YESU alililile ilyo cibusa wakwe Lasaro afwile. Bushe uletontonkanya ukuti Yehova alyumfwile ububi ilyo Yesu aculile no kufwa?— Baibolo itila Lesa kuti ‘alunguluka’ kabili no ‘kumfwa ububi’ pa filecitika.—Amalumbo 78:40, 41; Yohane 11:35.

Bushe kuti waelenganya ifyo Yehova aumfwile ububi ilyo alemona Umwana wakwe uwatemwikwa alefwa?— Yesu alicetekele ukuti Lesa takamulabe. E mulandu wine amashiwi yakwe aya kulekelesha ilyo ashilafwa yali ya kuti: “Tata, mu minwe yenu e mo ndetuulo [mweo] wandi.”—Luka 23:46.

Yesu alicetekele ukuti akabuushiwa, ukuti takalekwe “ku mbo,” e kutila ku nshishi. Ilyo Yesu abuushiwe, umutumwa Petro alandile ifyalembelwe mu Baibolo pali Yesu, ati: “Talekelwe ku helo, no mubili wakwe tawamwene ukubola  iyo.” (Imilimo 2:31, King James Version; Amalumbo 16:10) Umubili wa kwa Yesu tawabolele mu nshishi no kutampa ukununka.

Ilyo Yesu ali pe sonde, aebele na basambi bakwe ukuti takabe uwafwa pa nshita iitali. Abalondolwelele ukuti ali “no kwipaiwa, no kubuushiwa pa bushiku ubwalenga shitatu.” (Luka 9:22) E co, abatumwa tabalekabila ukupapa ilyo Yesu abuushiwe. Lelo bushe balipapile?— Natumone.

Cili nalimo 15 hours icungulo kasuba pali Cisano ilyo Kasambilisha Mukalamba afwa pa cimuti ca kucushiwilwapo. Yosefe mukankaala wa mu Sanhedrin kabili asumina muli Yesu mu bumfisolo. Ilyo aishiba ukuti Yesu nafwa, aya kuli Pilato, kateka wa ciRoma. Aipusha nga kuti afumya icitumbi ca kwa Yesu pa cimuti ku kuyashiika. Pa numa ya ico, Yosefe asenda icitumbi ca kwa Yesu kwi bala ukwaba inshishi.

Ilyo icitumbi cabikwa mu nshishi, icilibwe cikalamba cabikwa pa mwinshi wa nshishi. E co inshishi yaisalwa. Nomba cili ni pa bushiku bwalenga shitatu, pa Mulungu. Tabulaca, e co kucili nakufiita. Kuli abalelonda inshishi. Bashimapepo bakalamba babatumine ukucite co. Bushe nawishiba icilengele?—

Bashimapepo na bo balyumfwile ukuti Yesu atile akabuuka. E co pa kuti abasambi bakwe beiba icitumbi no kutendeka ukulanda ukuti Yesu nabuuka, bashimapepo babikako aba kulonda. Ukwabula no kwenekela, umushili watendeka ukutenta. Mu mfifi, ulubuuto lwabyasha. Ni malaika wa kwa Yehova! Abashilika batiina ica kuti bafilwa ukwenda. Malaika aya ku nshishi no kusesha icilibwe. Mu nshishi tamuli nangu cimo!

Cili nga fintu umutumwa Petro aishilelanda ku ntanshi ati: “Uyo Yesu, Lesa alimwimishe.” (Imilimo 2:32) Lesa abuushishe Yesu no kumupeela umubili nga untu akwete ilyo ashilaisa pe sonde.  Abuushiwe no mubili wa mupashi nga untu bamalaika bakwata. (1 Petro 3:18) E co nga ca kuti abantu bali no kumona Yesu, afwile ukuba no mubili wa munofu. Bushe ici e co acita?— Natumone.

Nomba akasuba katendeka ukutula. Abashilika nabaya. Maria Magadala na basambi bambi aba kwa Yesu abanakashi baleya ku nshishi. Balelanshanya ati: ‘Nani alatukunkulushisha cilya cilibwe cafina ukucifumya pa mwinshi?’ (Marko 16:3) Lelo ilyo bafika ku nshishi, basanga icilibwe nabacikunkulusha kale ukufuma pa mwinshi. Kabili mu nshishi tamuli nangu cimo! Umubili wa munofu uwa kwa Yesu uwafwa taulimo! Ilyo line, Maria Magadala abutuka ku kufwaya abatumwa ba kwa Yesu bamo.

