Ilyo Yesu alesambilisha abantu ninshi ali mwi tauni lya Kaisarea Filipi, ilyali apalepele amakilomita 25 ukufuma pa Lupili lwa Hermone, alandile amashiwi ayapapwishe abatumwa bakwe. Atile: “Ndemweba icine cine nati, kuli bamo pa beminine pano abashakafwe nakalya mpaka bakamone Umwana wa muntu aleisa mu Bufumu bwakwe.”—Mateo 16:28.

Abasambi bakwe bafwile tabaishibe umo aloseshe. Ilyo papitile nalimo umulungu umo, Yesu aile na batumwa bakwe batatu, Petro, Yakobo na Yohane pa lupili ulutali. Bafwile baile ubushiku pantu aba abatumwa batatu baleshipula. Ilyo Yesu alepepa, aba abatumwa bamwene fye ayaluka. Awe icinso cakwe catendeke ukubeeka nga akasuba, ne fya kufwala fyakwe fyabuutile na tuutu, kabili fyalebengeshima no kubeeka ngo lubuuto.

Lyena kwamoneke abantu babili, “Mose na Eliya,” abatendeke ukulanda na Yesu pa “kufumapo kwakwe uko ali no kufikilisha ku Yerusalemu.” (Luka 9:30, 31) Uku ukufumapo, ni mfwa ya kwa Yesu e lyo no kubuushiwa kwakwe uko alandilepo. (Mateo 16:21) Kanshi filya Petro alefwaya ukuti Yesu efwa, te fyo calingile ukuba. Nangu ca kuti yali ni mfwa ya museebanya, Yesu alingile ukufwa.

Pali iyi nshita, aba abatumwa batatu tabaleshipula, balemona no kumfwa ifyalecitika kabili balipapile icine cine. Ici cali fye cimonwa lelo ifyalecitika fyalemoneka kwati fya cine cine. E calengele Petro atendeke ukuibikamo mu fyalecitika. Aebele Yesu ati: “Mwe Kasambilisha, kuti cawama twikale pano pene. Natupangepo insakwe shitatu, imo iyenu, imbi iya kwa Mose e lyo na imbi iya kwa Eliya.” (Marko 9:5) Bushe ico Petro alandiile ukuti bapange insakwe ni co alefwaya icimonwa citwalilile?

Ilyo Petro alelanda aya amashiwi, ikumbi ilyabeeka lyalibakupile, ne shiwi ilyafumine mu muulu lyatile: “Uyu e Mwana wandi, uo natemwa, uo nsekelamo; muumfweni.” Ilyo abatumwa baumfwile ishiwi lya kwa Lesa, balitiinine kabili bawile ubukupeme, lelo Yesu abebele ati: “Imeni kabili mwitiina iyo.” (Mateo 17:5-7) Ilyo baimine, abatumwa basangile Yesu ali fye eka. E papwilile icimonwa. Ilyo bwaceele, ninshi baletentemuka ulupili, Yesu abebele ukuti: “Mwieba umuntu nangu umo icimonwa ici mpaka Umwana wa muntu akabuuke ku bafwa.”—Mateo 17:9.

Pa mulandu wa kuti balimwene Eliya mu cimonwa, abatumwa baipwishe Yesu abati: “Cinshi nomba bakalemba basosela abati Eliya afwile ukubalilapo ukwisa?” Yesu abaswike ati: “Eliya aliisa kale lelo tabamwishibe bwino.” (Mateo 17:10-12) Uo Yesu alelandapo ni Yohane Kabatisha, uwabombele umulimo uo Eliya abombeleko. Eliya alipekenye inshila ya kwa Elisha, e lyo Yohane na o alipekanishishe Kristu inshila.

Ici icimonwa calikoseshe sana Yesu na batumwa! Abatumwa balimwenene kabela ubukata ubo Kristu ali no kukwata nga aba Imfumu. Kanshi abasambi ‘balimwene Umwana wa muntu aleisa mu Bufumu bwakwe,’ nga fintu Yesu abalaile. (Mateo 16:28) Ilyo baali pa lupili, ‘bali-imwenene na menso yabo ubukata bwakwe.’ Yesu alikeene ukupeela abaFarise icishibilo balefwaya ica kulanga ukuti e o Lesa asalile ukwisaba Imfumu. Lelo alilekele abatumwa bakwe bamo bamona icimonwa ca kwaluka kwakwe icalelanga ukuti amasesemo yalanda pa Bufumu yakafikilishiwa. E calengele ukuti Petro alembe ukuti: ‘Twalicililako ukushininkisha ukuti amashiwi ya kusesema ya cishinka.’—2 Petro 1:16-19.