1, 2. (a) Bushe munyinefwe Russell ayaswike shani shimapepo uwalefwaya ukwishiba uko abasambi ba Baibolo balefumya indalama isho balebomfya ku mulimo wa Bufumu? (b) Finshi twalalandapo muli cino cipande?

KWALI inshita imo ilyo shimapepo wa ku Reformed Church aipwishe munyinefwe Charles T. Russell uko Abasambi ba Baibolo balefumya indalama isho balebomfya ku mulimo wa Bufumu.

Munyinefwe Russel ayaswike ati: “Tatulombelesha indalama.”

Lyena shimapepo amwipwishe ati, “Nomba ni kwi mufumya indalama?”

Munyinefwe Russell ayaswike ati, “Nga nakweba fye icishinka, tawasumine nangu panono. Nga tulelongana, takuba ukupishamo imbale ya mutuulo. Lelo abantu abesako baleshiba ukuti pa kupekanya ukulongana pafwile palapooswa indalama. Ici cilenga balafwaya ukusangwilako.”

Ala uyu shimapepo alipapile icine cine pa fyo munyinefwe Russell amwebele.

Munyinefwe Russell akonkenyepo ukuti, “Cishinka ndekweba. Abantu abengi balanjipusha abati, ‘Kuti nacita shani pa kuti na ine nsangwileko?’ Umuntu nga amona ukuti Lesa alemupaala kabili nakwata ne ndalama isho engatemwa ukusangwilako ku mulimo wa kwa Shikulu, alasangula. Nomba umuntu nga takwete te kuti tumupatikishe.” *

² Ifyo munyinefwe Russell alandile fyali fya cine. Ukutula na kale abantu ba kwa Lesa balapeela mu kuitemenwa pa kuti batungilile ukupepa kwa cine. Muli cino cipandwa, twalalanda pa malyashi ya mu Baibolo ayalanda pa fyo ababomfi ba kwa Lesa aba ku kale balepeela mu kuitemenwa ne fyo bakapepa ba muno nshiku babapashanya. Ilyo tulelanda pali ili lyashi, bonse tulingile ukuipusha atuti, ‘Kuti natungilila shani Ubufumu bwa kwa Lesa?’

3, 4. (a) Finshi ifyo Yehova aishiba pa babomfi bakwe? (b) Bushe abena Israele balangile shani ukuti balitungilile umulimo wa kukuula icikuulwa ca mushilo?

³ Yehova alicetekela bakapepa bakwe. Alishiba ukuti nga alefwaya basangule kuti basangula pa kulanga ukuti baliipeelesha  kuli ena. Lekeni tulande pa fya kumwenako fibili ifya bena Israele.

⁴ Ilyo Yehova afumishe abena Israele mu Egupti abebele ukupanga icikuulwa ca mushilo apa kupepela. Pa kupanga ici cikuulwa no kubikamo ifipe fyonse ifyalefwaikwa, pali no kuya indalama ishingi. Yehova aebele Mose ukweba abantu ukuti basangwileko. Atile: “Lekeni onse uwaitemenwa alete umusangulo kuli Yehova.” (Ukufu. 35:5) Apo e lyo aba bantu bafumine fye mu kubomba “umulimo onse uwa busha uo bababomfeshemo buluku buluku,” bushe bacitile shani? (Ukufu. 1:14) Baliipeleshe ukupeela fyonse ifyo bakwete pamo nga golde, silfere, ne fintu fimbi ifya mutengo ifyo abena Egupti babapeele pa kufuma mu busha. (Ukufu. 12:35, 36) Abena Israele balitwalilile ukupeela ifingi icine icine mpaka fye ilyo “babaleseshe ukuleta ifya musangulo.”—Ukufu. 36:4-7.

5. Bushe abena Israele bacitile shani ilyo Davidi abebele ukuti basangwileko ku mulimo wa kukuula itempele?

⁵ Ilyo papitile imyaka 475, Davidi na o alisangwilileko ‘icuma cakwe icaibela’ ku bukuule bwe tempele. Ili itempele lyali e cifulo ca kubalilapo ica kupepelapo Lesa wa cine pano calo. Lyena aebele abena Israele banankwe ati: “Nani uuleipeelesha ukwisusha iminwe yakwe ne ca bupe kuli Yehova lelo?” Lyena, abantu “bapeele ne mitima yonse mu kuitemenwa kuli Yehova.” (1 Imila. 29:3-9) Davidi alishibe ukuti fyonse ifyo bapeele fyafumine kuli Yehova. E co apepele ati: “Fyonse fyafuma kuli imwe, kabili ifyo tupeele fyafuma mu minwe yenu.”—1 Imila. 29:14.

