TUTILE umukashana aeba banyina ati: “Ee, nalaisa ku ng’anda nga nainuka fye ku sukulu.” Lelo aashala no kutendeka ukwangala na banankwe e lyo aisaeba banyina ati: “Bakafundisha bacinjikalika ku sukulu lintu twacinuka.” Bushe kuti caba bwino ukulande ca musango yo?—

Nelyo tutile kalume aeba bawishi ati: “Iyo, nshacilapanta umupila mu ng’anda.” Lelo ni shani nga e fyo acicita? Bushe kuti cabipa ukulanda ati tacicite fyo?—

Kasambilisha Mukalamba atulangile icisuma ica kucita. Atile: “Lelo leka icebo cobe cibe Ee, ee, napamo Iyo, iyo; icacila pali ifi ca mu Mbifi.” (Mateo 5:37) Cinshi Yesu alepilibula pa kulande fyo?— Alepilibula ukuti tufwile ukucita ifyo twalanda.

Mu Baibolo mwaliba ilyashi ililanga ifyo cacindama ukulande cine. Lyashi lya pa bantu babili abaleti basambi ba kwa Yesu. Natumone icacitike.

 Ilyo pashilapita ne myeshi ibili ukutula apo Yesu afwilile, abantu abengi aba kutali baisa ku Yerusalemu ku mutebeto wacindama uwa baYuda uwitwa ati Pentekoste. Umutumwa Petro alanda ilyashi ilisuma nga nshi umo aeba abantu pali Yesu, uo Yehova abuushishe ku bafwa. Uyu e muku wa kubalilapo abengi abeshile ku Yerusalemu basambilila pali Yesu. Nomba balefwaya ukwishibilapo na fimbi. E co, cinshi bacita?

Baikalako inshiku ishingi ukucila ifyo baenekele. Lelo ilyo papite nshita, bamo indalama shabo shapwa, kabili balekabila ubwafwilisho pa kuti bashite ifya kulya. Abasambi ba mu Yerusalemu balefwaya ukwafwa abeni. E co abengi bashitisha ifintu fyabo no kuleta indalama ku batumwa ba kwa Yesu. Lyene abatumwa bapeela indalama ku balekabila.

Anania no mukashi wakwe, Safira, ababa mu cilonganino ca Bwina Kristu mu Yerusalemu bashitisha ibala lyabo. Tapali uubebele ukushitisha ili bala. Baisalila fye abene ukushitisha. Lelo ico bacita te pa mulandu wa kuti batemenwe  abasambi bapya aba kwa Yesu. Na kuba, Anania na Safira balefwaya abantu ukutontonkanya ukuti basuma. E co bapangana ukusosa ati balepeela indalama shonse ku kwafwa bambi. Balepeela fye indalama shimo lelo balanda ukuti balepeela shonse. Uletipo shani pali co?—

Anania aisa mu kumona abatumwa. Abapeela indalama. Kwena, Lesa naishiba ukuti tapeele shonse. E co Lesa aleka umutumwa Petro ukwishiba ukuti Anania tali ne cishinka pali uyu mulandu.

Lyene Petro atila: ‘Anania, cinshi walekela Satana ukukulenga ukucite ci? Ibala lyali lyobe. Nga tawalishitishe aufwaya. Na lintu washitishe ibala, cali ku maka yobe ukusala ifyo walacita ne ndalama. Lelo cinshi ulecitila kwati upeele indalama shonse ilyo upeelepo fye shimo? Pa kucite ci te ifwe fweka ulebepa, lelo ulebepa na Lesa.’

Uyu mulandu ukalamba. Anania alebepa! Talecita ifyo alanda ati alecita. Alebepekesha fye ukucite co. Baibolo yatweba icacitika nomba. Yatila: ‘Pa kuumfwe fyebo fya kwa Petro, Anania awa no kufwa.’ Lesa aipaya Anania! Pa numa, bafumya icitumbi cakwe no kuyashiika.

 Ilyo papita nalimo amaawala yatatu, Safira aisa. Teshibe icicitike ku mulume wakwe. E co Petro amwipusha ati: ‘Bushe imwe babili mwashitishe ibala ukulingana ne ndalama mwacitupeela?’

Safira ayasuka ati: ‘Ee twashitishe ibala ukulingana ne sho shine ndalama.’ Lelo ubo bufi! Balishilepo indalama shimo pa sho bashitishe ibala. E co Lesa aipaya na Safira.—Imilimo 5:1-11.

Cinshi tufwile ukusambilila ku cacitikile Anania na Safira?— Tusambilila ukuti Lesa tatemwa aba bufi. Lyonse afwaya tulelande cine. Lelo abantu abengi batila caliba fye bwino ukubepa. Bushe uletontonkanya ukuti abo bantu balilungika?— Bushe walishiba ukuti amalwele yonse, ukukalipwa, ne mfwa pe sonde fyaishile pa mulandu wa bufi?—

Ibukisha, Kaseebanya abepele umwanakashi wa kubalilapo, Efa. Amwebele ati takafwe nga akaana ukuumfwila Lesa no kulya ku cisabo ico Lesa atile tafwile ukulyako. Efa aumfwilile Kaseebanya no kulya ku cisabo. Alengele Adamu na o alyako. Nomba bali babembu, na bana babo bonse bali no kufyalwa ababembu. Kabili abana ba kwa Adamu bonse bali no kucula no kufwa pa mulandu wa kuti bali babembu. Bushe amafya yonse yatendeke shani?— Yatendeke no bufi.

E mulandu wine Yesu alandile ati Kaseebanya “wa bufi, kabili e wishi wa buko”! E wabalilepo ukubepa. Lintu umo abepa, alecite co Kaseebanya abalilepo ukucita. Tufwile ukutontonkanya pali ci ilyo twatunkwa ukubepa.—Yohane 8:44.

Ni lilali lintu wingatunkwa ukubepa?—  Bushe te lilya walufyanya?— Nangu tawacilafwaya ukucite co, pambi kuti waonaula icintu. Nga ca kuti bakwipushapo, bushe ufwile ukulanda ati mwaice obe nelyo umukalamba obe e wacicite co? Nelyo bushe ufwile ukucita kwati tawishibe ifyo caconaika?

Ni shani nga ca kuti ufwile ukucita ifya ku sukulu, lelo wacitako fye fimo? Bushe ufwile ukulanda ati naucita fyonse, nangu taucitile?— Tufwile ukwibukisha Anania na Safira. Tabalandile icine conse. Kabili Lesa alangile ifyo ico cabipile pa kubepaya.

E co te mulandu ne co twingacita, ifintu fikabipilako nga twabepa kabili tatufwile ukulandako ifishinka fimo no kushako fimbi. Baibolo itila: “Lanshanyeni icine.” Isosa no kuti: “Mwibepana.” Yehova lyonse alande cine, kabili enekela ifwe ukucita cimo cine.—Abena Efese 4:25; Abena Kolose 3:9.