BUSHIKU bumo kwali umuntu umo uwaishile mu kumona Yesu. Alishibe ukuti Yesu ali uwa mano sana, e co amwebele ati: ‘Kasambilisha, mwebe munyinane ukumpeelako ifintu fimo akwata.’ Uyu muntu aletontonkanya ukuti na o afwile ukukwatako ifyo fintu.

Auba Yesu, nga watile shani?— Yesu amwene ukuti uyu muntu ali no bwafya. Lelo ubwafya bwakwe te bwa kuti alefwaya fimo ifyo munyina akwete. Ubwafya bwa uyu muntu bwa kuti taishibe icacindama icine cine mu bumi.

Natutontonkanye pali ci. Cinshi cifwile ukuba icacindamisha kuli ifwe? Bushe kukwata ifya kwangasha ifisuma, ifya kufwala fipya, nelyo ifyapalako?— Iyo, kwaliba icacilapo ukucindama. Kabili ili e sambililo Yesu alefwaya ukusambilisha. E co alandile umulumbe pa muntu uwalabile Lesa. Bushe kuti watemwa ukumfwa uyu mulumbe?—

Uyu muntu ali mukankaala sana. Akwete ibala na matala. Ifyo alimine fyalikulile bwino sana. Amatala ya kubikamo fyonse ifyo alimine yalicepele. E co cinshi ali no kucita? Atile: ‘Nkasopolola amatala yandi, no kukuula ayakulako: Lyena nkabika muli aya matala yapya ifilimwa fyandi fyonse ne fisuma fyandi fyonse.’

Uyu muntu umukankaala  atontonkenye ukuti ici e ca mano ukucita. Atontonkenye ukuti ca mano sana ukubika ifintu ifingi. Atile: ‘Nalibika ifintu ifingi ifisuma. Fikekala imyaka iingi. E co nomba kuti natuusha. Nakulalya, ukunwa, no kusangalala.’ Lelo kwali icalubene no kutontonkanya kwa ulya muntu umukankaala. Bushe naucishiba?— Aletontonkanya pa lwa mwine na pa kusangalala kwakwe. Alabile Lesa.

E co Lesa alandile kuli ulya muntu umukankaala. Amwebele ati: ‘We watumpa. Walaafwa buno bushiku. Ne fyo wabika fikaba fya kwa ani?’ Bushe ulya muntu umukankaala kuti abomfya filya fintu nga nafwa?— Iyo, umuntu umbi kuti afisenda. Yesu alandile ati: “E fyo cili ku uleibikilo mwine ifyuma, no kukanaba uwacindama kuli Lesa.”—Luka 12:13-21.

Taulefwaya ukuba nga ulya mukankaala, bushe te ifyo?— Ico alefwaya sana mu bumi kukwata ifintu ifingi. Ico cali cilubo. Lyonse alefwailapo na fimbi. Lelo tali “uwacindama kuli Lesa.”

 Abantu abengi baba nga ulya mukankaala. Lyonse bafwailapo na fimbi. Lelo ici kuti caleta amafya ayakalamba. Ku ca kumwenako, napamo walikwata ifya kwangasha, bushe te ifyo?— Fya kwangasha nshi fimo wakwata? Njebako.— Ni shani nga ca kuti umunobe umo ali no mupila nelyo akalubi nelyo ica kwangasha cimbi ico ushakwata? Bushe kuti cawama ukupatikisha abafyashi bobe ukukushitila?—

Kuti kwaba inshita lintu ica kwangasha camoneka icacindama sana. Lelo cinshi cicitika kuli ici ca kwangasha lintu papite nshita?— Cilakota. Kuti caonaika, kabili pambi kuti wacipata no kucipata. Lelo, walikwata icacindama ukucila ifya kwangasha. Bushe walicishiba?—

Caba bumi bobe. Ubumi bobe bwalicindama sana pantu ukwabula bwene, tapali ico wingacita. Lelo ubumi bobe bwaba mu kucita ifisekesha Lesa, bushe te ifyo?— E co twiba nga ulya mukankaala uwatumpa uwalabile Lesa.

Abana te beka abengacita ifintu fya buwelewele nga ulya muntu  umukankaala. Abakalamba abengi na bo balacita ifya buwelewele. Bamo bafwaya ukulakwatilapo fye ifintu. Kuti nabakwata ifya kulya, ifya kufwala, ne ng’anda. Lelo balafwailapo na fimbi. Bafwaya ifya kufwala ifingi. Bafwaya amayanda ayakulilepo. Ifi fintu fikabila indalama. E co balabombesha pa kuti bakwate indalama ishingi. Kabili nga bakwatilapo indalama ishingi, bafwaya ifintu ifingi.

Abakalamba bamo balaba abapamfiwa sana ukufwaya indalama ica kuti tabakwata ne nshita ya kuba no lupwa lwabo. Kabili tabakwata inshita ya kucita ifya kwa Lesa. Bushe indalama shabo kuti shabapeela ubumi?— Iyo. Bushe kuti babomfya indalama shabo lintu bafwa?— Iyo. Ni pa mulandu wa kuti abafwa tabengacita icili conse.—Lukala Milandu 9:5, 10.

Bushe ici cilepilibula ukuti calibipa ukukwata indalama?— Iyo. Nga natukwata indalama kuti twashita ifya kulya ne fya kufwala. Baibolo ilanda ati indalama bucingo. (Lukala Milandu 7:12) Lelo nga twatemwa indalama, ninshi tuli no kukwata amafya. Kuti twaba nga ulya mukankaala watumpa uwaibikiile ifyuma no kukanaba uwacindama kuli Lesa.

Cipilibula nshi ukuba uwacindama kuli Lesa?— Cipilibula ukutangisha Lesa mu bumi bwesu. Abantu bamo balanda ati balisumina muli Lesa. Batontonkanya ukuti icifwaikwa fye kusumina. Lelo bushe balicindama icine cine kuli Lesa?— Iyo, baba nga ulya mukankaala uwalabile Lesa.

Yesu tabalile alaba Wishi wa mu muulu. Taeseshe ukupanga indalama ishingi. Kabili takwete ifintu ifingi. Yesu alishibe icacindama icine cine mu bumi. Bushe walicishiba?— Caba kuba uwacindama kuli Lesa.

Njebako, kuti twaba shani abacindama kuli Lesa?— Kuti twaba abacindama kuli Lesa pa kucita ifimusekesha. Yesu alandile ati:  ‘Lyonse ncita ifya kumusekesha.’ (Yohane 8:29) Lesa alatemwa nga tulecita ifyo alefwaya tucite. Nomba njebako, finshi wingacita ifya kusekesha Lesa?— Ca cine, kuti wabelenga Baibolo, ukuya mu kulongana kwa Bwina Kristu, ukupepa kuli Lesa, no kwafwa bambi ukusambilila pali wene. Ifyo e fintu fyacindamisha mu bumi.

Pa mulandu wa kuti Yesu ali uwacindama kuli Lesa, Yehova alimusakamene. Apeele Yesu icilambu ca kwikala umuyayaya. Nga twaba nga Yesu, na ifwe Yehova akatutemwa no kutusakamana. E co natube nga Yesu no kukanaba nga ulya muntu umukankaala uwalabile Lesa.