6. Mulandu nshi indalama shifwaikilwa pa kuti imilimo ya Bufumu ibombwe, kabili mepusho nshi abantu bepusha?

⁶ Mose na Davidi tabalepatikisha abantu ba kwa Lesa ukupeela. Lelo abantu abene balepeela fye mu kuitemenwa. Inga muno nshiku? Twalishiba ukuti pa kuti Ubufumu bwa kwa Lesa bubombe imilimo, palafwaikwa indalama. Ku ca kumwenako, pa kuti bapulinte amaBaibolo e lyo ne mpapulo, ukukuula no kuwamya ifikuulwa fya kulonganinamo na maofeshi ya misambo, e lyo no kwafwilisha bamunyinefwe abaponenwe na masanso, indalama ishingi shilafwaikwa. Ici cilalenga abantu baleipusha abati: Bushe indalama shifuma kwi? Bushe ababomfi ba Mfumu balingile ukubapatikisha pa kuti bapeele?

7, 8. Mulandu nshi abantu ba kwa Yehova bashilombelesesha indalama?

⁷ Munyinefwe Russell na banankwe balikeene ukulabomfya inshila isho amacalici ya batila bena Kristu basangilamo indalama. Mu Ulupungu lwa kwa Kalinda ulwalenga bubili mwali icipande icaleti, “Do You Want ‘Zion’s Watch Tower’?” (“Bushe Kuti Mwatemwa Ukuti Magazini ya ‘Zion’s Watch Tower’ ilefuma lyonse?”) Muli ici icipande, ba Russell batile: “Twaishiba ukuti YEHOVA e wafwilisha umulimo wa kupulinta magazini ya ‘Zion’s Watch Tower,’ kanshi tatwakatale atulombelesha nangu ukupaapaata abantu ukuti batupeeleko  indalama. Ilyo uwalanda ukuti: ‘Golde yonse na silfere iyaba mu mpili yandi,’ akafilwa ukutupeela indalama, e lyo tukeshiba ukuti nomba e nshita ya kuleka ukusabankanya iyi magazini.” (Hag. 2:7-9) Nomba napapita ne myaka ukucila pali 130 apo aya mashiwi yalandilwe, lelo ukuteyanya kuya kulekulilako fye kabili takwaleka ukupulinta Ulupungu lwa kwa Kalinda!

⁸ Abantu ba kwa Yehova tabalombelesha indalama. Tabapishamo imbale ya mutuulo nelyo ukutuma amakalata ya kulomba indalama ku bantu nelyo ku tubungwe. Na kabili, icilonganino ca kwa Yehova tacibombela indalama nelyo ukuya cilelombelesha mu misebo. Bakonka filya fine Ulupungu lwa kwa Kalinda lwalandilepo kale ukuti: “Tumona ukuti te cisuma ukulombelesha indalama nga filya amacalici yambi yacita . . . Twaishiba ukuti ukulombelesha indalama sha kubomfya mu mulimo wa kwa Shikulu filya ficita amacalici yambi kulafulwisha Shikulu kabili ubupe bwa musango yu tabupokelelwa nelyo ukulenga uulepeela apaalwe. Kabili Shikulu te kuti apaale umulimo mu ndalama sha kulombelesha.” *

9, 10. Mulandu nshi tusangwila imisangulo ya kuitemenwa?

⁹ Apo tuli batekwa ba Bufumu, tatufwile ukupeela mu kupatikishiwa. Lelo, tulingile ukulabomfya indalama ne fikwatwa fyesu fimbi ku kutungililla imilimo ya Bufumu. Cinshi cilenga tulepeela mu kuitemenwa? Moneni ifitatu ifilenga tulepeela.

¹⁰ Ica kubalilapo, tulapeela pantu twalitemwa Yehova kabili tufwaya ‘ukulacita ifyo atemwa.’ (1 Yoh. 3:22) Yehova alitemwa umuntu uupeela no mutima onse. Lekeni tulande pa mashiwi ayo umutumwa Paulo alandile pa fyo Abena Kristu balingile ukupeela. (Belengeni 2 Abena Korinti 9:7.) Umwina Kristu wa cine tapeela na mutimako. Lelo apeela ukulingana no mo “apangile mu mutima wakwe.” * Ici calola mu kuti alabala amona ifilefwaikwa e lyo amona ne sho engasangwilako. Yehova “Atemwa uupeela ne nsansa,” kanshi alatemwa umuntu nga apeela ne nsansa. Na kuba, muli Baibolo imo bapilibula ici cikomo ukuti, ‘Lesa atemwa abantu abatemwa ukupeela.’

