Ilyo papitile inshiku shitatu ukutula apo Natanaele abelele umusambi wa kwa Yesu, Yesu na basambi bakwe bamo aba kubalilapo balungeme ku kapinda ka kuso no kuya ku citungu ca Galili, uko baleikala. Baile kwi tauni lya Kana, ukwaleikala Natanaele. Ili itauni lyali mu mpili ishali ku kapinda ka ku kuso aka musumba wa Nasarete, umo Yesu akuliile. Balibetile ku mutebeto wa bwinga ubwali mu Kana.

Nyina wa kwa Yesu na o aliile ku bwinga. Apo Maria ali ni cibusa wa ba lupwa lwa baleupana, afwile alibafwileko ukupekanya ifya kupeela abeni abengi abaishile ku bwinga. E ico ilyo umwangashi wapwile, alimwene bwangu, kabili aebele Yesu ukuti: “Tabakwete umwangashi.”—Yohane 2:3.

Maria alefwaya Yesu acitepo cimo. Pa kwasuka, Yesu abomfeshe amashiwi ayalelanga ukuti alikeene. Atile: “Nomba ncite shani?” (Yohane 2:4) Apo Lesa, Wishi wa mu muulu e wamusalile ukuba Imfumu, e walingile ukulamutungulula muli fyonse ifyo alecita, te balupwa nelyo ifibusa iyo. Maria alekele Yesu ukucita ifyo umwine alefwaya, kabili aebele ababomfi ati: “Conse ico alemweba, mucite.”—Yohane 2:5.

Kwali imitondo ya mabwe 6, kabili mu mutondo umo mwaleingila amalita ya menshi ukucila pali 40. E ico Yesu aebele ababomfi ukuti: “Isusheni amenshi mu mitondo.” Lyena abebele ati: “Nomba tapulenimo, mutwale ku mukalamba wa mutebeto.”—Yohane 2:7, 8.

Umukalamba wa mutebeto alitemenwe ilyo aumfwile ifyo umwangashi waweme, lelo taishibe ukuti wapangilwe mu cisungusho. E ico aitile shibwinga no kumweba ati: “Umuntu onse intanshi afumya umwangashi uusuma, kabili ilyo abantu bakolwa, e lyo afumya umwangashi ushawama. Lelo iwe nausungo mwangashi usuma ukufika na nomba.”—Yohane 2:10.

Ici cali e cipesha amano ca kubalilapo ico Yesu acitile. Ilyo abasambi bakwe bamwene ici icipesha amano, balimucetekele sana. Lyena Yesu na banyina e lyo na bamunyina baile ku musumba wa Kapernahumu uwali lwa ku kapinda ka ku kuso aka lulamba lwa Bemba wa Galili.