1, 2. Finshi tulingile ukucita pa kuti tutwalilile ukutemwa Lesa?

APO bonse tufwaya ukuba abakosa no kukwata ubumi ubusuma, tulalya ifya kulya ifisuma, tulatukusha imibili lyonse, kabili tulasunga bwino imibili yesu. Nangu ca kuti tufwile ukuibikilishako pa kuti tube no bumi ubusuma, ififumamo filawama, e co tatunenukila. Lelo kwaliba na mumbi umo tulingile ukuba abakosa kabili abatuntulu.

² Nangu ca kuti twalitendeka ukwishiba Yehova, tufwile ukutwalilila ukucita ifingalenga bucibusa bwesu na ena bulekoselako. Ilyo Yuda akoseleshe Abena Kristu ati, “Ikalilileni mu kutemwa kwa kwa Lesa,” alilondolwele ne fyo bali no kucita pa kuti bacite ifyo. Abebele ati: ‘Ikosheni mwe bene pa mufula wa citetekelo cenu.’ (Yuda 20, 21) Nomba finshi tufwile ukucita pa kuti tulekosha icitetekelo?

3-5. (a) Bushe Satana afwaya mulemona shani amafunde ya kwa Yehova? (b) Bushe mumona shani amafunde ya kwa Yehova e lyo na mashinte ya mafunde?

³ Mulingile ukushininkisha ukuti ifyo Yehova alanda e fingamuwamina. Satana afwaya mulemona ukuti amafunde ya kwa Lesa yalyafya te kuti mukumemo ukuyakonka no kutila kuti mwaba ne nsansa sana nga muleisalila  icisuma nelyo icibi. Ukutula fye mwi bala lya Edeni, ifi fine e fyo Satana afwaya abantu baletontonkanya. (Ukutendeka 3:1-6) Na muno nshiku mwine ifi fine e fyo afwaisha.

⁴ Bushe amafunde ya kwa Yehova yalyafya nga fintu Satana afwaya abantu baletontonkanya? Awe tayayafya. Natulangilile, tutile muletandala mu parka iisuma nga nshi. Mwamona ulubao ulutali ulwacingilila incende imo. Nalimo mwalatontonkanya amuti, ‘Mulandu nshi bacingililila iyi ncende? Nshilemona bwino ifili mu kati!’ Lelo ilyo muletontonkanya ifi, mwaumfwa inkalamo yabuluma mu kati ka iyi ncende. Bushe nomba mwailuka ico babikilako ulubao? Mwaumfwa bwino pantu ulubao lulemucingilila pa kuti inkalamo imulya! Amashinte ya mafunde ya kwa Yehova yaba nga ulu ulubao, kabili Satana Kaseebanya aba nga iyi nkalamo. Icebo ca kwa Lesa citusoka aciti: “Beni abalola, cenjeleni. Umulwani wenu, Satana Kaseebanya, endauka nge nkalamo iilebuluma, iilefwaya untu ingalya.”—1 Petro 5:8.

⁵ Yehova afwaya tuleba ne nsansa nga nshi. Tafwaya Satana aletubeleleka. E co atupeelela amafunde na mashinte ya mafunde pa kuti aletucingilila na pa kuti tuleba ne nsansa. (Abena Efese 6:11) Yakobo alembele ati: “Uulolesha mu mafunde ayapwililika ayatulenga ukuba abantungwa no kulayakonka . . . akaba uwa nsansa ilyo alecita ifyo fine.”—Yakobo 1:25.

6. Finshi tulingile ukucita pa kuti tushininkishe ukuti ifyo Lesa atweba filatuwamina?

⁶ Nga tulekonka ifyo Yehova atweba, tulaba no bumi ubusuma, kabili bucibusa bwesu na ena bulakoselako. Ku ca kumwenako, ifintu filatuwamina nga tulepepa kuli ena lyonse. (Mateo 6:5-8; 1 Abena Tesalonika 5:17) Na kabili tulaba ne nsansa nga tulekonka ifunde lya kulalongana  pamo ku kumupepa na ku kukoseleshanya na ba bwananyina, na lintu tulebila imbila nsuma no kusambilisha abantu. (Mateo 28:19, 20; Abena Galatia 6:2; AbaHebere 10:24, 25) Nga twatontonkanya pa fyo ifi fintu fyalenga twatwalilila ukuba ne citetekelo icakosa, tulashininkisha sana ukuti ifyo Yehova alanda filatuwamina.

