ELENGANYA ukuti uli mu bwato ubulebunda. Bushe kuti wafwaya umuntu ukukupususha?— Ni shani nga ca kuti umuntu akufwila pa kuti acite co?— Ifi e fyo Yesu Kristu acitile. Nga fintu twasambilile mu Cipandwa 37, apeele umweo wakwe nge cilubula pa kuti tupusuke.

Kwena, Yesu tatupususha ku kunwena. Bushe atupususha kuli cinshi? Bushe uleibukisha?— Atupususha ku lubembu ne mfwa ifyo ifwe bonse twafumya kuli Adamu. Nangu ca kuti abantu bamo balicita ifintu ifyabipa sana, na bo bene Yesu alibafwilile. Bushe kuti wafwaya ukufwila abantu ba musango yo pa kuti bapusuke?—

Baibolo itila: “Cayafya ku muntu ukufwilo walungama; lelo napamo umo engashipo kufwilo muntu musuma.” Lelo, Baibolo ilondolola ukuti Yesu “afwilile abashipepa.” Ico cisanshamo na bantu abashibombela Lesa! Baibolo isosa no kuti: “Ilyo twali tucili ababembu [ninshi tucili tulecita ifyabipa], Kristu alitufwilile.”—Abena Roma 5:6-8.

Bushe walishiba umutumwa uwacitile ifyabipa inshita imo?— Uyo mutumwa alembele ati: “Kristu Yesu aishile pano isonde ku kupususha ababembu, abo uwapulamo ni ne.” Umutumwa uwalandile fyo ni Paulo. Atile ‘ali uwatumpa’ no kuti ‘aikele mu bubi.’—1 Timote 1:15; Tito 3:3.

Tontonkanya pa kutemwa Lesa aali na ko pa kutuma Umwana wakwe ukufwila abantu ba musango yo! Buula Baibolo yobe no kubelenga pali ci muli Yohane icipandwa 3, icikomo 16. Apa patila:  “Lesa atemenwe aba pano isonde [e kuti abantu bekala pe sonde] ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.”

Yesu alangile ukuti atutemwa filya fine Wishi atutemwa. Uleibukisha ukuti mu Cipandwa 30 ica cino citabo, twabelengele pali fimo ifyo Yesu aculile ubushiku bamwikete. Bamutwele ku ng’anda ya kwa Shimapepo Mukalamba Kayafa, uko Balemulubulwisha. Baletele inte sha bufi ishalandile ifya bufi pali Yesu, kabili abantu bamututilemo amakofi. Ilyo e lintu Petro akeene Yesu. Nomba natwelenganye ukuti e ko tuli kabili tulemona ifilecitika.

Bwaca. Yesu talelepo ubushiku bonse. Pa mulandu wa kuti ukumulubulwisha bacilamulubulwisha ubushiku takwaciba kwa mwi funde, bashimapepo lubilo lubilo baita aba mu Sanhedrin, nelyo icilye cikalamba ica baYuda no kumulubulwisha na kabili. Na kabili bapeela Yesu umulandu wa kupula mu mafunde ya kwa Lesa.

Aba bashimapepo nomba bakaka Yesu, no kumutwala kuli Pilato, kateka wa ciRoma. Baeba Pilato ati: ‘Yesu alelwisha ubuteko. Afwile ukwipaiwa.’ Lelo Pilato namona ukuti bashimapepo balebepa fye ubufi. E co Pilato abeba ati: ‘Uyu muntu nshimusangile no mulandu. Nalamuleka aleya.’ Lelo bashimapepo na bambi babilikisha abati: ‘Iyo! Mwipayeni!’

Ilyo papite nshita, Pilato na kabili aesha ukweba abantu ukuti alakakula Yesu. Lelo bashimapepo batunka abantu ukubilikisha ati: ‘Nga mwamukakula, ninshi na imwe mulelwisha ubuteko! Mwipayeni!’ Amabumba yatendeka ukupanga icongo. Bushe nawishiba ico Pilato acita?—

Anakilako. Ica ntanshi asuminisha ukuti Yesu alopolwe. Lyene amupeela ku bashilika ukuti bamwipaye. Bafwika Yesu icilongwe ca myunga ku mutwe no kumutumfya pa kumufukamina.  Lyene bapeela Yesu umulando uukulu nelyo icimuti ukuti asende kabili bamutungulula ku nse ya musumba ku ncende beta ati Impanga ya Cipanga. Kulya bapoopela amaboko na makasa ya kwa Yesu ku cimuti. Lyene baiminika cilya cimuti pa kuti Yesu akobamepo. Alesuuma umulopa. Ubukali bwacilamo nga nshi.

