Mufwile ukusambilila pa lwa kwa Lesa, pa kuba cibusa wakwe. Bushe ifibusa fyenu fyalishiba ishina lyenu no kumwita ilyo ishina? Ee. Na Lesa afwaya ukuti mwishibe ishina lyakwe no kulalilumbula. Ishina lya kwa Lesa ni Yehova. (Amalumbo 83:18; Mateo 6:9) Kabili mufwile ukwishiba fintu atemwa ne fyo aapata. Mufwile ukwishiba ifibusa fyakwe na balwani bakwe. Palapite nshita pa kwishiba bwino umuntu. Baibolo itila caliwama ukupaatulako inshita ya kusambilila pa lwa kwa Yehova.—Abena Efese 5:15, 16.

Ifibusa fya kwa Lesa ficita ifimutemuna. Taleni tontonkanyeni pa fibusa fyenu. Nga mulebacusha no kucita fintu bapata, bushe bakatwalilila ukuba ifibusa fyenu? Awe iyo! E co nga mulefwaya ukuba cibusa wa kwa Lesa, mufwile ukucita ifimutemuna.—Yohane 4:24.

Te mipepele yonse ingalenga umuntu ukuba cibusa wa kwa Lesa. Cibusa wa kwa Lesa uwapalamisha, Yesu, alumbwile inshila shibili. Inshila imo yalipabuka kabili bengi bapitamo. Itwala ku boni. Inshila imbi ya kamfyemfye kabili banono bapitamo. Yena itwala ku mweo wa muyayaya. Ici cilolele mu kuti nga mulefwaya ukuba cibusa wa kwa Lesa, mufwile ukusambilila inshila isuma iya kumupepelamo.—Mateo 7:13, 14.