7, 8. Finshi fingalenga twaleka ukusakamana pa mesho ayo twingakwata ku ntanshi?

⁷ Nalimo kuti twasakamana ukuti ku ntanshi tukakwata amesho ayayafya ayakalenga cikatukosele ukutwalilila ukuba ne citetekelo icakosa. Nga ca kuti ifi e fyo mumona, muleibukisha amashiwi ayo Yehova alanda, atila: “Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo. Nga wabika fye amano ku mafunde yandi, umutende obe kuti waba  ngo mumana, no bulungami bobe nga mabimbi ya pali bemba.”—Esaya 48:17, 18.

⁸ Nga tuleumfwila Yehova, umutende wesu ukaba ngo mumana uushikama, kabili ubulungami bwesu bukaba nga mabimbi ya pali bemba ayapoosa amenshi ku lulamba lwa bemba. Te mulandu ne fingatucitikila, kuti twaba aba cishinka. Baibolo itila: “Poosa icisendo cobe pali Yehova, na o akakukosha. Takaleke uwalungama ukutelententa.”—Amalumbo 55:22.

9, 10. Bushe calola mwi ukuba umukalamba mu fya kwa Lesa?

⁹ Nga mulekosha bucibusa bwenu na Yehova, mukaba “abakalamba.” (AbaHebere 6:1) Calola mwi ukuba abakalamba?

¹⁰ Nga tuli bakalamba mu myaka tacipilibula ukuti tuli bakalamba mu fya kwa Lesa. Pa kuti tube abakalamba mu fya kwa Lesa, tulingile ukuba ifibusa sana na Yehova kabili tufwile ukulamona ifintu nga fintu afimona. (Yohane 4:23) Paulo alembele ati: “Abakonka ififwaya imitima yabo batontonkanya ifyo fine, lelo abatungululwa no mupashi batontonkanya ifya kwa Lesa.” (Abena Roma 8:5) Umukalamba mu fya kwa Lesa tabika amano ku kwangala na ku kunonka ifyuma. Lelo ico abikako amano, kubombela Yehova kabili alasala bwino ifya kucita. (Amapinda 27:11; belengeni Yakobo 1:2, 3.) Tabelelekwa ukucita ifyabipa. Na kabili umukalamba aleshiba icalungama kabili ico cine e co afwaisha ukucita.

11, 12. (a) Finshi Paulo alandile pa “mano aya kulekanya icalungama ne calubana” ayo Umwina Kristu engakwata? (b) Bushe ifyo umuntu alingile ukucita pa kuti abe umukalamba fyapalana shani ne fyo uulefwaya ukwishiba ifya kwangala ifyangalo fya kucimfyanya alingile ukucita?

¹¹ Kwena ukuba umukalamba mu fya kwa Lesa takwisa  nga meno ya mu kanwa. Umutumwa Paulo alembele ati: “Ifya kulya ifyakosa fya bakalamba, abo ukupitila mu kubelesha balikwata amano aya kulekanya icalungama ne calubana.” (AbaHebere 5:14) Ishiwi lya kuti “ukubelesha” nalimo kuti lyalenga twalatontonkanya pa muntu uwangala ifyangalo fya kucimfyanya.

¹² Nga twamona uko uwaishiba sana ukwangala icangalo ca kucimfyanya aleyangala, tuleshiba ukuti palipitile inshita kabili aleisambilisha pa kuti eshibe bwino ifya kwangala ico icangalo. Tafyelwe ninshi alishiba ifya kwangala. Umwana nga afyalwa, teshiba ifya kubomfya amaboko na molu. Lelo mu kupita kwa nshita, alasambilila ifya kwikata ifintu kabili alasambilila no kwenda. Nga asambilila ifya kwangala kuti alayangala ifyangalo fya kucimfyanya. Ifi fine e fyo caba na kuli ifwe, palapita inshita kabili tufwile ukuisambilisha pa kuti tube Abena Kristu abakalamba.

