Yesu na basambi bakwe bane balibombele sana mu Kapernahumu mu nshita ya kasuba. Icungulo bushiku abena Kapernahumu baletele abalwele kuli Yesu pa kuti abaposhe. Yesu takwete ne nshita ya kutuusha.

Ubushiku bwakonkelepo, aimine lucelocelo ninshi napafiita, aya ku nse ya musumba eka. Aile ku cifulo ukushali abantu pa kuti apepe kuli Wishi. Lelo taikele eka pa nshita iikalamba. Ilyo bamwene ukuti talipo, “Simone na bali nankwe” baile mu kufwaya Yesu. Nalimo Petro e wabatungulwile pantu pa nshita imo Yesu ali ku mwakwe.—Marko 1:36; Luka 4:38.

Ilyo basangile Yesu, Petro amwebele ati: “Abantu bonse balemufwaya.” (Marko 1:37) Ukwabula no kutwishika abena Kapernahumu tabalefwaya ukuti Yesu afume mu musumba. Balitemenwe ifyo abacitiile, ne ci calengele bafwaye “ukumuteka ukuti eya.” (Luka 4:42) Lelo, bushe ico Yesu aishiile pano calo kucita fye ifipesha amano fya kundapa abantu? Kabili bushe ali no kucita ifipesha amano ku Kapernahumu fye? Bushe Yesu ayaswike shani?

Yesu aebele abasambi bakwe ati: “Tuleyeni kumbi, ku mishi ya mupepi, pa kuti na ko kwine nshimikileko, pantu e co naishila.” Na kuba, Yesu aebele abashalefwaya ukuti aleya ati: “Na mu misumba imbi ndi no kubila imbila nsuma iya Bufumu bwa kwa Lesa, pantu e co natumiinwe.”—Marko 1:38; Luka 4:43.

Icikalamba ico Yesu aishiile pano calo, kubila imbila nsuma pa Bufumu bwa kwa Lesa. Ubu Ubufumu bukalenga ishina lya kwa Wishi likacindikwe kabili bukafumyapo amafya yonse. Yesu aleposha abalwele mu cipesha amano pa kulanga ukuti atuminwe na Lesa. Mose na o mu myaka ya ku numa sana alicitile ifipesha amano pa kulanga ukuti atuminwe na Lesa.—Ukufuma 4:1-9, 30, 31.

Tapapitile na nshita, Yesu na basambi bakwe bane bafumine mu Kapernahumu no kuyashimikila mu misumba imbi. Aba basambi ni Petro na Andrea munyina, e lyo na Yohane na Yakobo munyina. Pali iyi inshita ninshi papita fye umulungu umo ukutula apo Yesu abetiile ukuti balemukonka.

Yesu na basambi bakwe bane balishimikile bwino sana mu fifulo ifingi mu Galili! Na kuba, abengi balyumfwile ifyo alecita. “Ululumbi lwakwe lwaile mu Siria monse,” mu citungu ca misumba baleita ukuti Dekapoli, ukuyafika na kwi shilya lya Mumana wa Yordani. (Mateo 4:24, 25) Abantu abengi aba muli iyi misumba, na mu Yudea, balikonkele Yesu na basambi bakwe. Abengi baletele abalwele pa kuti bondapwe. Yesu takeene ukubaposha, aliposeshe bonse kabili alifumishe ne fibanda mu bantu.