ISAMBILILO 9
Ifibusa Fya Kwa Lesa Ni Bani?
Yesu Kristu e Mwana wa kwa Yehova kabili e cibusa wakwe uwapalamisha untu atemwisha. Yesu aali cibumbwa ca maka sana ica mupashi ku muulu ilyo ashilaisa mu kwikala pe sonde ngo muntunse. (Yohane 17:5) Lyene aishile pe sonde mu kusambilisha icine pa lwa kwa Lesa. (Yohane 18:37) Apeele no bumi bwakwe ubwa buntunse pa kupususha abantunse ba cumfwila ku lubembu ne mfwa. (Abena Roma 6:23) Yesu nomba ni Mfumu ya Bufumu bwa kwa Lesa kabili ubu Bufumu buteko bwa ku muulu ubukaleta Paradise pano isonde.—Ukusokolola 19:16.
Bamalaika nabo fibusa fya kwa Lesa. Bamalaika tabaali abantunse kale abaaleikala pano isonde. Lesa abapangile mu muulu ilyo ashilapanga isonde. (Yobo 38:4-7) Bamalaika baba iminshipendwa. (Daniele 7:10) Ifi fibusa fya kwa Lesa ifya ku muulu fifwaya abantu ukusambilila icine pa lwa kwa Yehova.—Ukusokolola 14:6, 7.
Lesa alikwate fibusa na pe sonde; afita ati Inte shakwe. Mu cilye ca milandu, nte alanda ifyo eshibe pa muntu nelyo icintu cimo. Inte sha kwa Yehova sheba abantu fintu shaishiba pa lwa kwa Yehova ne mifwaile yakwe. (Esaya 43:10) Inte sha kwa Yehova shifwaya ukumwafwilisha ukusambilila pa lwa kwa Yehova nge ficita bamalaika. Bafwaya ukuti na imwe mube cibusa wa kwa Lesa.
Nalimo Kuti Mwatemwako ne fi
AMASAMBILISHO YA MU BAIBO AYACINDAMA
Mulandu Nshi Yesu Afwilile?
Ifyo Baibolo ilanda filanga ukuti imfwa ya kwa Yesu yalicindama sana. Bushe ca cine imfwa yakwe yalicindama?
ULUPUNGU LWA KWA KALINDA
Bushe Bamalaika Kuti Batwafwa?
Bushe tufwile ukupepa kuli bamalaika nga tulefwaya ubwafwilisho?
