Ilyo Yesu na basambi bakwe bafikile ku Betsaida, abantu baletele umwaume uwapofula kuli ena no kumupaapaata ukuti amundape.

Yesu aikete uyu mwaume pa kuboko no kumusenda ku nse ya mushi. Pa numa ya kumufwishila amate mu menso, Yesu amwipwishe ati: “Bushe wamonapo icili conse?” Umwaume atile: “Ndemona abantu, pantu ndemona ifilemoneka kwati fimuti, nomba file-enda.” (Marko 8:23, 24) Lyena Yesu abikile iminwe pa menso ya uyu mwaume, awe e fyo atendeke ukumona. Kabili aebele uyu umwaume ukuti aye ku mwabo, lelo e ingila mu mushi.

Pa numa, Yesu na basambi bakwe baile lwa ku kapinda ka ku kuso aka citungu ca Kaisarea Filipi. Baendele amakilomita 40 ukuninika ulupili. Umushi baileko wali pa muulu apalepele amamita 350, kabili lwa ku kapinda ka ku kuso aka uyu umushi e kwali Ulupili lwa Hermone apaleba imfula yabuuta. Bafwile balyendelepo inshiku ishingi.

Pa nshita imo, ninshi bali pa lwendo, Yesu afumine pa basambi bakwe, aya mu kupepa eka fye. Kwashele fye imyeshi 9 nelyo 10 ilyo Yesu ashilafwa. E ico alisakamikwe sana pa fyo cali no kuba ku basambi bakwe. Abengi balilekele ukumukonka e lyo bambi balyumfwile ububi pa fyacitike. Tabaishibe ico Yesu akaanine ilyo abantu balefwaya ukuti abe imfumu nelyo ico akaanine ukubapeela icishibilo pa kuti bamwishibe bwino bwino.

Ilyo abasambi baile uko alepepela, Yesu abepwishe ati: “Bushe abantu batila Umwana wa muntu nani?” Nabo batile: “Bamo batila ni Yohane Kabatisha, bambi batila ni Eliya, bambi na bo batila ni Yeremia nelyo umo pali bakasesema.” Bamo balemona kwati umo pali aba e wabuukile no kwisaba Yesu. Pa kuti eshibe ifyo baletontonkanya, Yesu aipwishe abasambi bakwe ati: “Nga imwe mutila nine ani?” Simone Petro ayaswike ati: “Ni mwe Kristu, Umwana wa kwa Lesa wa mweo.”—Mateo 16:13-16.

Yesu atile Petro alipaalilwe pantu Lesa e wamusokolwelele. Asosele no kuti: “Na ine ndekweba nati, Ni we Petro, kabili pali ici cilibwe e po nkakuula icilonganino candi, ne mpongolo sha Nshiishi tashakacicimfye.” Yesu aloseshe mu kuti, ali no kupanga icilonganino no kuti nangu ni Nshiishi te kuti icimfye aba muli ici cilonganino, cikulu fye batwalilila ukuba ne citetekelo ilyo bali pano calo. Alaile Petro ukuti: “Nkakupeela amakii ya Bufumu bwa mu muulu.”—Mateo 16:18, 19.

Yesu tatile Petro e ukaba umukalamba pa batumwa bonse, nelyo ukuti e ukaba umufula wa cilonganino. Yesu umwine e Libwe apo icilonganino cakwe cakuulwa. (1 Abena Korinti 3:11; Abena Efese 2:20) Na lyo line, Petro bali no kumupeela amakii yatatu. Ali no kukwata ishuko lya kwafwa abantu balekanalekana ukwingila mu Bufumu bwa mu muulu.

 Petro abomfeshe amakii ya kubalilapo pa Pentekoste ya mu 33 C.E., ilyo aebele abaYuda na basangwike fye abaYuda ifyo balingile ukucita pa kupusuka. Amakii ya bubili ayabomfeshe ilyo ayafwile abena Samaria ukukwata ishuko lya kwingila mu Bufumu bwa kwa Lesa. Lyena mu 36 C.E., Petro abomfeshe amakii ya butatu ilyo ayafwile abena Fyalo abashasembulwilwe, pamo nga Korneli na bambi ukuba ne shuko lya kwingila muli ubu Ubufumu.—Imilimo 2:37, 38; 8:14-17; 10:44-48.

Ilyo balelanshanya, abatumwa ba kwa Yesu balyumfwile ububi lintu abebele ukuti, ku Yerusalemu, uko baali mu kuya, abantu bakayamucusha no kumwipaya. Apo Petro tailwike ukuti Yesu ali no kubuuka e lyo no kuya ku muulu, akalipile Yesu ati: “Muyumfwileko uluse mwe Shikulu; ico tacakamucitikile nakalya.” Lelo Yesu alipilibwike no kumweba ati: “Kabiye ku numa yandi, we Satana we! Kuti waleka nalufyanya, pantu tautontonkanya ifya kwa Lesa, kano ifya bantu.”—Mateo 16:22, 23.

Yesu aitile abatumwa bakwe na bantu bambi no kubalondolwela ukuti tacayanguka ukuba umusambi wakwe. Atile: “Umuntu nga alefwaya ukunkonka, aikaane umwine, asende icimuti cakwe ica bucushi, alenkonka lyonse. Pantu onse uufwaya ukupususha umweo wakwe akafwa; lelo onse uwafwila pa mulandu wandi na pa mulandu wa mbila nsuma akaupususha.”—Marko 8:34, 35.

Kanshi pa kuti Yesu abapokelele, abasambi bakwe balingile ukuba abashipa kabili abaipeelesha ukumukonka. Yesu atile: “Onse uwaumfwila insoni ine na mashiwi yandi mu nkulo ino iya bantu abashaba na cishinka kuli Lesa kabili ababembu, Umwana wa muntu na o akamumfwila insoni ilyo akesa no bukata bwa kwa Wishi pamo na bamalaika ba mushilo.” (Marko 8:38) E ico ilyo Yesu akesa, “akalambula umuntu onse ukulingana ne mibele yakwe.”—Mateo 16:27.