ABAFYASHI bonse balabombako umulimo uo abantunse bashingomfwikisha. Umufyashi umo na umo alapeelako ica mu mubili wakwe. E co, iciisa mu kukula muli nyina muntu. Kanshi te ca kupapa ukuti ilyo umwana afyalwa, abantu batila “cipesha mano.”

Kwena, ukukwata abana ni ntendekelo fye ya mulimo wa bafyashi. Pa kubala, abana bashintilila pa bafyashi muli fyonse, lelo ilyo balekula, bakabila ifyacila pa kubasakamana fye lwa ku mubili. Bakabila ubwafwilisho pa kuti bakule mu muntontonkanya, mu nkuntu, mu mibele, na ku mupashi.

Pa kuti bakule bwino, abana bakabila maka maka ukutemwa kwa bafyashi. Nangu line ukubeba pa kanwa ukuti mwalibatemwa kwalicindama, imicitile ilingile ukwendela pamo na yo mashiwi. Cine cine, abana bakabila ica kumwenako cisuma ica bafyashi. Bakabila ubutungulushi mu mibele, ifishinte fya mafunde ifya kukonka. Kabili bakabile fi ukutula ku bwaice. Ifya kulenga ubulanda kuti fyacitika kabili filacitika nga ca kuti abana babafunda mu kucelwa.

Ifishinte fyawamisha ifingasangwa ni filya fyaba mu Baibolo. Ukufunda kwashimpwa pali Baibolo kwaliwama sana. Mu kufunda kwa musango yu, abana beluka ukuti ifyo balesambilishiwa te fyo abantunse balanda, lelo fintu Kalenga wabo, Shibo wa mu muulu alanda. Ici cilenga ukufunda kwaba na maka ayashingalinganishiwako.

Baibolo ikoselesha abafyashi ukubombesha mu kufunda abana ifishinte fyalungama. Lelo ilyo abana balekula, abafyashi ilingi cilabakosela ukulanshanya na bo pa fintu fyacindamisha. Ici citabo ca Sambilila Kuli Kasambilisha Mukalamba, calembelwa ukucilikila ica musango yu ukucitika.  Cikapeela imwe na bana benu ifyebo fya ku mupashi ifya kubelengela capamo. Na kabili, cikalenga paba ukulanshanya pa bacaice na balebabelengela ici citabo.

Mwalamona ukuti ici citabo cikabila abana na bo ukulandapo. Muli ifi fyebo fyapulintwa muli ifipusho ifingi ifyayana. Nga mwafika pali ifi fipusho, mwalamona akashilwa aka ifi (—). Aka ka kumucinkulako ukupemwina no kukoselesha umwana ukulandapo. Abana balatemwa ukulandapo. Nga talelandapo, umwana bwangu bwangu alaleka ukwangwako.

Lelo, icacilapo no kucindama ca kuti, ifi fipusho fikamwafwa ukwishiba ifyo umwana aletontonkanya. Ca cine, limo umwana kuti ayasuka ifishilungeme. Lelo ifyebo filekonka icipusho cimo na cimo fyalembelwa ukwafwa umwana ukulatontonkanya bwino.

Ulubali lwaibela ulwa ici citabo luli fikope ukucila pali 230 ifyo cikwete. Ifi fikope ifingi nafikwata amashiwi ayalekabila umwana ukulandapo, ukushintilila pa fyo alemona ne fyo abelengele. E co bebeteni ifikope no mwana. Kuti fyaba cintu icisuma ica kumwafwa ukukomaila pa masambililo yalesambilishiwa.

Ilyo umwana asambilila ukubelenga, mukoselesheni ukuti alemubelengela ici citabo no kuibelengela umwine. Nga alebelenga ici citabo libili libili, ukufunda kwabamo ukusuma kukalimbwa mu muntontonkanya wakwe no mutima. Lelo pa kuti mukoshe ukutemwa no mucinshi pali imwe no mwana wenu, mufwile ukulabelengela capamo ici citabo, kabili mufwile ukucibelenga lyonse.

Abana basansalikwa ku bulalelale, ukupupe mipashi, ne fintu fimbi ifya museebanya, icali nge cishingacitika imyaka inono ku numa. E co balekabila ubucingo, ubo cino citabo cafwa ukupeela mu nshila ya mucinshi lelo iya kukanapita mu mbali. Lelo, abana bakabila maka maka ukutungululwa ku Ntulo ya mano yonse, Shifwe wa mu muulu, Yehova Lesa. Ifi e fyo Yesu, Kasambilisha Mukalamba alecita lyonse. Tulesubila ukuti ici citabo cili no kumwafwa pamo no lupwa lwenu ukumumunga imikalile yenu pa kuti yatemuna Yehova, kabili ikamuletela amapaalo ku ciyayaya.