Nangu ca kuti Yesu aleya ku Yerusalemu, nalimo alitalile aikalako na basambi bakwe mu ng’anda ya kwa Sakeo. Abasambi baishibe ukuti “Ubufumu bwa kwa Lesa” bwali no kwisa pali ilya ine nshita, no kuti Yesu e wali no kuba Imfumu. (Luka 19:11) Balifililwe ukumfwikisha uyu mulandu nga filya fine bafililwe ukwiluka ukuti Yesu alingile ukufwa. E ico pa kubafwa ukwiluka ukuti Ubufumu bwali no kwisa ku ntanshi sana, abashimikile icilangililo.

Atile: “Umuntu umo uwa ku bufumu ali no kuya ku calo ca kutali ku kuyaba imfumu, e lyo no kubwela.” (Luka 19:12) Ulu lwendo lwali ulutali. Ukwabula no kutwishika, Yesu e ‘muntu uwa ku bufumu’ uwaile ku “calo ca kutali,” e kutila ku muulu, uko Wishi ailemupeela ubufumu.

Mu cilangililo, Yesu atile, ilyo ‘umuntu wa ku bufumu’ ashilaya, aitile abasha 10, abapeela cila muntu maina imo iya silfere, no kubeba ati: “Mukababomfye ukucita amakwebo mpaka nkabwele.” (Luka 19:13) Bamaina ba silfere baali ni ndalama ishingi sana. Maina imo e yo balelipila umubomfi wa mwi bala nga abomba pa myeshi ukucila pali itatu.

Abasambi bafwile balishibe ukuti e baleimininako abasha 10 mu cilangililo, pantu Yesu pa nshita imo abapashenye ku babomfi ba mu mulimo wa kulobolola. (Mateo 9:35-38) Na lyo line, Yesu talelanda ukuti abasambi bafwile ukulobolola ingano. Lelo balingile ukupanga abasambi abali no kuba mu Bufumu bwa kwa Lesa. Abasambi balabomfya fyonse ifyo baakwata ku kwafwa abantu na bambi ukuba impyani sha Bufumu.

Finshi fimbi ifyo Yesu alandilepo mu cilangililo? Atile, abekashi ba mu calo “balimupatile [umuntu wa ku bufumu], batumine inkombe ukumukonka, abati: ‘Tatulefwaya uyu muntu abe mfumu pali ifwe iyo.’” (Luka 19:14) Abasambi balishibe ukuti abaYuda balipatile Yesu ica kuti bamo balefwaya fye no kumwipaya. Ilyo Yesu afwile, aya na ku muulu, abaYuda balangile ukuti balimupatile pantu batendeke ukucusha abasambi bakwe. Ifyo bacitile filanga ukuti tabaalefwaya ukuti Yesu abe Imfumu.—Yohane 19:15, 16; Imilimo 4:13-18; 5:40.

Lelo bushe abasha 10 babomfeshe shani bamaina ukutula apo ‘umuntu wa ku bufumu,’ afumiinepo mpaka abwela ninshi nabamupeela ‘ubufumu’? Yesu ashimike ati: “Ilyo abwelele pa numa ya kuba imfumu, atumine abakwita abasha abo apeele indalama sha silfere, ukuti eshibe isho basangiilepo ilyo balecita amakwebo. Awe uwa ntanshi alishile no kutila: ‘Mwe Shikulu, pali maina wenu umo nalisangilapo bamaina 10.’ Na o atile kuli ena, ‘Eya, mwabombeni, we musha musuma! Pa mulandu wa kuti waba uwa cishinka mu tunono sana, wakulateka pa misumba 10.’ No walenga babili alishile no kutila, ‘Mwe Shikulu, pali maina wenu umo nalisangilapo bamaina basano.’ Atile na kuli ulya, ‘Na iwe wine wakulateka pa misumba isano.’”—Luka 19:15-19.

Abasambi nga balilwike ukuti e bo Yesu apashenye ku basha ababomfeshe bwino ifyuma pa kuti bapange abasambi na bambi, ninshi tabatwishike ukuti Yesu alitemenwe pa fyo bacitile no kuti ali no kubapeelelapo icilambu. Kwena abasambi ba kwa Yesu balipusene ifyo baali, mu maka na mu mikalile. Lelo Yesu, uwapeelwe ‘ubufumu,’ ali no kupaala umulimo wa kulenga abantu ukuba abasambi uo balebomba no mutima onse.—Mateo 28:19, 20.

Lelo moneni ifyo umusha umo acitile mu cilangililo. Pa kusondwelela icilangililo Yesu atile: “Lelo [umusha] umbi alishile no kutila, ‘Mwe Shikulu, maina wenu uyu, uo nafishile mu nsalu. Mukwai, nalemutiina, pantu muli bakali; mubuula ne co mushabikile kabili mulobolola ne fyo mushatandile.’ Na o atile kuli ena, ‘Ndekupingwila ku fyafuma mu kanwa kobe, we musha mubi. Bushe kanshi walishibe ukuti ndi mukali, mbuula  ifyo nshasungishe ku muntu no kulobolola ifyo nshatandile? Nomba cinshi ico ushabikiile indalama shandi isha silfere ku banki? Na ine ilyo naisa nga nalishibulile pamo ne shalundwapo.’ “E ico aebele abaiminine mupepi ati, ‘Mupokeni maina no kupeela uukwete bamaina 10.’”—Luka 19:20-24.

Apo alifililwe ukulundulula icuma ca bufumu bwa kwa shikulu wakwe, uyu musha balimupokele ne fyo akwete. Abatumwa bale-enekela Yesu ukutendeka ukuteka mu Bufumu bwa kwa Lesa. E ico bafwile balishibe ukuti ifyo alandile pa musha wa kulekelesha fyalelanga ukuti nga tabakabombeshe, bakafilwa ukwingila muli bulya Ubufumu.

Amashiwi ayo Yesu alandile yalingile ukucincisha abasambi bakwe aba cishinka ukubombesha. Atile: “Ndetila kuli imwe, nati, onse uwakwata, bakamupeela na fimbi; lelo uushakwata bakamupoka ne fyo akwata.” Alandile no kuti abalwani bakwe, abashalefwaya ukuti ‘abe imfumu yabo,’ bakepaiwa. Ilyo Yesu alandile ifi fintu, alikonkenyepo ubulendo bwakwe, ubwa kuya ku Yerusalemu.—Luka 19:26-28.