13. Finshi tulingile ukucita pa kuti tulemona ifintu nge fyo Yehova afimona?

¹³ Muli cino citabo natusambilila ifyo tufwile ukucita pa kuti tuletontonkanya nga fintu Yehova atontonkanya kabili tulemona ifintu nga fintu afimona. Natusambilila ukuti calicindama ukwishiba no kutemwa amafunde ya kwa Yehova. Ilyo tulesala pa fintu, tulingile ukuyipusha atuti: ‘Mafunde nshi nelyo mashinte nshi aya mafunde ya mu Baibolo ayo ningile ukukonka pa kuti nsalepo bwino pali ifi? Kuti nayakonka shani? Finshi Yehova engafwaya nacita?’—Belengeni Amapinda 3:5, 6; Yakobo 1:5.

14. Finshi tulingile ukucita pa kuti tulekosha icitetekelo cesu?

¹⁴ Tatuleka ukucita ifingalenga twatwalilila ukutetekela Yehova. Nga filya fine ifya kulya ifisuma filenga twaba abakosa, e fyo no kusambilila pali Yehova kulenga twaba ne citetekelo icakosa. Nga twatampile ukusambilila Baibolo,  twalisambilile icine ca kubalilapo pali Yehova na pa fyo afwaya. Nomba mu kupita kwa nshita, tufwile ukwishiba icine icashika. Ifi e fyo Paulo alelandapo ilyo alandile ati: “Ifya kulya ifyakosa fya bakalamba.” Nga tulekonka ifyo tulesambilila, tulaba na mano. Baibolo itweba aiti: “Amano e cikankaala.”—Amapinda 4:5-7; 1 Petro 2:2.

15. Mulandu nshi ukutemwa Yehova na ba bwananyina kwacindamina?

¹⁵ Umuntu nalimo kuti aba uwakosa kabili kuti aba no bumi ubusuma, lelo alishiba ukuti afwile ukulaisunga bwino pa kuti atwalilile ukuba uwakosa no kuba no bumi ubusuma. No mukalamba mu fya kwa Lesa alishiba ukuti alingile ukubombesha pa kuti bucibusa bwakwe na Yehova butwalilile ukuba ubwakosa. Paulo atweba ati: “Muleyesha mwe bene mumone nga muli mu citetekelo, muleilinga mwe bene.” (2 Abena Korinti 13:5) Kwena tatulingile fye ukuba ne citetekelo icakosa. Tulingile no kutwalilila ukutemwa Yehova na ba bwananyina. Paulo atile: “Nga nalishiba . . . ifingi, kabili nga nalikwate citetekelo cakosa ica kuti kuti nasesha ne mpili, lelo ukutemwa nshakwata, ninshi tapali ico ndi.”—1 Abena Korinti 13:1-3.

16. Bushe Satana afwaya tuletontonkanya shani?

¹⁶ Satana afwaya twalatontonkanya ukutila te kuti tucite nangu cimo icingalenga Yehova asekelela. Afwaya twafuupulwa kabili twalatontonkanya ukuti amafya tukwete tayakapwe. Tafwaya twacetekela aba bwananyina, kabili tafwaya tuleba ne nsansa. (Abena Efese 2:2) Satana alishiba ukuti nga tulesakamikwa te kuti tuleba ne nsansa, kabili te kuti tutwalilile ukuba ifibusa fya kwa Lesa. Lelo Yehova alitupeela isubilo ilingatwafwa ukulatontonkanya pa fisuma.

