Icilangililo ca mwana uwalubile, ico Yesu ashimike, cifwile calyafwile bakasonkesha ba misonko, bakalemba, na baFarise abo Yesu alelanda nabo ukwishiba ukuti Lesa alabelela uluse ababembu nga balapila. (Luka 15:1-7, 11) Lyena Yesu atendeke ukulanda na basambi bakwe. Abebele icilangililo na cimbi pa muntu umukankaala uo baebele ukuti umubomfi wakwe umukalamba, uwa pa ng’anda talebomba bwino.

Yesu alondolwele ukuti uyu umubomfi aleonaula ifyuma fya kwa shikulu wakwe. E ico shikulu wakwe atile, alamutamfya incito. Umubomfi atile: “Ndecita shani, apo shikulu alempoka umulimo wa kuba umubomfi mukalamba uwa pa ng’anda? Nshakwata amaka ya kulima, kabili ndi ne nsoni sha kulomba.” Alicitilepo fimo pa kuti ekacula sana. Atile: “Naishiba ico nalacita, pa kuti ilyo bantamfya incito, abantu bakampokelele mu mayanda yabo.” Ilyo line fye aitile bonse abakongwele kuli shikulu wakwe kabili atendeke ukwipusha umo na umo ati: “Wakwata inkongole shinga kuli shikulu?”—Luka 16:3-5.

Uwa ntanshi atile: “Imbeketi sha mafuta ya muolife 100,” e kutila amalita 2,200. Uyu muntu afwile alikwete impanga umo alimbile ifimuti fya miolife ifingi ifyo balefumyako amafuta e lyo nalimo aleshitisha amafuta. Umubomfi amwebele ati, “Buula kalata obe uwa cipangano uyu, ikala apa ulembepo bwangu bwangu ati imbeketi 50 [amalita 1,100].”—Luka 16:6.

Umubomfi aipwishe na umbi ati: “Nga iwe wakwata inkongole shinga?” Na o atile: “Amadalamu ya ngano 100,” e kutila amalita 22,000. Umubomfi amwebele ati, “Buula kalata obe uwa cipangano uyu, no kulembapo amadalamu 80.” E ico amufumiisheko amadalamu 20.—Luka 16:7.

Pali iyi nshita uyu mwaume ninshi acili umubomfi mukalamba mu nganda ya kwa shikulu wakwe, kanshi alikwete insambu sha kufumishako abantu inkongole isho bakongwele shikulu wakwe. Ifyo acitile fyalengele apange ifibusa na bantu abali no kumwafwa nga bamutamfya incito.

Shikulu wakwe asukile aishiba ico uyu umubomfi acitile. Nangu ca kutila uyu mubomfi alengele icuma ca kwa shikulu wakwe ukubwelela pa nshi, shikulu wakwe alimutashishe pantu, “nangu tali uwalungama, . . . acitile ifintu mano mano.” Yesu asosele no kuti: “Abantu ba muli cino calo balishiba ifya kucita ku ba nkulo yabo ukucila abana ba lubuuto.”—Luka 16:8.

Yesu talelanda ukuti ifyo umubomfi mukalamba acitile fyali fye bwino e lyo kabili talekoselesha abantu ukuba no bucenjeshi mu makwebo. Nomba cinshi alelandapo? Akoseleshe abasambi bakwe ati: “Ipangileni ifibusa ku fyuma fishalungama, pa kuti ilyo ifi  fyapwa, bakamupokelele mu fifulo fya muyayaya.” (Luka 16:9) Kanshi ico alebasambilisha ca kuti balingile ukutontonkanya pa fingacitika ku ntanshi e lyo no kuipekanya. Ababomfi ba kwa Lesa, “abana ba lubuuto,” balingile ukubomfya bwino ifyo bakwata pa kuti bakakwate umweo wa muyayaya ku ntanshi.

Ni Yehova Lesa fye no Mwana wakwe e bengapokelela abantu mu Bufumu bwa ku muulu nelyo mu Paradaise iikaba pano isonde ilyo Ubufumu bukalateka. Kanshi tufwile ukulatungilila sana Ubufumu ku fyo twakwata pa kuti tukabe ifibusa fya kwa Yehova na Yesu Kristu. Nga tulecita ifyo, tukatwalilila ukuba aba mweo ilyo golde na silfere e lyo ne fyuma fimbi fikaloba.

Yesu asosele no kuti ababomfya bwino ifyuma nelyo ifyo bakwata balabika amano ku fintu ifyacindama. Yesu atile: “E ico nga tamwaba aba cishinka ku fyuma fishalungama, nani akaseekesha kuli imwe ifyuma fya cine cine [imilimo ya Bufumu]?”—Luka 16:11.

Yesu alefunda abasambi bakwe ukuti pa kutila bakapokelelwe mu “fifulo fya muyayaya,” bafwile ukubombesha. Umuntu te kuti abe umusha wa kwa Lesa uku ninshi alitekwa ubusha ku fyuma ifishalungama. Mu kulekelesha, Yesu atile: “Takuli umubomfi wa mu ng’anda uwingabombela bashikulu babili; pantu kuti apatapo umo no kutemwa umbi, nalimo kuti aba uwa cishinka kuli umo no kusuula umbi. Te kuti mubombele Lesa ne Fyuma.”—Luka 16:9, 13.