Yesu alicindike sana Yohane Kabatisha, lelo bushe abantu abengi balemumona shani Yohane? Yesu atile: “Iyi nkulo yaba nga abana abanono abekeele pa maliketi abalebilikisha ku banabo, abati, ‘Natumulishisha imitoolilo, lelo tamucindile; natulila imisowa, lelo tamulooseshe.’”—Mateo 11:16, 17.

Ni mwi Yesu aloseshe? Alondolwele ifyo alelandapo ilyo atile: “Ilyo Yohane aishile talelya nangu kunwa, lelo abantu batila, ‘Aba ne cibanda.’ Umwana wa muntu alisa, alalya no kunwa, lelo abantu batila, ‘Moneni! Uyu muntu muliili kabili alitemwisha umwangashi, kabili ni cibusa wa bakasonkesha ba misonko na babembu.’” (Mateo 11:18, 19) Imikalile ya kwa Yohane tayali nga ilya iya bantu bambi pantu ali mu Nasiri kabili talenwa umwangashi, lelo abantu ba nkulo ilya baleti ali ne cibanda. (Impendwa 6:2, 3; Luka 1:15) Yesu ena aleikala fye nga bantu bambi. Alelya no kunwako panono, lelo abantu baleti muliili kabili alanwesha umwangashi. Cailangile fye apabuuta tuutu ukuti balya bantu tabaali na cisuma.

Yesu atile iyi inkulo yaba nga “abana abanono abekele pa maliketi” abalekaana ukucinda ilyo abana banabo balebalishisha imitoolilo nelyo abalekaana ukuloosha ilyo abanabo baleloosha. Lyena Yesu atile: “Lelo ifintu ifyalungama ifyo umuntu acita e filanga ukuti wa mano.” (Mateo 11:16, 19) Ifyo Yohane na Yesu ‘balecita’ fyalelanga ukuti ifyo abantu balelanda pali bena fyali fya bufi.

Pa numa ya kweba abantu ba nkulo ilya ukuti tabalelapila, Yesu akalipiile abantu ba mu misumba ya Korasini, Betsaida, na Kapernahumu, umo acitile ifipesha amano. Lyena Yesu atile nga ca kuti mu misumba ya Turi na Sidone iya mu Foinike e mo acitile ifipesha amano, abantu nga balilapiile. Alandile na pa musumba wa Kapernahumu umo aikele pa nshita iitali ukuti abantu abengi mulya namo tabayalwike. Yesu alandile pali uyu musumba ati: “Cikaba eyefilyako pa Bushiku bwa Bupingushi ku musumba wa Sodomu ukucila ifyo cikaba kuli iwe.”—Mateo 11:24.

Lyena Yesu alumbenye Wishi, uufisa icine icacindama ku “ba mano na bacenjela” no kucisokolwela ku bantu abaicefya, ababa nga bana abanono. (Mateo 11:25) Aebele ababa ifi ati: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha. Pantu ikoli lyandi talyafina, ne cipe candi calyanguka.”—Mateo 11:28-30.

Bushe Yesu alesansamusha shani abalecula? Intungulushi sha mapepo shalebomfya intambi ku kutitikisha abantu, pamo nga shilya ishalekaanya abantu ukucita ifisuma pe Sabata. Lelo Yesu alibasansamwishe pantu abasambilishe icine ca kwa Lesa umushali intambi. Kabili alisansamwishe na bo baletitikisha ku buteko e lyo na baletitikishiwa ku lubembu. Yesu alibebele ifyo bengelelwa imembu ne fyo bengaba ifibusa fya kwa Lesa.

Bonse abasumina ukusenda ikoli lya kwa Yesu kuti baipeela kuli Lesa no kubombela Shifwe wa mu muulu uwa luse. Nga balebombela Lesa te kuti bafininwe pantu amafunde ya kwa Lesa tayayafya.—1 Yohane 5:3.