LESA abikile Adamu na Efa mwi bala lya Edene. Nangu ca kuti balishilepondoka no kufwa, Lesa apekanya ukuti abana bakwe, pamo na ifwe lelo, tukekale ku ciyayaya mu Paradise. Baibolo ilaya ukuti: “Abalungama bakapyaninine calo, no kwikalamo inshiku pe.”—Amalumbo 37:29.

Baibolo ilanda pa “myulu ipya ne calo cipya.” (Esaya 65:17; 2 Petro 3:13) “Imyulu” ilipo nomba yapangwa na mabuteko ya lelo aya bantu, lelo Yesu Kristu na bakateka na wene ku muulu bakapanga “imyulu ipya.” Mwandi cikawama lintu iyi myulu ipya, iyaba buteko bwa kwa Lesa ubwalungama ubwa mutende ikateka isonde lyonse!

Nga kanshi “icalo cipya” e cinshi?— Icalo cipya cikapangwa na bantu abasuma abatemwa Yehova. Wamona, ilyo Baibolo yalanda pe “sonde,” inshita shimo ipilibula abantu abekala mwi sonde, te sonde line iyo. (Ukutendeka 11:1; Amalumbo 66:4; 96:1) E co abantu abapanga icalo cipya bakekala pano isonde.

Pali ilya nshita icalo cilipo ica bantu babipa cikaba naciya. Ibukisha, Ilyeshi lya mu nshiku sha kwa Noa lyaonawile icalo icali bantu babipa. Kabili, nga fintu tusambilile, cino calo cabipa cili no konaulwa pa Armagedone. Nomba natumone ifyo cikaba ukwikala mu calo cipya ica kwa Lesa pa numa ya Armagedone.

 Bushe ulefwaya ukwikala ku ciyayaya mu Paradise mu calo cipya ica kwa Lesa ica mutende?— Takuli dokota uwingatulenga ukwikala umuyayaya. Takuli umuti uukatulenga ukukanafwa. Inshila fye twingekalilamo umuyayaya kupalama kuli Lesa. Kabili Kasambilisha Mukalamba alatweba ifya kucite co.

Natubuule amaBaibolo yesu no kwisula pali Yohane icipandwa 17, ne cikomo 3. Pano tusanga aya mashiwi aya kwa Kasambilisha Mukalamba aya kuti: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”

E co Yesu alandile ukuti tufwile ukucita cinshi pa kwikala umuyayaya?— Ica kubalilapo, tufwile ukwishiba Shifwe wa ku muulu, Yehova, no Mwana wakwe, uwatufwilile. Ici cilepilibula ukuti tufwile ukusambilila Baibolo. Ici citabo iciletila Sambilila Kuli Kasambilisha Mukalamba, ciletwafwa ukucite co.

Lelo ukusambilila pali Yehova kukatwafwa shani ukwikala umuyayaya?— Kwena, filya fine tukabila ifya kulya cila bushiku, e fyo tukabila no kusambilila pali Yehova cila bushiku. Baibolo itila: “Te ku cilyo ceka umuntu ekalila no mweo, lelo ku cebo conse icifuma ku kanwa ka kwa Lesa.”—Mateo 4:4.

Tufwile no kwishiba Yesu Kristu pantu Lesa atumine Umwana wakwe ukusenda ulubembu lwesu. Baibolo itila: “Ne pusukilo talili muli umbi nakalya.” Kabili Baibolo isosa no kuti: “Uutetekelo Mwana aba no mweo wa muyayaya.” (Imilimo 4:12; Yohane 3:36) Nomba cipilibula nshi ‘ukutetekela’ Yesu?— Cipilibula ukusumina muli wene no kwishiba ukuti tatwingekala umuyayaya ukwabula wene. Bushe twalisumine co?— Nga twalisumina tukatwalilila ukusambilila pali Kasambilisha Mukalamba cila bushiku, kabili tukalacita ifyo alanda.

 Inshila imo iisuma iya kusambilila kuli Kasambilisha Mukalamba kulabelenga ici citabo imiku ne miku no kulolesha pa fikope fyonse no kutontonkanya pali ifi fikope. Esha ukumona nga kuti wayasuka ifipusho fyaba pa fikope. Na kabili, ulebelenga ici citabo na banoko nelyo na bawiso. Nga ca kuti abafyashi bobe tababapo, belenga pamo na bakalamba bambi kabili na bana bambi. Bushe te kuti ciwame nga kuti wayafwako bambi ukusambilila kuli Kasambilisha Mukalamba ifyo bafwile ukucita pa kwikala umuyayaya mu calo cipya ica kwa Lesa?—

Baibolo itweba ati: ‘Pano calo paleya.’ Lelo Baibolo ilondolola ifyo twingekala umuyayaya mu calo cipya ica kwa Lesa. Isosa ukuti “Uucito kufwaya kwa kwa Lesa ekalilila umuyayaya.” (1 Yohane 2:17) E co kuti twaikala shani umuyayaya mu calo cipya ica kwa Lesa?— Ee, ni pa kwishiba Yehova no Mwana wakwe uwatemwikwa, Yesu. Lelo tufwile no kulacita ifyo tulesambilila. Leka ukusambilila cino citabo kukwafwe ukucita ifi fintu.