Yesu tafumine mu ng’anda ya muFarise pa numa ya kundapa umwaume uwalwele ulusuku. Ilyo balelya, Yesu alimwene ukuti bamo abo baitile ku ca kulya baleikala apacindama sana, e ico atendeke ukubasambilisha pa kuicefya.

Yesu abebele ukuti: “Ilyo umuntu akwita ku mutebeto wa bwinga, wilaikala apacindama. Epali umuntu uwacindama ukukucila na o nabamwita, no ukwitile aisa nankwe no kukweba ati, ‘Fumapo, uyu ekalepo.’ E lyo waimapo uli ne nsoni wayaikala apashacindama.”—Luka 14:8, 9.

Yesu akonkenyepo ukubeba ati: “Ilyo bakwita, ikala apashacindama, pa kuti ilyo uukwitile aisa, kuti akweba ati, ‘Mune, kekale palya apacindama.’ Kabili ukacindikwa pa menso ya bonse abetilwe pamo nobe.” Ukucita ifi takulanga fye ukuti umuntu wa mucinshi. Yesu atile: “Pantu onse uwaicindamika bakamuceefya, na onse uuiceefya bakamucindamika.” (Luka 14:10, 11) Kanshi cimbi ico Yesu alebasambilisha, kuba abaicefya.

Lyena Yesu asambilishe umuFarise uwamwitile ku ca kulya isambililo na limbi. Amwebele pabo afwile ukwitako ku mutebeto pa kuti Lesa engamupaala. Atile: “Ilyo wapekanya ifya kulya akasuba nelyo umulaalilo, wilaita ifibusa fyobe nangu bamunonko nangu balupwa nangu abena mupalamano abakankaala. Epali inshita imbi na bo bakwita, kabili ico kuti caba e cilambu cobe. Lelo ilyo wapekanya umutebeto, ita abapiina, abalemana, na balemana amolu, e lyo ne mpofu; e lyo ukaba ne nsansa, pantu tabakwete ica ku kulambula nangu cimo.”—Luka 14:12-14.

Yesu talelanda ukuti calibipa ukwita ifibusa, balupwa nelyo abena mupalamano ku mutebeto. Lelo ico alelandapo ca kuti nga tuleitako abapiina, abalemana, nelyo abashimona, Lesa kuti atupaala sana. Yesu aebele uwamwitile ku ca kulya ati: “Ukalambulwa mu kubuuka kwa balungami.” Umo pa baitilwe nankwe atile: “Alipaalwa uukalya umukate mu Bufumu bwa kwa Lesa.” (Luka 14:15) Alimwene ukuti ici kuti cawama sana. Lelo nga fintu Yesu alandilepo mu cilangililo cakonkapo, te bonse balemona ukuti lipaalo ukulya umukate mu Bufumu bwa mu muulu.

Yesu atile: “Umuntu umo apekenye umulaalilo uukalamba, kabili aitile abantu abengi. Kabili atumine umusha wakwe . . . ukuti ayeeba abaitilwe ati, ‘Iseni, pantu nomba nimpekanya fyonse.’ Lelo bonse batendeke ukutelebwila. Uwa ntanshi amwebele ati: ‘Ninshita impanga kabili mfwile ukuyaimona; ndekupapaata nati, Unjeleleko.’ Na umbi atile, ‘Ninshita ing’ombe 10 kabili ndeya ku kushiceeceeta; ndekupapaata nati, Unjeleleko.’ Lelo umbi na o atile, ‘E lyo fye ngupile, e co nafililwa ukwisa.’”—Luka 14:16-20.

Imilandu bakaaninepo ukuya ku mutebeto tayali milandu ine ine! Umuntu alabala aceeceeta ibala nelyo icitekwa ilyo talashita, kanshi ukuficeeceeta pa numa te kwacindeme ukucila ukuya ku mutebeto. Umwaume walenga butatu talepekanya ubwinga pantu pali iyi inshita ninshi alyupa kale. Kanshi ici te cingalenga afilwe ukuya ku mutebeto. Ilyo shikulu aumfwile ifyo balandile, alikalipe kabili aebele umusha wakwe ati:

“Kabiye bwangu mu misebo iikalamba na mu nshila sha mu musumba, no kuleta muno abapiina na balemana ne mpofu na balemana amolu.” Ilyo umusha acitile ifyo bamwebele, kwalishele incende na imbi. E ico shikulu wakwe amwebele ati “Kabiye ku bali mu misebo na mu tushila, no kubapatikisha bese muno, uleke ing’anda yandi iisule. Pantu ndemweba nati, pa bantu balya abo njitile tapali nangu umo uulesondapo umulaalilo wandi.”—Luka 14:21-24.

 Ifyo Yesu alandile fyalangilile ifyo Yehova na Yesu Kristu bali no kwita abantu bambi mu Bufumu bwa mu muulu. AbaYuda, maka maka intungulushi sha mapepo e bali aba ntanshi ukwitwa. Lelo abengi balikeene ubwite bwa kwa Yesu ilyo alebomba umulimo wa kushimikila imbila nsuma. Lelo te aba beka fye abo bali no kwita. Yesu alandile ukuti ku ntanshi ali no kwita abantu bambi abali abasuulwa mu luko lwa baYuda e lyo na basangwike fye abaYuda. Lyena pa numa, bali no kwita ibumba lyalenga butatu, e kutila abantu abo abaYuda balemona ukuti tabalingile no kwiminina pa ntanshi ya kwa Lesa.—Imilimo 10:28-48.

Ukwabula no kutwishika, ifyo Yesu alandile fyalangile ukuti ifyasosele uwaitilwe pamo nankwe ku mutebeto fyali fya cine. Uyu muntu atile, “Alipaalwa uukalya umukate mu Bufumu bwa kwa Lesa.”