TUTILE mwamona umusambi wenu asansamuka pa mulandu wa kuti aumfwikisha umo ilembo mwabelenga nankwe lyalola, e lyo atila: “Bushe muletila Baibolo isambilisha ukutila kuti twaikala mu Paradaise pano pene pe sonde umuyayaya?” Kasabankanya uo muli nankwe amwentula, e lyo atila: “Cinshi Baibolo yalanda?” Umusambi apukunya fye umutwe, pantu camupesha amano, alanda no kuti, “Ala napapa ukuti tabatusambilishapo ifi!” Mwaibukisha ukuti papita fye imilungu iinono ukutula apo alandile amashiwi yamo yene lintu asambilile pa muku wa kubalilapo ukuti ishina lya kwa Lesa ni Yehova.

Bushe umusambi wenu alimwebapo aya mashiwi twalanda? Abantu ba kwa Lesa abengi balibebapo. Takwaba ifintu ifisuma ukucila pali ifi twalanda ifingamulenga ukutasha sana pa cine ico twakwata! Baleni tontonkanyeni: Bushe icine ico mwasambilila caishilefika shani kuli imwe? Muli cino cipande twalasambilila pali ici cipusho. Ifyo abantu ba kwa Lesa basambilila icine panono panono filanga fye apabuuta tuutu ukuti Ubufumu bwa kwa Lesa bwa cine cine. Pa myaka 100, Imfumu ya ubu Bufumu, Yesu Kristu, yalibombesha ukushininkisha ukuti abantu ba kwa Lesa basambilila icine.