Yesu e lyo afumine fye mu kulanda pa mibele abasambi bakwe balingile ukukwata. Balingile ukuicefya, no kukanabika amano ku fifulo fya pa muulu nga filya abana abanono baba. Aebele abasambi ukuti nga ‘bapokelela abana abanono pa mulandu we shina lyakwe ninshi bapokelela na Yesu.’—Mateo 18:5.

Ilyo Yesu abebele ifi, abasambi nalimo bamwene kwati alebakalipila pantu e lyo bafumine fye mu kukansanina pa wali umukalamba. Nomba umutumwa Yohane alandile pa cintu cimbi icacitike. Atile: “Twamwene umuntu umo alefumisha ifibanda mwi shina lyenu kabili twalimuleseshe, pantu tatukonka.”—Luka 9:49.

Bushe Yohane alemona kwati abatumwa e balingile fye ukundapa no kufumya ifibanda? Nga ca kuti abatumwa e balingile fye ukufumya ifibanda, mulandu nshi uyu mwaume umuYuda alefumisha imipashi yabipa? Yohane alemona kwati ulya mwaume talingile ukufumya ifibanda pantu talekonka Yesu na batumwa.

Yesu alandile amashiwi ayapapwishe Yohane. Atile: “Mwilamulesha, pantu takuli nangu umo uucita icipesha amano mwi shina lyandi kabili apo pene atampa ukulampontela; pantu uushitulwisha, ninshi mwina mwesu. Pantu onse uwamupeela kapu ya menshi aya kunwa pa mulandu wa kuti muli ba kwa Kristu, ndemweba icine cine, nati, takabulwe icilambu cakwe nakalya.”—Marko 9:39-41.

Ulya umwaume ali musambi wa kwa Yesu nangu ca kutila talekonka Kristu pantu pali ilya nshita icilonganino ca Bwina Kristu ninshi tacilapangwa. Kanshi tacalolele mu kuti filya talekonka Yesu ninshi tasumiine muli Yesu nelyo alesambilisha ifya bufi. Afwile alikwete icitetekelo mwi shina lya kwa Yesu, e lyo kabili Yesu atile ulya mwaume takabulwe icilambu.

Cimbi ico alandilepo ca kutila, kuti cabipa sana abatumwa nga bapunwisha umuntu ku fyo balanda nelyo ku fyo bacita. Yesu atile: “Onse uwafumya ku citetekelo umo pali aba abanono abasumina, kuti cawama bamukobeka mu mukoshi icilibwe cafina ica kupelelako nga cilya impunda ipindulula no kumupoosa fye muli bemba.” (Marko 9:42) Asosele no kuti abasambi bakwe balingile ukuputulako ukuboko, ulukasa, nelyo ukuilobolamo ilinso nangu line ifi ifilundwa fyalicindama, nga ca kuti filelenga baleipununa. Cawamapo ukukanaba ne filundwa fya mubili ifyacindama pa kuti twingile mu Bufumu bwa kwa Lesa ukucila ukuba na fyo e lyo twapooswa mu Gehena (Umupokapoka wa Hinomu). Abatumwa ba kwa Yesu bafwile baliumwenepo uyu umupokapoka uwali mupepi na ku Yerusalemu umo baleocela ifisooso. E ico balishibe ukuti ilyo Yesu alandile pali Gehena alelanda pa konaulwa umuyayaya.

Yesu abasokele no kuti: “Cenjeleni ukuti mwisuula umo pali aba abanono; pantu ndemweba nati bamalaika wabo mu muulu balamona lyonse  icinso ca kwa Tata.” Cinshi cilanga ukuti aba “abanono” balicindama sana kuli Wishi? Yesu alandile pa muntu uwakwete impaanga 100 e lyo paluba imo. Uyu muntu alishiile impaanga 99 no kuya mu kufwaya imo iyalubile, kabili ilyo aisangile alitemenwe ukucila ne fyo atemenwe ilyo akwete impanga 99. Yesu asosele no kuti: “Tata uwaba mu muulu tafwaya ukuti umo pali aba abanono alobe.”—Mateo 18:10, 14.

Napamo filya abatumwa balekansana pa wali umukalamba, e calengele abebe ukuti: “Muleba no mucele mu myeo yenu, kabili muleikala umutende na banenu.” (Marko 9:50) Umucele ulalenga ifya kulya ukumfwika bwino. Ifyebo ifyalungwamo umucele wa mampalanya filaba ifisuma kabili filalenga balaumfwana. Ukukansana kwena takuleta mutende.—Abena Kolose 4:6.

Limo aba bwananyina kuti bapusana, e ico Yesu alyebele abasambi ifya kucita. Atile: “Nga munonko acita ulubembu, kabiye no kumweba icilubo cakwe ninshi muli fye babili. Nga akuumfwa, ninshi wabwesesha munonko mu nshila.” Inga nga tomfwile? Yesu atile: “Senda umuntu na umbi nelyo babili pamo nobe, pantu inte shibili nelyo shitatu e shingashininkisha umulandu.” Nga akaana ukumfwa na kuli bena, bafwile ukweba “icilonganino,” e kutila baeluda pa kuti bengapingula. Inga nga ca kuti tomfwile na kuli baeluda? “Leka abe kuli iwe ngo mwina fyalo kabili nga kasonkesha wa misonko,” umuntu uo abaYuda bashaleampana nankwe.—Mateo 18:15-17.

Baeluda balingile ukukonka ifyo Icebo ca kwa Lesa cilanda. Nga basanga ukuti uubembwike ali no mulandu kabili alingile ukusalapulwa, ninshi ubupingushi bwabo ‘nabukakwa kale na mu muulu.’ Lelo nga basanga ukuti takwete umulandu, ninshi ‘na mu muulu nakakulwa.’ Ifi fyali no kwafwa Abena Kristu ilyo icilonganino capangilwe. Yesu atile ilyo kuli ukulanshanya pa milandu ya musango yu, “ukuli babili nelyo batatu abalonganina mwi shina lyandi, ninshi na ine ndi pa kati kabo.”—Mateo 18:18-20.