Kuli Bamunyinefwe na Bankashi:

Ifyo twatemwa Lesa na bantu filalenga ‘tuleya mu kulenga aba nko shonse ukuba abasambi no kubabatisha.’ (Mat. 28:​19, 20; Marko 12:​28-31) Ukutemwa kwa cine kwalikwata sana amaka. Kuti kwalenga ababa ‘no mutima uusuma uufwaya umweo wa muyayaya’ ukukutika.—Imil. 13:48.

Kale twabikile sana amano ku kusungila ifyo tulingile ukulanda e lyo no kupeela abantu impapulo. Nomba pali ino nshita tulefwaya ukubika sana amano ku fya kucita pa kulanshanya bwino na bantu. Tulefwaya ukulalanga ukuti twalitemwa abantu ukupitila mu kulanda pa fintu ifibakumine. Ici cilolele mu kuti tulingile ukulabika amano ku fisakamike abantu, e lyo ne fyo balefwaisha ukumfwa. Bushe ino broshuwa ikatwafwa shani ukulacita ifi?

Muli ino broshuwa muli amasambililo 12 ayengalenga twaishiba imibele iyo tulingile ukukwata pa kuti tulelanga ukuti twalitemwa abantu. Kabili iyi imibele kuti yatwafwa ukulalenga abantu baba abasambi. Mwi sambililo limo na limo muli ilyashi ilyalembwa mu Baibo pa fyo Yesu alangile imibele imo, nelyo ifyo Abena Kristu bakubalilapo balangile iyo mibele ilyo balebila imbila nsuma. Ico tulefwaya te kulabika fye amano ku kwibukisha ifya kulanda, lelo kufwaya inshila sha kulangilamo ukuti twalitemwa abantu. Nangu ca kuti imibele yonse ilakabilwa ilyo tulebila imbila nsuma, tukasambilila pa fyo imibele imo yacindama maka maka nga tuletendeka ukulanshanya na bantu, ilyo tulecita ifipempu fya kubwelelamo e lyo na lintu tuletungulula amasambililo ya Baibo.

Ilyo mulesambilila isambililo limo na limo, muletontonkanya sana pa fyo mwingalanga iyo mibele ilyo mulelanda na bantu ku ncende mwikala. Mule-esha na maka ukutemwa sana Yehova na bantu. Ukutemwa kwine kwine e kukamwafwa sana ukulapanga abasambi ukucila inshila ishili shonse shimbi.

Tulatasha sana ifi tubombela pamo na imwe. (Sefa. 3:9.) Shi Yehova alemupaala ilyo muletwalilila ukutemwa abantu no kulenga baba abasambi!