UKULENGA ABANTU BABA ABASAMBI
ISAMBILILO 10
Ukubombesha
Ishinte lye funde: “Tatwalefwaisha fye ukumupeela imbila nsuma ya kwa Lesa epela, lelo twalefwaya ukumupeela ne myeo yesu pantu mwaishileba abatemwikwa kuli ifwe.”—1 Tes. 2:8.
Ifyo Yesu Acitile
1. Tambeni VIDIO, nelyo belengeni Yohane 3:1, 2. Lyena lanshanyeni amepusho yakonkapo:
-
Cinshi nalimo calengele ukuti Nikodemo aleya mu kulanda na Yesu mu nshita ya bushiku?—Moneni Yohane 12:42, 43.
-
Bushe filya Yesu asumiine ukulanshanya na Nikodemo ubushiku fyalangile shani ukuti alefwaisha ukupanga abasambi?
Finshi Tulesambilila Kuli Yesu?
2. Tulalanga ukuti twalitemwa abantu nga tulebombesha pa kulenga baba abasambi.
Mulepashanya Yesu
3. Mulesambilila pa nshita ne cifulo ifyo abasambi benu bengatemwa. Kuti basala ubushiku bumo ne nshita mu mulungu. Bushe kuti batemwa mulesambililila ku ng’anda, ku ncito nelyo ku cifulo cimbi ukuba sana abantu? Nga kuti mwakumanisha, mulealulako ifyo mwatantika pa kuti mulekumanisha ukusambilila pa nshita iyo umusambi wenu engatemwa.
4. Mulesambilila lyonse. Nga mwamona ukuti tamwakabepo, mwilaeba umusambi ukuti tamwakasambilile. Lelo kuti mwatontonkanya pali ifi:
-
Bushe takuli ubushiku bumbi ubo mwingasambilila nankwe ilyo umulungu taulapwa?
-
Bushe te kuti mwebeko kasabankanya umbi ukuti akamutungulwileko isambililo?
5. Mulelomba Yehova ukuti alemwafwa. Mulelomba Yehova ukuti alemwafwa ukutwalilila ukusambilila no musambi wenu, nangu ca kuti te lyonse akumanisha ukusambilila nelyo ukucita ifyo alesambilila. (Fil. 2:13) Mulepepa pa kuti Yehova alelenga mwabika amano ku mibele iisuma iyo umusambi wenu akwata.