11. Cinshi cilenga tulepeela Yehova ubupe ubusuma icine cine?

¹¹ Icalenga bubili, tulapeela pantu tulafwaya ukutasha Lesa pa fyo atupaala mu fintu ifingi. Tontonkanyeni pe funde ilyali mu Mafunde ya kwa Mose ilyaleafwa abena Israele ukubebeta imitima yabo. (Belengeni Amalango 16:16, 17.) Pa kuya ku mitebeto itatu iyo balekwata cila mwaka, abaume bonse abena Israele balingile ukupeela ‘ukulingana ne fyo Yehova Lesa wabo alebapaala.’ Kanshi ilyo bashilaya ku mutebeto, abaume bonse balebala batontonkanya pa fyo Lesa abapaalile  no kuibebeta ukuti bamone ica bupe icisuma ico bengapeela. Na ifwe bene nga twatontonkanya pa fyo Yehova atupaala nga nshi, tulafwaisha ukumupeela ubupe ubusuma icine cine. Ubupe tumupeela e bulanga ifyo tutasha pa fyo atupaala.—2 Kor. 8:12-15.

12, 13. Mulandu nshi twingalandila ukuti nga twapeela mu kuitemenwa ninshi tulelanga ukuti twalitemwa Imfumu Yesu Kristu, kabili ni shinga cila muntu alingile ukupeela?

¹² Icalenga butatu, nga twapeela mu kuitemenwa ninshi tulelanga ukuti twalitemwa Imfumu, Yesu Kristu. Cinshi twasosela ifi? Tontonkanyeni pa mashiwi ayo Yesu aebele abasambi bakwe pa bushiku bwa kulekeleshako ukuba nabo pe sonde. (Belengeni Yohane 14:23.) Yesu atile, “Umuntu nga antemwa, akomfwila amashiwi yandi.” Pali aya “mashiwi” paba ne funde ilyo atupeele ilya kubila imbila nsuma iya Bufumu mu calo conse. (Mat. 24:14; 28:19, 20) Tulanga ukuti tulekonka ili funde nga tuleipeelesha ukubomfya inshita yesu, amaka yesu, ne fyuma fyesu ku kwafwilisha umulimo wa kushimikila pa Bufumu. Nga tulecita ifi ninshi tulelanga ukuti twalitemwa Imfumu Mesia.

 ¹³ Ukwabula no kutwishika, tulafwaisha ukulasangwilako indalama pa kulanga ukuti tulatungilila Ubufumu. Lelo bushe ni shinga cila muntu alingile ukupeela? Fwe bene tufwile ukuipingwila. Cila muntu apeela ukulingana napo akwatile. Kwena, aba bwananyina abengi tabakwata sana icuma. (Mat. 19:23, 24; Yako. 2:5) Na lyo line, tabalingile ukufuupulwa. Balingile ukwishiba ukuti Yehova no mwana wakwe balatasha pa bupe bapeela nangu bucepe shani.—Marko 12:41-44.

14. Finshi Inte sha kwa Yehova bale-eba abantu pa kubapeela impapulo?

¹⁴ Pa myaka iingi, Inte sha kwa Yehova bale-eba abantu ukulipilako indalama iinono pa kupoka impapulo. Indalama bale-eba abantu ukulipila yaleba inono ica kuti na bantu abashalekwata indalama ishingi balelipila. Nangu fye ni balya abashalekwata indalama abalefwaya impapulo balebapeela. Ico balefwaisha kupeela bonse abalefwaya ukubelenga impapulo no kusambililamo.

15, 16. (a) Bushe Ibumba Litungulula lya-alwile shani inshila ya kupeelelamo abantu impapulo mu 1990? (b) Bushe imisangulo ya kuitemenwa isangulwa shani? (Moneni na kabokoshi akaleti “ Bushe Imisangulo Ibomba Kuli Finshi?”)

