“Mufwile ukuba bakasambilisha.” (Heb. 5:12) Taleni tontonkanyeni! Yehova uwaishibisha ukusambilisha ku muulu na pano isonde alitweba ukulasambilisha abantu pali ena! Ukusambilisha abantu icine pali Yehova lishuko sana kabili mulimo uukalamba nga nshi, nampo nga abo tulesambilisha ba mu lupwa, ba mu cilonganino, nelyo bantu abo tubilako imbila nsuma. Finshi tufwile ukucita pa kuti tulebomba bwino uyu mulimo?

Kuti twayasuka ici cipusho nga twabelenga ifyo umutumwa Paulo aebele Timote. Amwebele ati: “Twalilila ukubika amano ku kubelenga pa cintubwingi, ukukonkomesha, no kusambilisha.” Amwebele no kuti: “Pantu nga wacita ifyo ukaipususha we mwine na balekumfwa.” (1 Tim. 4:13, 16) Imbila mubila ya kupususha abantu. Kanshi mulingile ukulawamyako ifyo mubelenga ne fyo musambilisha. Ico balembela ino broshuwa ni pa kuti ilemwafwa ukuwamyako ifyo mubelenga ne fyo musambilisha. Natulande pa fyo yalembwa.

Yehova ni ‘Kasambilisha Uwapulamo.’ (Esa. 30:20) Ino broshuwa ikamwafwa ukuwamyako ifyo mubelenga ne fyo musambilisha. Lelo muleibukisha ukuti Yehova e Ntulo ya mbila tubila kabili e ukula abantu. (Yoh. 6:44) E ico lyonse mulelomba umupashi wakwe uwa mushilo. Mulebomfya Icebo ca kwa Lesa lyonse. Mulelenga abantu balelumbanya Yehova, belalumbanya imwe. Mulebombesha pa kuti mulelenga abantu batemwa sana Yehova.

Yehova alimupeela umulimo wa kubila imbila iyacindamisha pa mbila yonse. Tatuletwishika ukuti nga mwashintilila pa “maka ayo Lesa amupeela,” mukabomba bwino uyu mulimo.—1 Pet. 4:11.

Ni fwe bakasambilisha banenu,

Ibumba Litungulula ilya Nte sha kwa Yehova