BUSHE te kuti ciwame nga ca kuti abantu bonse balecite fisuma?— Lelo takwaba uucita ifintu ifisuma lyonse. Bushe walishiba umulandu ifwe bonse inshita shimo tucitila ifintu fyabipa, na lintu tulefwaya ukucite cisuma?— Pantu ifwe bonse twafyalwa mu lubembu. Lelo abantu bamo balacita ifintu fyabipa ifingi. Balapata abantu bambi no kubacena ku mufulo. Bushe uletontonkanya ukuti kuti bayaluka no kusambilila ukuba abantu abasuma?—

Mona uyu mulumendo alelinda amalaya ya ku nse aya balepoola Stefani amabwe. Ishina lyakwe ilya mu ciHebere ni Sauli, lelo ishina lyakwe ilya mu ciRoma ni Paulo. Natemwa ukuti Stefani, umusambi wa kwa Kasambilisha Mukalamba, aleipaiwa. Natumone umulandu Sauli acitila ifi fintu fyabipa.

Sauli aba mwi bumba lya mipepele ya baYuda ilitwa abaFarise. AbaFarise balikwata Icebo ca kwa Lesa, lelo bapoosa sana amano ku fisambilisho fya bashimapepo babo bamo. Ici calenga Sauli ukulacita ifintu fyabipa.

Lintu Stefani bamwikata mu Yerusalemu, Sauli e po ali. Stefani atwalwa ku cilye, ukuli bakapingula bamo abaFarise. Nangu ca kuti abantu balanda ifyabipa pali Stefani, tali no mwenso. Alanda no kushipa no kushimikila bwino aba bakapingula pali Yehova Lesa na Yesu.

Lelo balya bakapingula tabatemenwe ifyo baleumfwa. Kale kale balishiba ifingi pali Yesu. Na kuba, papitile fye inshita inono ukutula  apo baipaile Yesu! Lelo pa numa ya ico, Yehova asendele Yesu ku muulu. Nomba, ukucila ukwalula imibele yabo, aba bakapingula balalwisha abasambi ba kwa Yesu.

Aba bakapingula baikata Stefani no kumutwala ku nse ya musumba. Bamupuma apona na pa nshi no kumupoola amabwe. Kabili, nga fintu ulemona mu cikope, Sauli e po ali aletamba. Aletontonkanya ukuti cili fye bwino ukwipaya Stefani.

Bushe nawishiba umulandu Sauli aletontonkanishishe fyo?—

Sauli aali muFarise ukufuma ku bwaice, kabili asumine ukuti ifisambilisho fya baFarise fyali fya cine. Alemona ukuti abaFarise bali ca kumwenako, e co alebapashanya.—Imilimo 7:54-60.

Lintu Stefani aipaiwa, cinshi Sauli acita?— Aesha ukwipaya abasambi ba kwa Yesu bonse abashala! Abengilila mu mayanda no kwikata abaume na banakashi. Lyene abapoosa mu cifungo. Abasambi abengi bafuma mu Yerusalemu, lelo tabalekele ukushimikila pali Yesu.—Imilimo 8:1-4.

 Ici calenga Sauli ukucishamo ukupata abasambi ba kwa Yesu. E co aya kuli Shimapepo Mukalamba Kayafa no kupoka insambu sha kwikata Abena Kristu bali mu musumba wa Damaseke. Sauli alefwaya ukubaleta mu Yerusalemu nga bafungwa pa kuti bakandwe. Lelo ilyo aleya ku Damaseke, icintu ca kupapusha cacitika.

Ulubuuto lwabyata ku muulu, ne shiwi lyatila: ‘Sauli, Sauli, cinshi ulencushisha?’ Ni Yesu uulelanda ukufuma ku muulu! Ulubuuto lwabyata sana ica kuti Sauli apofula, na bantu abali na Sauli e bamutungulula ku Damaseke.

