Pa numa fye ya kulanda pa kwelelwa imembu, mu ng’anda ya kwa Simone, umuFarise, Yesu aimine ubulendo bwa cibili ubwa kushimikila mu Galili. Uyu wali e mwaka walenga bubili uwa kushimikila. Taile eka, lelo aile na batumwa 12 e lyo na banakashi bamo abo “afumishemo imipashi iyabipa no kubondapa amalwele.” (Luka 8:2) Pali aba abanakashi pali Maria Magadala, Susana, na Yoana uwaupilwe ku mubomfi mukalamba uwa Mfumu Herode Antipa.

Ilyo abantu abengi baishibe ifyo Yesu alecita, batendeke ukukansana pa milimo iyo alebomba. E cacitike na lintu Yesu aundepe umwaume impofu kabili cibulu uwali ne cibanda, uo bamuleteele. Ilyo aundepwe, icibanda califumine, atendeke no kumona no kulanda. Abantu balipapile sana kabili batile, “Bushe uyu nalimo te Mwana Davidi?”—Mateo 12:23.

Abantu abaile pa ng’anda apo Yesu aleikala balifulishe ica kuti Yesu na basambi bakwe balifililwe no kulya. Lelo te bonse basumine ukuti Yesu e “Mwana Davidi,” uo Lesa atile akesa. Bakalemba bamo na baFarise balishile ukufuma ku Yerusalemu. Lelo tabaile mu kutungilila Yesu nelyo ukumfwa ifyo alesambilisha. Baleeba abantu abati: “Ali na Beelsebuli,” kanshi abombela pamo na “kateka wa fibanda.” (Marko 3:22) Ilyo balupwa ba kwa Yesu baumfwile icimfulunganya caimine, baile mu kwikata Yesu. Cinshi calengele?

Pali iyi nshita balupwa ba kwa Yesu nabo tabasumiine ukuti Mwana wa kwa Lesa. (Yohane 7:5) Tabaenekeele ukuti Yesu uwalekulila pamo nabo mu Nasarete kuti aleta icimfulunganya pa cintubwingi, e calengele batontonkanye no kuti “Napena.”—Marko 3:21.

 Lelo bushe ifyo balelanda fyali fya cine? Yesu aundepe fye umwaume uwali ne cibanda, uwatendeke ukumona no kulanda. Takwali uwatwishike ifyo acitile. E ico bakalemba na baFarise batendeke ukulanda ifya bufi pa fyo Yesu acitile. Batile: “Uyu muntu tafumisha ifibanda ku maka yambi kano ku maka ya kwa Beelsebuli kateka wa fibanda.”—Mateo 12:24.

E ico apo Yesu alishibe ifyo bakalemba na baFarise baletontonkanya, abebele ati: “Mu bufumu bonse nga mwaba ukupaatukana, bulonaika, na mu musumba onse nangu mu ng’anda nga mwaba ukupaatukana, te kuti fitwalilile ukwiminina. E fyo caba na kuli Satana, nga afumya Satana, ninshi aba uwapaatukana umwine; nga kanshi ubufumu bwakwe bukatwalilila shani ukwiminina?”—Mateo 12:25, 26.

Ifyo Yesu alandile fyalibashiniine! AbaFarise balishibe ukuti abaYuda bamo balefumya ifibanda. (Imilimo 19:13) E ico Yesu abepwishe ati: “Nga mfumisha ifibanda ku maka ya kwa Beelsebuli, ni ku maka ya kwa nani abasambi benu bafifumisha?” Ico Yesu alebeba ca kuti ifyo balemubepesha e fyo balecita. Lyena Yesu akonkenyepo ukubeba ukuti: “Lelo nga ni ku maka ya mupashi wa kwa Lesa e ko mfumisha ifibanda, ninshi Ubufumu bwa kwa Lesa nabwisa pali imwe.”—Mateo 12:27, 28.

Pa kubalanga ukuti filya alefumya ifibanda cali cishibilo ca kuti alicimfishe Satana, Yesu atile: “Umuntu kuti aingila shani mu ng’anda ya muntu wa maka no kupoka ifipe fyakwe? Afwile intanshi akaka uwa maka, e lyo nomba engasenda fyonse ifya mu ng’anda yakwe. Uushaba pamo na ine, ninshi alandwisha, no ushilonganya na ine, ninshi alasalanganya.” (Mateo 12:29, 30) Bakalemba na baFarise tabatemenwe ifyo Yesu alecita, ne ci calangile fye ukuti bali babomfi ba kwa Satana. AbaFarise balesalanganya abantu ukufuma ku Mwana wa kwa Lesa, uo Yehova apeele amaka ya kundapa.

Yesu asokele aba bantu ba kwa Satana ukuti: “Abantu bakababelela uluse te mulandu ne membu bacita ne miponto baponta. Lelo onse uwapontela umupashi wa mushilo tabakamubelele uluse umuyayaya, lelo ali no lubembu ulwa muyayaya.” (Marko 3:28, 29) Ifyo Yesu abebele filanga fye ukuti abantu abatila ifyo umupashi wa kwa Lesa ucita ni Satana aficita, te kuti belelwe imembu.