Ilyo abena Nasarete bafwaile ukwipaya Yesu, Yesu afulumukile ku musumba wa Kapernahumu, mupepi na Bemba wa Galili, uwaleitwa no kuti “bemba wa Genesarete.” (Luka 5:1) Ici califikilishe ubusesemo bwa mwi buuku lya kwa Esaya ubwa kuti abena Galili abaleikala mupepi na bemba bali no kumona ulubuuto ulukalamba.—Esaya 9:1, 2.

Yesu alitwalilile ukubila na mu Galili ukuti: “Ubufumu bwa mu muulu nabupalama.” (Mateo 4:17) Alisangile abasambi bakwe bane abo ali nabo pa kubalilapo. E balya babweleele ku milimo ya bulondo ilyo bafumine ku Yudea na Yesu. (Yohane 1:35-42) Lelo, inshita yalifikile iya kuti batendeke ukulankoka Yesu lyonse pa kuti engabasambilisha umulimo uo bali no kutwalilila ukulabomba nga aya ku muulu.

Ilyo Yesu ale-enda mu lulamba lwa bemba, amwene Simone Petro, na Andrea, munyina na bantu bambi abo baleteya nabo amasumbu. Yesu aile uko bali kabili aingile mu bwato bwa kwa Petro no kumweba ukuti abutalusheko panono ku mulundu. Ilyo bafumineko panono ku mulundu, Yesu alikele, atendeka no kusambilisha abalongene mu lulamba lwa bemba icine pa Bufumu.

Pa numa, Yesu aebele Petro ati: “Twala ubwato apashikile, kabili pooseni amasumbu yenu pa kuti mwipaye isabi.” Lelo Petro ayaswike ati: “Mwe Kasambilisha, tuculile ubushiku bonse ukwabula ukwipaya nangu limo, lelo pa mulandu wa fyo mwasosa, nalapoosamo amasumbu.”—Luka 5:4, 5.

Bapoosele amasumbu yabo mu menshi no kwikata isabi ilingi ica kuti amasumbu yatendeke no kulepuka! Balicebwishe abanabo abali mu bwato bwali mupepi pa kuti babafweko bwangu bwangu. Amato yonse yabili yaliswile kwi sabi ica kuti yatendeke no kwibila. Ilyo Petro amwene ifi, afukeme pa ntanshi ya kwa Yesu, no kutila: “Ntalukeni, mwe Shikulu, pantu ndi muntu umubembu.” Yesu amwebele ati: “Wilatiina. Ukufuma pali nomba walaba umulondo wa bantu.”—Luka 5:8, 10.

Yesu aebele Petro na Andrea ati: “Nkonkeni, na ine nkamulenga ukuba abalondo ba bantu.” (Mateo 4:19) Aitile na balondo bambi babili, Yakobo na Yohane, abana ba kwa Sebede ukuti balemukonka. Nabo bene tabaikete na ku cani. E ico aba bane balilekele umulimo wa bulondo kabili batendeke no kulakonka Yesu lyonse.