¹⁵ Mu 1990 Ibumba Litungulula lyalyalwile inshila twalepeelelamo impapulo. Ukutendekela muli ulya mwaka, Ibumba Litungulula lyaebele bakasabankanya mu United States ukulapeela abantu impapulo ukwabula ukubeba indalama ya kulipila. Muli kalata iyo balembele ku filonganino fyonse mu United States, balondolwele ukuti: “Nomba bakasabankanya e lyo na bantu fye bonse bakulapoka impapulo ukwabula ukulipilako nangu kamo. . . . Umuntu nga alefwaya ukupeelako ubupe bwa kwafwa umulimo tubomba kuti apeela, lelo tulingile ukupeela umuntu ulupapulo nga alefwaya, nampo nga nakwata indalama nelyo iyo.” Uku kwaluka kwalengele abantu bomfwikishe ukuti ‘tatwaba nga bengi abaya baleshitisha icebo ca kwa Lesa,’ umulimo tubomba wa kuitemenwa. (2 Kor. 2:17) Mu kupita kwa nshita, ifi fine e fyo twatendeke ukucita na mu fyalo fyonse.

¹⁶ Bushe Indalama Shisangulwa Shani? Mu Mayanda ya Bufumu yonse aya Nte sha kwa Yehova mwaliba utubokoshi twa kupoosamo indalama. Na kabili, abantu kuti batuma imisangulo mu kulungatika ku maofeshi ya Nte sha kwa Yehova. Cila mwaka, mu Ulupungu lwa kwa Kalinda mulaba icipande icilondolola inshila isho abantu bengasangwilako ku mulimo wa mwi sonde lyonse.

17-19. Londololeni ifyo imisangulo ibomba (a) ku mulimo wa mwi sonde lyonse (b) ku kukuulila Amayanda ya Bufumu mwi sonde lyonse (c) pa cilonganino.

¹⁷ Umulimo wa mwi sonde lyonse. Ishi ndalama e shibomfiwa ku kulipila fyonse ifikabilwa pa kuti umulimo wa kushimikila ulebombwa mwi sonde lyonse. Pa fyo ishi ndalama shibomba paba ukupanga no kutuma impapulo mu calo conse, ukukuula no kuwamya amaofeshi ya misambo no mwa kwikala ababombelapo, e lyo no kutungulwilamo amasukulu  ya bulesa. Na kabili, ishi ndalama shilabomba na ku kusungilamo ba mishonari, bakangalila benda, e lyo na bapainiya baibela. E lyo shilabomba na kukwafwilisha bamunyinefwe abaponenwa na masanso. *

¹⁸ Imisangulo ya kukuulila Amayanda ya Bufumu isonde lyonse. Ishi ndalama e shibomba ku kwafwilisha ifilonganino ifilefwaya ukukuula nelyo ukuwamya Ing’anda ya Bufumu. Ifilonganino nga fyasangwilako ishi ndalama, balapeelako ifilonganino fimbi ukubikako fye ne filonganino ifyaba mu fyalo ifipiina. *

¹⁹ Isha Cilonganino. Ishi ndalama e shibomba ku kulipila ku filefwaikwa pa Ing’anda ya Bufumu no kuwamya ifileonaika. Limo limo baeluda balapingulapo ukuti indalama shimo shitumwe ku musambo ku kwafwilisha umulimo wa mwi sonde lyonse. Nga caba ifi, baeluda balepusha icilonganino. Icilonganino nga casumina, balatuma indalama isho basuminishenye. Cila mweshi, munyinefwe uusunga indalama sha cilonganino alapekanya lipoti ya fyo indalama shabombele kabili lyena balaibelenga ku cilonganino.

20. Kuti mwalanga shani ukuti mulecindika Yehova ‘ku fyuma fyenu’?

²⁰ Nga twatontokanya pa fifwaikwa pa kuti umulimo wa kushimikila ulebombwa mwi sonde lyonse, tulafwaisha ‘ukucindika Yehova ku fyuma fyesu.’ (Amapi. 3:9, 10) Ifyuma fimo ifyo twakwata maka yesu, amano, e lyo ne fyo twacenjela mu fya kwa Lesa. Tulafwaya ukubomfya sana ifi fintu ku mulimo wa Bufumu. Lelo tatulingile no kulaba ukuti pa fyuma ifyo tulingile ukupeela Lesa paba ne fikwatwa. Eco shi natuleipeelesha ukupeela nga natukwata. Ubupe ubo tupeela mu kuitemenwa bulalenga Yehova alecindikwa kabili bulanga ukuti tulatungilila Ubufumu bwa kwa Mesia.