Lupwa nangu umunensu nga atamfiwa pa mulandu wa kukanalapila pa lubembu ulo acitile, tulaba no bulanda sana. Kuti caishibikwa ukuti cine cine twalitemwa Lesa no kuti tufwaya ukuba aba cishinka kuli ena nga ca kuti tulekonka ukufunda ukwaba mu Baibolo ukulanda pa fyo tulingile ukumona umuntu uwatamfiwa. * Natulande pa mepusho yamo ayo bamo bepusha nga ca kuti umuntu atamfiwa.

Bushe tulingile ukulamona shani umuntu uwatamfiwa? Baibolo itila: “Mwila-ampana no wa bwananyina onse nga aba uwa bulalelale nelyo uwa lunkumbwa nelyo uupepa utulubi nelyo uutukana nelyo cakolwa nelyo umupuupu, kabili te ca kwesha no kulya nankwe.” (1 Abena Korinti 5:11) Mu Baibolo mwaba na mashiwi ayatila umuntu ‘uushikalilila’ mwi sambilisho lya kwa Kristu, “mwimupokelela mu mwenu nangu kumuposha. Pantu uwamuposha ninshi akumako ku milimo yakwe iyabipa.” (2 Yohane 9-11) Tatulanda pa fya mu cilonganino no watamfiwa nangu fye ukwangala nankwe. Ulupungu lwa kwa Kalinda ulwa mu ciNgeleshi ulwa September 15, 1981, pe bula 25, lwatile: “Ukuposhanya fye pa kanwa no muntu e po twingatendekela ukulanda nankwe kabili nalimo e pengatampila na bucibusa. Bushe kuti cawama nga ca kuti tuleposhanya no watamfiwa?”

Bushe tulingile ukulekelela fye ukwampana no watamfiwa? Ee, cinshi twalandila ifi? Ica kubalilapo, ukucita ifi kulanga ukuti twaliba ne cishinka kuli Lesa kabili tulomfwila Icebo cakwe. Tulingile ukumfwila Yehova inshita yonse, ilyo ifintu fili bwino na lintu fishili bwino. Ukutemwa Lesa e kulenga tuleumfwila amafunde yakwe yonse, pantu twalishiba ukuti wa mulinganya kabili alitutemwa no kuti amafunde yakwe yabelako ukuti ifintu filetuwamina. (Esaya 48:17; 1 Yohane 5:3) Ica bubili, nga  tatuleampana no mubembu uushalapila ninshi tuleicingilila no kucingilila icilonganino, kabili ne cilonganino na co kuti catwalilila ukuba ne shina ilisuma. (1 Abena Korinti 5:6, 7) Ica butatu, nga tulekonka sana amashiwi ayatutungulula ayaba mu Baibolo, uwatamfiwa na o kuti anonkelamo. Nga tulekonka ifyo komiti ya bupingushi ipingwile, kuti twalenga uwalufyenye kabili uwakene ukumfwa ilyo baeluda balemufunda akutuluka. Aba bwananyina nga baleka ukwampana nankwe, kuti ‘ailuka’ ifyo ulubembu acitile lwakulile, kabili kuti afwaya ukucitapo fimo pa kuti abwelele kuli Yehova.—Luka 15:17.

Inga ca kuti uwatamfiwa ni lupwa wesu? Icintu ca musango yu kuti calenga twaeshiwa icine cine. Bushe tulingile ukulamona shani lupwa wesu uwatamfiwa? Kwena, muli cino citabo tatwalande pali fyonse ifyo mwingacita, twalalanda fye pa fintu fibili.

Inshita shimo, lupwa uwatamfiwa limbi kuti ekala na ifwe pa ng’anda. Apo umuntu nga atamfiwa taleka ukuba lupwa wesu, kanshi nalimo kuti mwatwalilila ukubomba nankwe imilimo ya pa ng’anda iya cila bushiku. Lelo, pa mulandu no lubembu acitile, umwine nasalapo ukuleka ukwampana no lupwa lwakwe mu fya kwa Lesa. E co nangu fye ni ba lupwa wakwe aba cishinka tabakalebombela pamo nankwe mu fya kwa Lesa. Ku ca kumwenako, nga ca kuti aba mu lupwa batendeka ukusambilila Baibolo e lyo no watamfiwa e po ali, talingile ukulalandapo. Lelo, nga ca kuti umwana umunono e watamfiwa, abafyashi bacili nabakwata umulimo wa kumusambilisha no kumusalapula. E ico, abafyashi abatemwa umwana wabo kuti balamutungulula isambililo lya Baibolo. *—Amapinda 6:20-22; 29:17.

Limo, kuti limbi tatwikala na lupwa uwatamfiwa. Nangu ca kutila kuti kwaba inshita cingalinga ukulanshanyako imilandu imo iya lupwa, tamulingile ukulaba lyonse pamo nankwe. Balupwa aba cishinka tabafwaya umwa kubepekesha pa kuti balebombela pamo na lupwa wabo uo bashikala nankwe uwatamfiwa.  Lelo, icilenga balekonka ifyo Amalembo yalanda pa kutamfiwa mulandu wa kuti bafwaya ukuba aba cishinka kuli Yehova na ku cilonganino cakwe. Nga bali aba cishinka, uwatamfiwa kuti asuka akutuluka kabili kuti anonkelamo mu fyo bamusalapwile. *—AbaHebere 12:11.