17. Bushe isubilo lyacindama shani?

 ¹⁷ Pali 1 Abena Tesalonika 5:8, Baibolo ilinganya isubilo twakwata ku ca kucinga umutwe wa mushilika mu nkondo, ita ici ica kucinga umutwe ukuti “isubilo lya kupusuka.” Ukusubila ifyo Yehova atulaya kuti kwacingilila amatontonkanyo yesu kabili te kuti tulesakamikwa sana.

18, 19. Bushe ukuba ne subilo kwalengele shani Yesu aba uwakosa?

¹⁸ Icalengele Yesu abe uwakosa ni co ali ne subilo. Mu bushiku Yesu alefwa, alikwete amafya ayengi. Umo uwali cibusa wakwe sana alimufutwike. Cibusa wakwe umbi alimukeene. Bacibusa bakwe bambi balimushile kabili balimubutwike. Abantu bakwe balimwimiine, kabili balefwaya apopelwe pa cimuti. Cinshi calengele ashipikishe aya amafya yonse? Baibolo itila: “Pa mulandu wa kusekelela ukwabikilwe pa ntanshi yakwe alishipikishe ilyo alecula  pa cimuti ca kucushiwilwapo, asuulile insoni, kabili aikala ku kuboko kwa ku kulyo ukwa cipuna ca bufumu ica kwa Lesa.”—AbaHebere 12:2.

¹⁹ Yesu alishibe ukutila nga atwalilila uwa cishinka, akalenga Wishi wa ku muulu akalumbanishiwe kabili akalenga cikeshibikwe ukuti Satana wa bufi. Ili subilo akwete lyalengele abe ne nsansa nga nshi. Alishibe no kuti tapali na kukokola aali no kubwelela ku muulu kuli Wishi. Ili subilo lyalengele ashipikisha. Na ifwe tufwile ukubika amano kwi subilo twakwata nga filya fine Yesu acitile. Isubilo likalenga tukatwalilile ukushipikisha nangu tukakwate amafya ya musango shani.

20. Cinshi mulingile ukucita nga ca kuti isubilo lyayalilepwa?

²⁰ Yehova alamona ifyo mwaba ne citetekelo ne fyo mushipikisha. (Esaya 30:18; belengeni Malaki 3:10.) Yehova alilaya ‘ukumupeela ififwaya umutima wenu.’  (Amalumbo 37:4) E co twalilileni ukubika amano kwi subilo mwakwata. Satana afwaya mwaleka ukuba ne subilo, kabili afwaya mulemona ukuti ifyo Yehova amulaya tafyakacitike. Lelo tamulingile ukubelelekwa na Satana! Nga mwasanga ukuti isubilo lileya lilepwa, mulelomba Yehova alemwafwa. Muleibukisha amashiwi yaba pa Abena Filipi 4:6, 7 ayatila: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.”

21, 22. (a) Mulandu nshi Yehova abumbiile isonde? (b) Finshi mulefwaisha ukucita?

²¹ Lyonse mulekwatako inshita ya kutontonkanya sana pa fisuma ifyo Yehova amulaya. Nomba line bonse abakalaikala pano isonde bakalapepa Yehova. (Ukusokolola 7:9, 14) Tontonkanyeni pa fyo imikalile ikawama mu calo cipya. Te kuti twelenganye no kwelenganya ifyo ikawama! Satana, ifibanda fyakwe na bonse abacita ifyabipa bakaloba. Tamwakalelwala, kabili tamwakalefwa. Cila bushiku mukalabuuka na maka sana kabili mukalaba ne nsansa. Bonse bakalabombela pamo pa kulenga isonde ukuba paradaise. Bonse bakakwata ifya kulya no mwakwikala. Abantu tabakabe abankalwe nelyo aba lubuli lelo bakaba ne cikuuku kuli bonse. Mu kupita kwa nshita abantu bonse mwi sonde bakaba “abana ba kwa Lesa.”—Abena Roma 8:21.

²² Yehova afwaya mube cibusa wakwe sana. Kanshi muleesha na maka yenu yonse ukulamumfwila no kulapalama sana kuli ena cila bushiku. Bonse natutwalilile ukwikalilila mu kutemwa kwa kwa Lesa umuyayaya!—Yuda 21.