Ilyo papite nshiku shitatu Yesu amoneka mu cimonwa ku musambi wakwe umo uwa mu Damaseke uwitwa Anania. Yesu aeba Anania ukutandalila Sauli, no kumuposha ubupofu, no kulanshanya nankwe. Lintu Anania alanshanya nankwe, Sauli apokelela icine pali Yesu. Atendeka ukumona. Imikalile yakwe yonse yayaluka kabili aba umubomfi wa busumino uwa kwa Lesa.—Imilimo 9:1-22.

Bushe nomba wamona umulandu Sauli alecitila ifintu ifyabipa?— Ni pa mulandu wa kuti asambilishiwe ifintu fyalubana. Alekonka abantu abashali na cishinka kuli Lesa. Kabili aali mwi bumba lya bantu abacindikishe ifisambilisho fya bantu ukucila Icebo ca kwa Lesa. Lelo mulandu nshi Sauli ayalwila imikalile yakwe no kutendeka ukucite fisuma, nangu ca kuti abaFarise bambi batwalilila ukulwisha Lesa?— Ni pa mulandu wa kuti Sauli tapata icine. E co lintu bamulanga inshila ya cine, aitemenwa ukumfwila icine.

Bushe walishiba uo Sauli aishileba?— Aishileba umutumwa Paulo, umutumwa wa kwa Yesu. Kabili ibukisha, Paulo alilemba amabuuku ayengi aya mu Baibolo ukucila umuntu onse umbi.

Kwaliba abantu abengi nga Sauli abengaaluka. Lelo ici tacayanguka  pantu kwaliba uubombesha ku kulenga abantu ukucita ifintu fyabipa. Bushe walimwishiba?— Yesu alilandile pali wene lintu amonekele kuli Sauli mu musebo wa ku Damaseke. Kulya Yesu alandile kuli Sauli ukufuma ku muulu no kutila: “Ine ndekutumako ku kushibula amenso yabo, ku kuleka bapilibuke ku mfifi balole mu lubuuto, bapilibuke na ku maka ya kwa Satana balole kuli Lesa.”—Imilimo 26:17, 18.

Cine cine, Satana Kaseebanya e wesha ukulenga abantu ukucita ifintu fyabipa. Bushe inshita shimo cilakukosela ukucite cisuma?— Ifwe bonse cilatukosela. Satana alalenga caba icakosa. Lelo kwaliba umulandu na umbi uulenga ukuti cilaba icayanguka lyonse ukucite cisuma. Bushe uyo mulandu waliwishiba?— Ni pa mulandu wa kuti tufyalwa mu lubembu.

Ulu lubembu e lulenga cayanguka kuli ifwe ukucite fyabipa ukucila ukucite cisuma. E co, cinshi tufwile ukucita?— Ca cine, tufwile ukulwisha ukucite cisuma. Lintu twacite fyo, kuti twacetekela ukuti Yesu, uwatutemwa, ali no kutwafwa.

Ilyo Yesu ali pe sonde, atemenwe abantu abalekele ukucite fyabipa. Alishibe ifyo cakosele pa kuti baaluke. Ku ca kumwenako,  kwali abanakashi abalelala na baume abengi. Ici kwena cali icabipa. Baibolo ita aba banakashi ati bacilende.

Inshita imo, umwanakashi umo uwa musango yu aumfwile pali Yesu, kabili aishile uko ali pa ng’anda ya muFarise. Asubile amakasa ya kwa Yesu amafuta. Kabili afuutile ifilamba fyakwe ku makasa ya kwa Yesu ku mushishi. Alyumfwile ububi pa membu shakwe, e co Yesu alimulekelele. Lelo ulya muFarise tatontonkenye ukuti ulya mwanakashi afwile ukulekelelwa.—Luka 7:36-50.

Bushe walishiba ifyo Yesu alandile ku baFarise bamo?— Abebele ati: “Abanakashi bacilende balemutangilila ukwingila mu bufumu bwa kwa Lesa.” (Mateo 21:31) Yesu alandile fi pantu bacilende balemutetekela, no kuleka imibele yabo iyabipa. Lelo abaFarise batwalilile ukucite fintu fyabipa ku basambi ba kwa Yesu.