Yesu tafwile ilyo line. Akobeme fye pa cimuti. Bashimapepo bakalamba balemutumfya. Na bapita nshila baletila: “Uituule, nga uli Mwana wa kwa Lesa.” Lelo Yesu naishiba ico Wishi amutumine ukucita. Naishiba ukuti afwile ukupeela umweo wakwe uwapwililika pa kuti twingaba ne shuko lya kuba no mweo wa muyayaya. Mu kupelako, mupepi na 15 hours cilya  cungulo kasuba, Yesu alilila kuli Wishi no kufwa.—Mateo 26:36–27:50; Marko 15:1; Luka 22:39–23:46; Yohane 18:1–19:30.

Mwandi Yesu ali uwapusana na Adamu! Adamu talangile ukuti alitemenwe Lesa. Taumfwilile Lesa. Kabili na kuli ifwe Adamu talangile ukuti alitutemwa. Pa mulandu wa kuti alibembwike, ifwe bonse twafyalwa mu lubembu. Lelo Yesu alangile ukuti atemwa Lesa na ifwe. Lyonse aleumfwila Lesa. Kabili apeele umweo wakwe pa kuti engafumyapo ububi Adamu atuletela.

Bushe ulatasha pa cintu cawamisha Yesu acitile?— Lintu ulepepa kuli Lesa, bushe ulamutasha pa kutupeela Umwana wakwe?— Umutumwa Paulo alitashishe pa co Kristu amucitile. Paulo alembele ukuti Umwana wa kwa Lesa ‘alintemenwe no kuipeela pa mulandu wa ine.’ (Abena Galatia 2:20) Yesu afwilile iwe na ine. Apeele umweo wakwe uwapwililika pa kuti tube no mweo wa muyayaya! Kwena uyo mulandu ukalamba uwa kutemenwa Yesu.

Umutumwa Paulo alembeele Abena Kristu ba mu musumba wa Korinti ati: “Ukutemwa kwa kwa Kristu kutulenga ukucitapo cimo.” Ukutemwa kwa kwa Kristu kutulenga ukucita cinshi? Uletipo shani?— Mona icasuko ca kwa Paulo: ‘Kristu afwilile bonse ukuti bekalile Wene. Tabafwile ukwikala ku kuisekesha abene.’—2 Abena Korinti 5:14, 15, New Life Version.

 Bushe kuti watontonkanyako inshila isho wingalangilamo ukuti uleikala imikalile isekesha Kristu?— Inshila imo kwebako bambi ifyo ulesambilila pali wene. Nelyo tontonkanya pali ci: Kuti pambi uli fye weka, e co banoko nelyo bawiso nelyo umuntu umbi te kuti bamone ifyo ulecita. Bushe walatamba amaprogramu ya pa TV ayashaba bwino nelyo ukucite fintu fimbi ifyo wishibe ukuti te kuti fisekeshe Yesu?— Ibukisha, Yesu nomba aba uwa mweo, kabili alamona fyonse ifyo tucita!

Umulandu na umbi tufwile ukutemenwa Yesu wa kuti tulefwaya ukupashanya Yehova. Yesu atile: ‘Tata alintemwa.’ Bushe walishiba ico atemenwa Yesu no mulandu tufwile ukumutemenwa?— Pantu Yesu aliitemenwe ukufwa pa kuti ukufwaya kwa kwa Lesa kucitwe. (Yohane 10:17) E co natulecita ifyo Baibolo yatweba ati: “Mube abapashanya Lesa, nga bana abatemwikwa; kabili endeni mu kutemwa, ifyo na Kristu atemenwe imwe, no kuituulila pali imwe.”—Abena Efese 5:1, 2.