Yehova afwaya tuleba “aba cishinka.” (Amalumbo 31:23) Abaupana balingile ukuba aba cishinka ku bena mwabo, pantu te kuti bacetekelane nangu ukutemwana nga tabali aba cishinka.

Muno nshiku abaupana abengi tababa ne cishinka ku bena mwabo. Pa kuti icupo cenu cikose mulecita ifi ifintu fibili.

IFYO BAIBOLO ILANDA: “Mwishibe bwino bwino ifyacilapo ukucindama.” (Abena Filipi 1:10) Icupo cenu caba pa fintu ifyacindama sana mu bumi bwenu. E ico mulingile ukubikako amano.

Yehova afwaya mulebika amano ku bena mwenu e lyo no ‘kuipakisha ubumi’ capamo. (Lukala Milandu 9:9) Alilanda bwino ukuti tamulingile ukulekelesha abena mwenu, lelo mufwile ukulacita ifintu ifingalenga baleba ne nsansa. (1 Abena Korinti 10:24) Mulecita ifintu ifingalenga abena mwenu balemona ukuti mwalibatemwa.

IFYO MWINGACITA:

• Muleba na bena mwenu cila nshita no kubabikako amano

• Mwilalabako abena mwenu muli fyonse ifyo mulefwaya ukucita

IFYO BAIBOLO ILANDA: “Onse uwatwalilila ukulolekesha umwanakashi no kumukumbwa, ninshi nacita kale ubucende nankwe mu mutima wakwe.” (Mateo 5:28) Umuntu nga atwalilila ukutontonkanya pa fya bulalelale, ninshi tali na cishinka ku mwina mwakwe.

Yehova atila mulingile ‘ukusunga umutima wenu.’ (Amapinda 4:23; Yeremia 17:9) Pa kuti tusunge umutima, tatulingile ukulalolesha pa fintu ifingalenga twalufyanya. (Mateo 5:29, 30) Konkeni ica kumwenako ca kwa Yobo, uwapangene icipangano na menso yakwe ukuti takatale alolekesha umwanakashi umbi. (Yobo 31:1) Te kwesha ukutamba ifye shiku nangu panono kabili mwikatala amutemwa umuntu umbi uushili mwina mwenu.

IFYO MWINGACITA:

• Lekeni abantu bambi beshibe ukuti muli ba cishinka ku bena mwenu

• Mulelangulukilako abena mwenu kabili pwisheni ilyo line fye bucibusa bonse ubwingalenga abena mwenu baleumfwa ububi