Bonse tulafwaya indalama sha kubomfya ku fyo ulupwa lwesu lukabila. (Amapinda 30:8) Na kuba, ‘indalama shilacingilila.’ (Lukala Milandu 7:12) Abaupana limo balafilwa ukulanshanya pa ndalama, lelo tamufwile ukuleka ilyashi lya ndalama lyaleta amafya mu cupo cenu. (Abena Efese 4:32) Abaupana balingile ukucetekelana e lyo no kulanshanya ifya kubomfya indalama.

IFYO BAIBOLO ILANDA: “Nani pali imwe nga alefwaya ukukuula ulupungu tabala ekala pa nshi no kupenda ishingapooswapo, pa kuti amone nga nakwata isha kulupwishisha?” (Luka 14:28) Kanshi mulingile ukulanshanya ifya kubomfya indalama. (Amose 3:3) Lanshanyeni ifyo mulekabila ukushita e lyo ne ndalama mwingabomfya kuli ifyo fintu. (Amapinda 31:16) Nangu ca kuti namukwata indalama ishingi, tamufwile ukulashita ifintu cishiteshite. Mwilakongola, lelo mulebomfya fye indalama isho mukwete.—Amapinda 21:5; 22:7.

IFYO MWINGACITA:

• Nga mwashalapo ne ndalama pa mpela ya mweshi, lanshanyeni ifya kushibomfya

• Mulingile ukucefyako ifya kushita nga ca kuti indalama mukwete shinono. Ku ca kumwenako, kuti muleyipikila ifya kulya ukucila ukushita ifyo baipikila limo

IFYO BAIBOLO ILANDA: “Tufwaya ukuba abafumacumi muli fyonse, te ku menso fye ya kwa Yehova eka, lelo na ku menso ya bantu.” (2 Abena Korinti 8:21) Tamufwile ukufisa abena mwenu indalama mufola e lyo ne sho mwabomfyapo.

Mulelanshanya na bena mwenu lyonse nga ca kuti indalama mulefwaya ukubomfya shingi. (Amapinda 13:10) Nga mulelanshanya pa fya kubomfya indalama, mu cupo cenu mukaba umutende. Muleibukisha ukuti indalama mufola te shenu mweka, lelo sha lupwa lonse.—1 Timote 5:8.

IFYO MWINGACITA:

• Umfwaneni na bena mwenu indalama isho mwingabomfya ukwabula ukubepusha

• Te kwesha ukulolela mwakwata amafya e lyo mwalanshanya pa ndalama