Ilyo abasambi bafikile ku lulamba lwa bemba, pa numa ya kucula ku mabimbi yali pali bemba, icintu ca kupapusha calicitike. Abaume babili abakali abali ne fibanda, abafumine mu nshiishi iyali mupepi babutukiile kuli Yesu! Umo pali aba babili, uo ifibanda fyacushishe sana pa myaka iingi kabili uwalipo nalimo umukali sana, e o Yesu abikileko sana amano.

Uyu umwaume aleenda fye ukwabula ukufwala. Ubushiku na kasuba “alebilikisha mu nshiishi na mu mpili no kuitetaula ku mabwe.” (Marko 5:5) Ali umukali ica kuti abantu baletiina ukupita mu musebo alesangwamo. Abantu bamo balyeseshe ukumukaka amacheni ku maboko na ku makasa, lelo aleyaputaula. Takwali uwakwete amaka ya kumunasha.

Ilyo aile kuli Yesu no kuwilaponena pa makasa yakwe, ifibanda ifyalemutungulula fyalengele abilikishe ati: “Bushe tulomfwana na iwe, Yesu, we Mwana wa kwa Lesa Uwapulamo? Lapa Lesa ukuti tawancushe.” Yesu alilangile ukuti alikwete amaka ukucila ifibanda. Aebele ifibanda ati: “Fuma mu muntu, we mupashi wakowela.”—Marko 5:7, 8.

Uyu mwaume ali ne fibanda ifingi. Ilyo Yesu amwipwishe ati, “Ni wani ishina?” ayaswike ati: “Ishina lyandi nine Cinkupiti, pantu twaba abengi.” (Marko 5:9) Abashilika abena Roma baleba cinkupiti, e kuti amakana ayengi, e ico uyu mwaume alecushiwa ku fibanda ifingi. Ifi ifibanda fyapaapeete Yesu ukuti “efyeba ukuya mu muyenge.” Fifwile fyalishibe ifikaficitikila ku ntanshi pamo na Satana, intungulushi ya fiko.—Luka 8:31.

Lwa mupepi kwali inkumba nalimo 2,000 ishalelya. Inkumba shali ni nama isho Ifunde lyatile shali ishakowela kabili isho bakeenye abaYuda ukuteka. Ifibanda fyapaapeete Yesu afiti: “Tutamfisheni mu nkumba, e mo tuye twingile.” (Marko 5:12) Yesu alifitamfishe, kabili fyaingile mu nkumba. Awe inkumba shonse 2,000 shabutukiile ukwasuluka no kuponena muli bemba, shanwena no kunwena.

Ilyo abalecema inkumba bamwene ifyacitike,  balifulumwike no kuyashimika mu musumba na mu mishi. Abantu balishile ku kumona ifyacitike. Ilyo bafikile, basangile umwaume uo Yesu afumishemo ifibanda ali fye bwino, nafwala ifya kufwala kabili naikala na ku makasa ya kwa Yesu.

Abantu abaumfwile nelyo abamweneko ifyacitike, balyumfwile umwenso pantu balifililwe ukwishiba umwalolele icacitike. Baebele Yesu ukufuma mu calo cabo. Ilyo Yesu aninine ubwato ukuti abwelelemo, umwaume uo afumishemo ifibanda alimupaapaatile ukuti aye nankwe. Lelo Yesu amwebele ati: “Kabiye ku ng’anda kuli balupwa lobe, no kubashimikila fyonse ifyo Yehova akucitila ne fyo akubelela uluse.”—Marko 5:19.

Ilingi line, Yesu ale-eba abo aleundapa ukukanaebako abantu pantu talefwaya abantu bamutetekele fye pa mulandu wa fyo balebashimikila fye, ifyo limbi balebikamo no bufi. Ilyo Yesu afumishe ifibanda mu mwaume cali-ilangile fye apabuuta tuutu ukuti ali na maka kabili ico acitile calengele abo ashashimikiile pali ilya nshita bamutetekele. Ifyacitikiile uyu mwaume fyalengele no kuti abantu belalanda ifyabipa pa calengele inkumba shinwene. E ico uyu mwaume aile aleshimikila abantu mu Dekapoli monse pa fyo Yesu amucitiile.