata. Bushe na imwe kuti mwatemwa ukusanga amasuko ku mepusho mwakwata?
BENI CIBUSA WA KWA YEHOVA
‘Yehova E Wabumbile Ifintu Fyonse’
Bushe walishiba icintu ico Lesa abalilepo ukupanga? Sambilila pamo na Kalebu ifyo ifintu fyakonkene pa kubumbwa.
