IFYO MWINGATENDEKA UKULANSHANYA
ISAMBILILO 3
Icikuuku
Ishinte lye funde: “Mu kutemwa mwaba . . . icikuuku.”—1 Kor. 13:4.
Ifyo Yesu Acitile
1. Tambeni VIDIO, nelyo belengeni Yohane 9:1-7. Lyena lanshanyeni amepusho yakonkapo:
-
Cinshi Yesu abalilepo ukucita, bushe kundapa uyu umwaume nelyo kubila imbila nsuma kuli ena?—Moneni Yohane 9:1-7.
-
Cinshi mulemona icalengele umwaume afwaye ukukutika kuli Yesu?
Finshi Tulesambililako Kuli Yesu?
2. Umuntu kuti atemwa ukukutika ku mbila nsuma nga amona ukuti natumubikako amano.
Mulepashanya Yesu
3. Mulelangulukilako Abantu. Mule-esha ukwelenganya pa kuti mwishibe ifyo baleumfwa.
-
Yipusheni amuti: Finshi nalimo ifilebasakamika? Finshi fingabafwa kabili ifyo bengatemwa? Ukutontonkanya ifi kuti kwalenga mwaba ne cikuuku kuli bena no kubabikako amano.
-
Umuntu nga amweba ifyo aleumfwa pa fintu fimo nelyo amweba ubwafya akwete, mwila-alula ilyashi. Nga mulekutika ku fyo alelanda ninshi mulemulanga ukuti mwalimubikako amano.
4. Muleba ne cikuuku no mucinshi pa kulanda. Ifyo ishiwi lyenu lileumfwika ilyo mulelanda no muntu kuti fyalenga aishiba ukuti muli ne cikuuku kabili mulefwaya ukumwafwa. Mulesala bwino amashiwi ya kulanda e lyo ne nshila ya kuyalandilamo, mwilalanda amashiwi ayengakalifya abantu.
5. Muleafwa abantu. Mulefwayako inshila ishakwafwilamo abantu. Nga tuli ne cikuuku ku muntu, kuti calenga twalanshanya nankwe.