Abanakashi bambi bashala ku nshishi. Baleipusha ati: ‘Ni kwi kuli icitumbi ca kwa Yesu?’ Ilyo line abaume babili abafwele ifyabengeshima bamoneka. Ni bamalaika! Baeba aba banakashi ati: ‘Cinshi mulefwaila Yesu kuno? Nabuuka. Kabiyeni bwangu mu kweba abasambi bakwe.’ Elenganya ifyo aba banakashi babutuka ulubilo! Mu nshila, bakumanya umwaume. Bushe naumwishiba?—

Ni Yesu, uukwete umubili wa munofu! Aeba na ba banakashi ati: ‘Kebeni abasambi bandi.’ Aba banakashi batemwa. Basanga abasambi no kubeba ati: ‘Yesu nabuuka! Natumumona!’ Maria naeba kale Petro na Yohane ukuti mu nshishi tamuli nangu cimo. Nomba baya ku nshishi, nga fintu ulemona pano. Balolesha insalu Yesu apombelwemo, lelo nabapelenganishiwa. Balefwaya ukusumina ukuti Yesu ali no mweo na kabili, lelo balemona kwati te kuti cibe ica cine.

Inshita imbi pa Mulungu pene, Yesu amonekela ku basambi bakwe babili abaleenda mu musebo uya ku mushi wa Emao. Yesu aendela pamo na bo no kulanshanya na bo, lelo bafilwa ukumwishiba pantu takwete umubili umo wine nga untu akwete ilyo  ashilafwa. Lilya Yesu alya ica kulya na bene no kupepa e lyo bamwishiba. Abasambi batemwa icine cine ica kuti babwelelamo ulubilo intamfu iitali ku Yerusalemu! Napamo ilyo tapalapita ne nshita iitali ukutula apo amonekela kuli aba basambi babili, Yesu amonekela kuli Petro ku kumulanga ukuti Nabuuka.

Lyene icungulo bushiku pa Mulungu pene, abasambi abengi nabalongana mu muputule. Ifiibi nafikomwa. Ukwabula no kwenekela, Yesu amonekela kuli bene muli ulya wine muputule! Nomba baishiba ukuti Kasambilisha Mukalamba nabuuka. Elenganya ifyo batemwa!—Mateo 28:1-15; Luka 24:1-49; Yohane 19:38–20:21.

Pa nshiku 40 Yesu amonekela mu mibili iyalekanalekana iya  munofu ku kulanga abatumwa bakwe ukuti nabuuka. Lyene afuma pe sonde no kubwelela kuli Wishi ku muulu. (Imilimo 1:9-11) Mu kwangufyanya abasambi batendeka ukweba bonse ukuti Lesa abuushishe Yesu ku bafwa. Na lintu bashimapepo babapuma no kwipayapo bamo, batwalilila ukushimikila. Nabeshiba ukuti nga bafwa, Lesa akabebukisha nga fintu aibukishe Umwana wakwe.

Mwandi balya bakonshi ba kwa Yesu balipusana na bantu abengi ilelo! Aba bantu baishiba fye utululu twa pe Pasaka na mani bapenta aya pe Pasaka pa nshita ya mwaka lintu Yesu abuushiwe. Lelo Baibolo tailanda ifili fyonse pa tululu twa pe Pasaka na mani. Ilanda pa kubombela Lesa.

Kuti twaba nga basambi ba kwa Yesu pa kwebako abantu ukuti Lesa acitile icintu cawamisha ilyo abuushishe Umwana wakwe. Tatufwile ukutiina, nangu abantu balanda ati balatwipaya. Nga twafwa, Yehova akatwibukisha no kutubuusha, nga fintu abuushishe Yesu.

Bushe tatutemenwe ukwishiba ukuti Lesa ebukisha abamubombela no kuti akababuusha ku bafwa?— Ukwishiba ifi fintu kulingile ukutulenga ukufwaya ukwishiba ifyo twingalenga Lesa ukusekelela. Bushe walishiba ukuti cine cine kuti twalenga Lesa ukusekelela?— Ici e co tuli no kulandapo.