Yesu aliliishishe abantu abengi ilyo ali ku kabanga ka Bemba wa Galili, lelo ilyo bafwaile ukuti abe imfumu, alifumineko. Mu nshita ya bushiku, Yesu alyendele pali bemba apali icikuuku ca mwela kabili apuswishe Petro uwatendeke ukwibila ilyo na o afwaile ukwenda pa menshi. Icalengele Petro atendeke ukwibila ni co icitetekelo cakwe calicepele. Yesu na kabili alitalalike icikuuku ca mwela icali no kulenga abasambi ukubunda.

Yesu alibwelelemo ku Kapernahumu, ku masamba ya bemba kabili abantu abo aliishishe mu cipesha amano balimusangile no kumweba abati: “Ni lilali mwaishile kuno?” Yesu alibakalipile pantu ico balemufwaila ni co balefwaya abaliishe na kabili. Abebele ati: “Mwibombela ifya kulya ifyonaika, lelo mubombele ifya kulya ifibelelela ifingamutwala ku mweo wa muyayaya.” E ico bamwipwishe abati: “Tucite shani kanshi pa kuti tulebomba imilimo iyo Lesa asuminisha?”—Yohane 6:25-28.

Nalimo bena baletontonkanya pa kucita ifyalembelwe mu Mafunde, lelo Yesu abebele ukuti bafwile ukubomba umulimo uwacindama sana. Atile: “Uyu e mulimo uo Lesa asuminisha, uwa kuti mutetekele uo Atumine.” Lelo abantu tabatetekele Yesu, nangu ca kutila alicitile ifintu ifingi. Balefwaya ukuti abalange icishibilo pa kuti bamutetekele. E ico bamwipwishe abati: “Nga kanshi cipesha amano nshi ico walacita? . . . Bashifwe baliile mana mu matololo, filya calembwa ati, ‘Abapeele umukate ukufuma ku muulu ukuti balye.’”—Yohane 6:29-31; Amalumbo 78:24.

Pali filya balefwaya ukuti abalange icishibilo, Yesu alandile pa Wamupeele amaka ya kucita ifipesha amano. Atile: “Ndemweba icine cine, nati, Mose tamupeele umukate ukufuma ku muulu, lelo Tata e umupeela umukate wine wine uwafuma ku muulu. Pantu umukate wa kwa Lesa ni ulya uwafuma ku muulu no kupeela ubumi ku ba mu calo.” Apo tabaishibe ico alelandapo, bamulombele abati: “Mwe Shikulu, muletupeela lyonse uyu mukate.” (Yohane 6:32-34) Lelo “mukate” nshi uo Yesu alelandapo?

Yesu abalondolwelele ati: “Nine mukate wa bumi. Uwaisa kuli ine takomfwe insala iyo, kabili uuntetekela takomfwe icilaka nakalya. Lelo nalimweba, nati, ukumona mwalimona nomba tamusumina. . . . Ico nafumina ku muulu te ku kucita ukufwaya kwandi, lelo ni ku kucita ukufwaya kwa wantumine. Uku e kufwaya kwa wantumine, ukuti nilufyapo nangu umo pali bonse abo ampeela lelo ukuti nkababuushe bonse pa bushiku bwa kulekelesha. Pantu uku e kufwaya kwa kwa Tata, ukuti onse uwamona Umwana no kumutetekela abe no mweo wa muyayaya.”—Yohane 6:35-40.

Ifyo alandile fyalengele abantu bafulwa, kabili abaYuda batendeke ukung’winta. Batile, cinshi alelandila ukuti “mukate uwafuma ku muulu”? (Yohane 6:41) Bena baishibe ukuti afyelwe ku bafyashi abantunse fye aba mu musumba wa Nasarete, mu citungu ca Galili. E ico abantu bamwipwishe abati: “Bushe uyu te Yesu, umwana wa kwa Yosefe, uo wishi na nyina twaishiba?”—Yohane 6:42.

Yesu abaswike ati: “Lekeni ukung’winta. Takuli uwingesa kuli ine kano Tata uwantumine, amukula; kabili nkamubuusha mu bushiku bwa kulekelesha. Calilembwa mu mashiwi ya Bakasesema ukuti, ‘Kabili bonse bakaba abasambilishiwa kuli Yehova.’ Onse uwaumfwa kuli Tata no kusambilila kuli ena esa kuli ine. Te kutila kwaba umuntu uwamona Tata, kano fye uwafuma kuli Lesa; uyu e wamona Tata. Ndemweba icine cine, nati, uutetekela aba no mweo wa muyayaya.”—Yohane 6:43-47; Esaya 54:13.

Ilyo Yesu alanshenye na Nikodemo, amwebele ukutila pa kuti umuntu abe no mweo wa muyayaya afwile ukutetekela Umwana wa muntu. Atile: ‘Onse uutetekela [Umwana wa kwa Lesa uwafyalwa eka] takonaike lelo akaba no mweo wa muyayaya.’ (Yohane 3:15, 16) Lelo pali iyi  inshita ale-eba abantu abengi ukuti bafwile ukumutetekela pa kuti bengaba no mweo wa muyayaya, uo umuntu ashingakwata nga ca kuti alya mana nelyo umukate uo balepanga sana mu Galili. Nomba bushe umuntu kuti aba shani no mweo wa muyayaya? Yesu alibwekeshepo ukulanda ukuti: “Ine ndi mukate wa bumi.”—Yohane 6:48.

Yesu alitwalilile ukweba abantu pa mukate uwafuma ku muulu, kabili alilandilepo sana na lintu asambilishe abantu mwi sunagoge lya mu Kapernahumu.